ଝାରସୁଗୁଡ଼ା: ମହାନଦୀ ଉପରମୁଣ୍ଡରେ ଜଳସ୍ତର ବୃଦ୍ଧିକୁ ନେଇ ଚିନ୍ତାରେ ଛତିଶଗଡ଼ । ମହାନଦୀ ଉପରମୁଣ୍ଡରେ ପୁଣି ଥରେ ବନ୍ୟା ପରିସ୍ଥିତି ସୃଷ୍ଟି ହେବାର ଆଶଙ୍କା ଦେଖାଦେଇଛି । ଏହାକୁ ଦେଖି ପଡ଼ୋଶୀ ରାଜ୍ୟର ମନ୍ତ୍ରୀ ଓଡ଼ିଶା ସରକାରଙ୍କୁ ହୀରାକୁଦରୁ ଅଧିକ ଗେଟ୍ ଖୋଲିବା ପାଇଁ ଅପିଲ୍ କରିଛନ୍ତି ।

ଛତିଶଗଡ଼ର ରାଜ୍ୟର ରାୟଗଡ଼, ସାରଙ୍ଗଗଡ଼-ବିଲାଇଗଡ଼ ଜିଲ୍ଲାର ସରିଆ ଅଞ୍ଚଳ ଏବଂ ଚନ୍ଦ୍ରପୁର ଆଦି ମହାନଦୀ କୂଳବର୍ତ୍ତୀ ଗାଁଗୁଡ଼ିକରେ କ୍ରମାଗତ ଭାବେ ଜଳସ୍ତର ବୃଦ୍ଧି ପାଉଛି । ଏହି ପରିସ୍ଥିତିକୁ ଦୃଷ୍ଟିରେ ରଖି ଛତିଶଗଡ଼ ମନ୍ତ୍ରୀ ଓ.ପି. ଚୌଧୁରୀ ସୋସିଆଲ୍ ମିଡିଆ ମାଧ୍ୟମରେ ସ୍ଥାନୀୟ ଅଞ୍ଚଳବାସୀଙ୍କୁ ସତର୍କ ରହିବାକୁ ଅପିଲ୍ କରିଛନ୍ତି ।

 

ସେ କହିଛନ୍ତି, ଛତିଶଗଡ଼ ସରକାର ଏବଂ ସମ୍ପୃକ୍ତ ବିଭାଗୀୟ ଅଧିକାରୀମାନେ ଓଡ଼ିଶା ପ୍ରଶାସନ ସହ ନିରନ୍ତର ସମନ୍ୱୟ ରକ୍ଷା କରୁଛନ୍ତି । ମହାନଦୀରେ ଜଳସ୍ତର କମାଇବା ପାଇଁ ହୀରାକୁଦ ଡ୍ୟାମର ଅଧିକରୁ ଅଧିକ ଗେଟ୍ ଖୋଲିବାକୁ ନିବେଦନ କରାଯାଉଛି । ମନ୍ତ୍ରୀ ଓ.ପି.ଚୌଧୁରୀ କହିଛନ୍ତି ଯେ, ଛତିଶଗଡ଼ ସରକାର ପରିସ୍ଥିତି ଉପରେ କ୍ରମାଗତ ନଜର ରଖିଛନ୍ତି । ଯଦି ବନ୍ୟା ପରିସ୍ଥିତି ସୃଷ୍ଟି ହୁଏ, ତେବେ ତାର ମୁକାବିଲା ପାଇଁ ସମସ୍ତ ପ୍ରକାର ପ୍ରସ୍ତୁତି କରାଯାଉଛି । ତେବେ କୂଳବର୍ତ୍ତୀ ଅଞ୍ଚଳର ଲୋକମାନେ ଆଗୁଆ ସଜାଗ ଓ ସତର୍କ ରହିବାକୁ ପରାମର୍ଶ ଦେଇଛନ୍ତି ।