ନୂଆଦିଲ୍ଲୀ ୦୬/୦୮:ଆମେରିକା ରଚିଥିଲା ମୃତ୍ୟୁର ତାଣ୍ଡବ । ଇତିହାସର ସେହି କଳା ଦିନ । ହିରୋସୀମାର କଳା ଦିନକୁ ପୁରିଛି ୮୧ ବର୍ଷ । ଭୟଙ୍କର ଧ୍ବଂସଲୀଲାର ସାକ୍ଷୀ । କଳା ଦିନର ଶୋକ ମନାଉଛନ୍ତି ଜାପାନବାସୀ । ଏ କାହାଣୀ ସେହି ଧ୍ବଂସ ଲୀଳାର । ଯାହା ପୁରା ଦୁନିଆକୁ ଦୋହଲାଇ ଦେଇଥିଲା । ଗୁରୁବାର ପୁରା ଜାପାନବାସୀ ଏହି କଳାଦିନକୁ ମନେ ପକାଇଛନ୍ତି । ହିରୋସୀମାର ଶାନ୍ତି ମେମୋରିଆଲ ପାର୍କରେ ୮୧ ବର୍ଷ ପୂର୍ତ୍ତି ପାଳନ କରାଯାଇଛି । ସମସ୍ତେ ପିନ୍ଧିଥିଲେ କଳା ପୋଷାକ । ଜାପାନ ପ୍ରଧାନମନ୍ତ୍ରୀ ସାନାଏ ଟାକାଇଚିଙ୍କ ପ୍ରତିନିଧିତ୍ବରେ ୧୨୩ଟି ଦେଶର ପ୍ରତିନିଧି ସାମିଲ ହୋଇଥିଲେ । ସ୍ମାରକୀ ସ୍ଥଳରେ ପୁଷ୍ପମାଲ୍ୟ ଅର୍ପଣ କରାଯାଇଥିଲା । ମୃତକଙ୍କ ପାଇଁ ନିରବ ପ୍ରାର୍ଥନା କରାଯାଇଛି । ପରମାଣୁ ଅସ୍ତ୍ର ମୁକ୍ତ ବିଶ୍ବ ଗଠନ ପାଇଁ ପୁଣି ଥରେ ଆହ୍ବାନ କରିଛନ୍ତି ଜାପାନ ପ୍ରଧାନମନ୍ତ୍ରୀ । ଲୋକସଭାରେ ହିରୋସୀମା ଓ ନାଗାସାକି ପୀଡିତଙ୍କୁ ଶ୍ରଦ୍ଧାଞ୍ଜଳି ଦେଇଛନ୍ତି ବାଚସ୍ପତି ଓମ୍ ବିର୍ଲା ।

ସେବେଠାରୁ ଏବେ ଯାଏ କୌଣସି ଯୁଦ୍ଧରେ ପରମାଣୁ ଅସ୍ତ୍ର ବ୍ୟବହାର ହୋଇନି । ଏବେ ଦୁନିଆର କୌଣସି ବି ମହାଶକ୍ତି ପରମାଣୁ ବୋମା ପକାଇବା ପୂର୍ବରୁ ଲକ୍ଷେ ଥର ଚିନ୍ତା କରିବ । କାହିଁକି ନା ସେହି ବୋମାର ପ୍ରଭାବ ୮୧ ବର୍ଷ ପରେ ବି ତାଜା ହୋଇ ରହିଛି । ପ୍ରତିବର୍ଷ ଅଗଷ୍ଟ ୬କୁ ହିରୋସୀମା ଦିବସ ଭାବରେ ପାଳନ କରାଯାଏ । ଏହା ୧୯୪୫ରେ ହୋଇଥିବା ଧ୍ବଂସ ଲୀଳାକୁ ମନେ ପକାଇ ଦିଏ ।

ଏ କାହାଣୀ ଆରମ୍ଭ ହୋଇଥିଲା ଦ୍ବିତୀୟ ବିଶ୍ବଯୁଦ୍ଧରୁ ୧୯୩୯ରୁ । ୧୯୪୫ ଯାଏ ଚାଲିଥିବା ଦ୍ବିତୀୟ ବିଶ୍ବଯୁଦ୍ଧ । ଯେତେବେଳେ ନିର୍ଣ୍ଣାୟକ ମୋଡରେ ପହଞ୍ଚିଥିଲା ଜାପାନର ଆକ୍ରମଣ ଲଗାତାର ଜାରି ରହିଥିଲା । ଜାପାନକୁ ପ୍ରତିହତ କରିବାକୁ ଆମେରିକା ଏପରି ଭୟଙ୍କର ପଦକ୍ଷେପ ନେବ ବୋଲି କେହି କେବେ ଭାବିନଥିଲେ । ଜାପାନର ପଶ୍ଚିମ ସହର ହିରୋସୀମା ଉପରେ ପ୍ରାୟ ସକାଳ ୮ଟା ୧୫ ମିନିଟ ସମୟରେ ପରମାଣୁ ବୋମା ଲିଟିଲ ବୟ ପକାଇଥିଲା ଆମେରିକା । ଏଥିରେ ପ୍ରାୟ ଲକ୍ଷେ ୩୦ ହଜାର ଲୋକଙ୍କର ଜୀବନ ଯାଇଥିଲା । ପରେ ବିକିରଣ ଓ ଆହତ କାରଣରୁ ମୃତକଙ୍କ ସଂଖ୍ୟା ଲକ୍ଷେ ୪୦ ହଜାର ଛୁଇଁଥିଲା ।ଏହାର ଠିକ୍ ୩ଦିନ ପରେ ଅର୍ଥାତ ୯ରେ ଜାପାନର ଆଉ ଏକ ସହର ନାଗାସାକି ଉପରେ ଦ୍ବିତୀୟ ପରମାଣୁ ବୋମା ଫ୍ୟାଟ ମ୍ୟାନ ପକାଇଥିଲା ଆମେରିକା । ସେଥିରେ ପ୍ରାୟ ୭୪ ହଜାର ଲୋକଙ୍କର ଜୀବନ ଯାଇଥିଲା । ଅଗଷ୍ଟ ୧୫ରେ ଜାପାନର ସର୍ତ୍ତ ବିହୀନ ସରେଣ୍ଡର ସହ ଦ୍ବିତୀୟ ବିଶ୍ବଯୁଦ୍ଧର ଅନ୍ତ ହୋଇଥିଲା ।

ସେଦିନ ମରଣ ମୁହଁରୁ ବଞ୍ଚିଯାଇଥିବା କିଛି ଲୋକଙ୍କୁ ହିବାକୁଷ କୁହାଯାଉଥିଲା । ସେମାନଙ୍କୁ ଦୀର୍ଘକାଳୀନ ସ୍ବାସ୍ଥ୍ୟ ସମସ୍ୟା,ମାନସିକ ଆଘାତ ଓସାମାଜିକ କଳଙ୍କ ସହ ଜୁଝି ହେବାକୁ ପଡୁଥିଲା । ହିରୋସୀମା ଦିବସରେ ଦୁନିଆ ସାରା ସ୍ମାରକ ସମାରୋହ ଆୟୋଜନ କରାଯାଏ । ଏହା ବିଶ୍ବର ପ୍ରତିଟି ଦେଶକୁ ପରମାଣୁ ନିରସ୍ତ୍ରୀକରଣ ଓ ବୈଷୟିକ ଶାନ୍ତିର ମହତ୍ତ୍ବପୂର୍ଣ୍ଣ ଅପିଲ ଦିବସ ବି କୁହାଯାଏ । ପରମାଣୁ ଅସ୍ତ୍ରର ବ୍ୟବହାର କେତେ ଭୟଙ୍କର ହୋଇପାରେ ଓ ଏହାର ପ୍ରଭାବ ମାନବ ସମାଜ ପାଇଁ କେତେ କ୍ଷତିକାରକ ତାହା ଏହି ଦିନ ଜଣାଇଥାଏ । ଏଥିସହ ବିଶ୍ବଶାନ୍ତି ପାଇଁ ବି ଆହ୍ବାନ ଦେଇଥାଏ । ଏବେ ଦୁନିଆରେ ୯ଟି ଦେଶ ପାଖରେ ରହିଛି ପରମାଣୁ ବୋମା । ରୁଷିଆ, ଆମେରିକା,ଚୀନ,ଫ୍ରାନ୍ସ,ୟୁକେ,ପାକିସ୍ତାନ,ଭାରତ,ଇସ୍ରାଏଲ ଓ ଉତ୍ତରକୋରିଆ । ତେବେ ଭାରତ ନୋ ଫାଷ୍ଟ ୟୁଜ ନୀତି ପାଳନ କରୁଛି ।

Also Read:ରୋଷେଇ ଗ୍ୟାସରେ ଲାଗିବ ଟ୍ୟାକ୍ସ ! ସରକାରଙ୍କୁ ଦରକାର ୪ ଲକ୍ଷ କୋଟି ଟଙ୍କା, ସାଧାରଣ ଲୋକଙ୍କଠୁ ହେବ ଆଦାୟ