ନୂଆଦିଲ୍ଲୀ: ଆଗାମୀ ଶନିବାର ମହାକାଶ ବିଜ୍ଞାନୀଙ୍କ ପାଇଁ ରୋମାଞ୍ଚକର ମୁହୂର୍ତ୍ତ। ପୃଥିବୀ ଆଡ଼କୁ ମାଡିଆସିବ ବିଶାଳକାୟ ଗ୍ରହାଣୁ। ପ୍ରାୟ ପାଞ୍ଚଟି କ୍ରୁଜ୍ ଜାହାଜର ଆକାରର। ଆମ ଗ୍ରହର ବହୁତ ନିକଟ ଦେଇ ଗତି କରିବ। ଏନେଇ ଘୋଷଣା କରିଛି ୟୁରୋପୀୟ ମହାକାଶ ସଂସ୍ଥା (ESA)। ଏହି ଗ୍ରହାଣୁର 1997 NC1 ନାମ ଦିଆଯାଇଛି। ବୈଜ୍ଞାନିକଙ୍କ ଅନୁସାରେ, ଏହା ଶନିବାର ପୃଥିବୀରୁ ପ୍ରାୟ ୨.୫୬ ନିୟୁତ କିଲୋମିଟର ଦୂରତାରେ ଅତିକ୍ରମ କରିବ। ଏହି ଦୂରତା ପୃଥିବୀ ଏବଂ ଚନ୍ଦ୍ର ମଧ୍ୟରେ ଥିବା ଦୂରତାଠାରୁ ଛଅ ଗୁଣ ଅଧିକ। ସୌଭାଗ୍ୟବଶତଃ କୌଣସି ଧକ୍କାର ଆଶଙ୍କା ନାହିଁ। ପୃଥିବୀ ପ୍ରତି ବିପଦ ଥିବା ଆଶଙ୍କାକୁ  ବୈଜ୍ଞାନିକମାନେ ସମ୍ପୂର୍ଣ୍ଣ ଭାବରେ ଖାରଜ କରିଛନ୍ତି। ଶନିବାର ଗ୍ରହାଣୁ ଅତିକ୍ରମ କରିବା ସମୟରେ ଏହାର ଘଣ୍ଟା ପ୍ରତି ବେଗ ୯ କିମି ରହିବ। ଜ୍ୟୋତିର୍ବିଜ୍ଞାନୀମାନେ ଛୋଟ କିମ୍ବା ବଡ଼ ଟେଲିସ୍କୋପ ବ୍ୟବହାର କରି ଏହାକୁ ଦେଖିପାରିବେ।

ଏହି ଗ୍ରହାଣୁ ପ୍ରଥମ ଥର ପାଇଁ 1997 ମସିହାରେ ଆବିଷ୍କୃତ ହୋଇଥିଲା। ଏହା ପ୍ରତିଫଳିତ ସୂର୍ଯ୍ୟକିରଣ ଉପରେ ଆଧାର କରି ବୈଜ୍ଞାନିକମାନେ ଏହାର ଆକାର ଅନୁମାନ କରିଛନ୍ତି। ଏହି ମାପ ଅନୁସାରେ, ଏହାର ପ୍ରସ୍ଥ ୭୫୦ ମିଟରରୁ ୧୬୫୦ ମିଟର ମଧ୍ୟରେ ହୋଇପାରେ। ତଥାପି ESA ବୈଜ୍ଞାନିକମାନଙ୍କ ଅନୁମାନ ଏହା ଆକାରରେ ଟିକିଏ ଛୋଟ ହୋଇପାରେ। ESAର ଗ୍ରହ ପ୍ରତିରକ୍ଷା କାର୍ଯ୍ୟାଳୟର ବିଶେଷଜ୍ଞ ଜୁଆନ ଲୁଇସ୍ କାନୋ କହିଛନ୍ତି, ଏହି ଆକାରର ବସ୍ତୁଗୁଡ଼ିକ ପ୍ରତି କିଛି ବର୍ଷରେ ପୃଥିବୀ ନିକଟକୁ ଆସନ୍ତି।

ଏହି ବିଶାଳ ପଥର ଦେଖିବା ପାଇଁ ଆପଣଙ୍କୁ ସଠିକ୍ ଉପକରଣ ଆବଶ୍ୟକ। ଏହି ଗ୍ରହାଣୁ ଖାଲି ଆଖିରେ ଦୃଶ୍ୟମାନ ହେବ ନାହିଁ। ଏହାକୁ ଦେଖିବା ପାଇଁ ଛୋଟ ଟେଲିସ୍କୋପ କିମ୍ବା ଶକ୍ତିଶାଳୀ ଦୂରବୀକ୍ଷଣ ଆବଶ୍ୟକ।ଏହା ପୃଥିବୀର ନିକଟତର ହେବା ମାତ୍ରେ, ଏହା ଉତ୍ତର ଗୋଲାର୍ଦ୍ଧର କିଛି ଅଂଶରୁ ସ୍ପଷ୍ଟ ଭାବରେ ଦୃଶ୍ୟମାନ ହେବ।

ଯେତେବେଳେ ଏହା ପୃଥିବୀ ଅତିକ୍ରମ କରିବ, ଏହା ପ୍ରାୟ ସବୁ ସ୍ଥାନରୁ ଦୃଶ୍ୟମାନ ହେବ। ଯେତେବେଳେ ଏହା ପଛକୁ ହଟିବାକୁ ଆରମ୍ଭ କରିବ, କେବଳ ଦକ୍ଷିଣ ଗୋଲାର୍ଦ୍ଧର ଲୋକମାନେ ଏହାକୁ ଦେଖିପାରିବେ। ତଥାପି, ଏହାକୁ ଦେଖିବା ପାଇଁ ଏକ ସମ୍ପୂର୍ଣ୍ଣ ସ୍ୱଚ୍ଛ ଏବଂ ଅନ୍ଧାର ଆକାଶ ଜରୁରୀ। ଜହ୍ନର ଆଲୁଅ ଏଥର ଦୃଶ୍ୟମାନତାକୁ ସାମାନ୍ୟ ବାଧା ଦେଇପାରେ।

ଏହା ବୈଜ୍ଞାନିକମାନଙ୍କ ପାଇଁ ଅଧିକ ଗବେଷଣା କରିବାକୁ ସୁଯୋଗ ଦେବ। କକ୍ଷ ଗଣନା ସୂଚିତ କରେ ଯେ ଏହି ଗ୍ରହାଣୁ ୪୦୦ ବର୍ଷ ମଧ୍ୟରେ ପ୍ରଥମ ଥର ପାଇଁ ପୃଥିବୀର ଏତେ ନିକଟତର ହେଉଛି। ଏହା ୨୧୩୩ ମସିହା ପର୍ଯ୍ୟନ୍ତ ଆଉ ପୃଥିବୀର ଏତେ ନିକଟତର ହେବ ନାହିଁ।

NASA ଏବଂ ESA ଭଳି ମହାକାଶ ସଂସ୍ଥା ଏହି ସୁଯୋଗର ସର୍ବାଧିକ ଉପଯୋଗ କରିବେ। ସେମାନେ ଏହାର ସଠିକ୍ ଆକାର, ଘୂର୍ଣ୍ଣନ ଗତି ଏବଂ ଗଠନ ନିର୍ଣ୍ଣୟ କରିବା ପାଇଁ ରାଡାର ବ୍ୟବହାର କରିବେ। ଏଥିରୁ ସଂଗୃହିତ ତଥ୍ୟ ଭବିଷ୍ୟତରେ ବିପଦପୂର୍ଣ୍ଣ ଗ୍ରହାଣୁଠାରୁ ପୃଥିବୀକୁ ରକ୍ଷା କରିବା ପାଇଁ ପ୍ରଯୁକ୍ତିବିଦ୍ୟା ବିକାଶ କରିବାରେ ସାହାଯ୍ୟ କରିପାରିବ।