ନୂଆଦିଲ୍ଲୀ ୨୮/୦୪: ଆଧାର, ପାନ୍, ଭୋଟର ଆଇଡି ଏବଂ ଡ୍ରାଇଭିଂ ଲାଇସେନ୍ସ ଆଦିରେ ନାମ, ଠିକଣା, ମୋବାଇଲ ନମ୍ବର ବଦଳାଇବା ଲାଗି ଲୋକଙ୍କୁ ଏବେ ଭିନ୍ନ ଭିନ୍ନ ଅଫିସ୍ ଦୌଡିବାକୁ ପଡିବନି । ୟୁନିଫାଏଡ ଡିଜିଟାଲ ଆଇଡେଣ୍ଟିଟି ସିଷ୍ଟମ ଲାଗୁ କରିବା ଲାଗି ସରକାର ଏବେ ପ୍ରସ୍ତୁତି କରୁଛନ୍ତି । ଏଥିଲାଗି ସ୍ୱତନ୍ତ୍ର ପୋର୍ଟାଲ ପ୍ରସ୍ତୁତ କରାଯାଉଛି । ଏଠାରେ ଗୋଟିଏ ସ୍ଥାନରେ ଲୋକମାନେ ଠିକଣା,ନମ୍ବର ବଦଳାଇ ପାରିବେ । ସମସ୍ତ ଆବଶ୍ୟକୀୟ ପରିଚୟପତ୍ର ଏହା ଦ୍ୱାରା ସିଧାସଳଖ ଅପ୍ଡେଟ ହୋଇଯିବ ।
ଏହି ପୋର୍ଟାଲକୁ ସ୍ୱତନ୍ତ୍ର ଭାବେ ଡିଜାଇନ କରାଯାଉଛି । ଏଥିରେ ଆଧାର, ପାନ୍, ଡ୍ରାଇଭିଂ ଲାଇସେନ୍ସ ଏବଂ ପାସ୍ପୋର୍ଟ ଭଳି ସମସ୍ତ ପରିଚୟପତ୍ରଗୁଡ଼ିକ ଏକାସହ ସଂଯୋଗ ରହିବ । ଅପ୍ଡେଟ୍ ଲାଗି ପୋର୍ଟାଲକୁ ଯାଇ ବିକଳ୍ପ ଚୟନ କରିବାକୁ ପଡ଼ିବ । ମୋବାଇଲ ନମ୍ବର, ଠିକଣା ଭଳି ଭିନ୍ନ ଭିନ୍ନ ବିକଳ୍ପକୁ ଲୋକେ ବାଛିବେ । ଏ ସମ୍ପର୍କିତ ଦସ୍ତାବିଜ ଅପ୍ଲୋଡ୍ କରିବାକୁ ହେବ । ସମସ୍ତ ଦସ୍ତାବିଜ ଗୁଡ଼ିକରେ ପରିବର୍ତ୍ତନ ୩ ଦିନରେ ହୋଇଯିବ ।
ପରିବର୍ତ୍ତନ ପରେ ନୂଆ ପରିଚୟପତ୍ର ହାସଲ କରିବା ଲାଗି ଏହି ପୋର୍ଟାଲରେ ଏକ ବିକଳ୍ପ ରହିବ । ଏଥିଲାଗି ପୋର୍ଟାଲରେ ଶୁଳ୍କ ଦେବା ସହ ଆବେଦନ କରିବାକୁ ହେବ । ୭ କାର୍ଯ୍ୟ ଦିବସରେ ଅପଡେଟ ସହ ପରିଚୟପତ୍ର ଡାକ ଜରିଆରେ ଲୋକଙ୍କ ଘରେ ପହଞ୍ଚିଯିବ । ଯେଉଁମାନେ କାର୍ଯ୍ୟାଳୟ ଯାଇ ପରିଚୟପତ୍ର ନେବାକୁ ଚାହୁଁଛନ୍ତି ସେଥିଲାଗି ମଧ୍ୟ ବିକଳ୍ପ ରହିବ । ବିକଳ୍ପ ଚୟନ କରିବା ପରେ ମୋବାଇଲରେ ଅପଡେଟ ପରିଚୟ ପତ୍ର ପାଇବା ଲାଗି ଦିନ ଏବଂ ସମୟ ସମ୍ପର୍କରେ ଜଣାପଡ଼ିବ ।
ପ୍ରକ୍ରିୟା ସହ ଜଡ଼ିତ କେନ୍ଦ୍ର ସରକାରଙ୍କ ଜଣେ ବରିଷ୍ଠ ଅଧିକାରୀ କହିଛନ୍ତି, ଏହି ସିଷ୍ଟମର ଏବେ ପରୀକ୍ଷଣ କରାଯାଉଛି । ଏଥିରେ ପ୍ରାଥମିକ ପର୍ଯ୍ୟାୟରେ କିଛିଟା ଟେକ୍ନୋଲୋଜି ଏବଂ ଆଇନଗତ ସମସ୍ୟା ରହିଥିଲା । ଏହାର ନିରାକରଣ ଚୂଡାନ୍ତ ପର୍ଯ୍ୟାୟରେ ରହିଛି । ଡାଟା ସମ୍ପୂର୍ଣ୍ଣ ଭାବେ ସୁରକ୍ଷିତ କରିବା ଚ୍ୟାଲେଞ୍ଜ ଥିଲା । ଏ ଦିଗରେ କେନ୍ଦ୍ର ସରକାର ଏବେ କାମ କରୁଛନ୍ତି ।
ଟ୍ରାଏଲ ରନ୍ରେ ୯୦% ସଠିକତା ରହିଛି । ୯୮% ସଠିକତା ପରେ ଏହାକୁ କାର୍ଯ୍ୟକାରୀ କରାଯିବ । ଏହାର କିଛି ମାସ ପରେ ଏହି ପୋର୍ଟାଲକୁ ସାଧାରଣ ଲୋକଙ୍କ ଲାଗି ବ୍ୟବହାର କରାଯିବ । ଏବେ ଯାଏ ଏହି ପୋର୍ଟାଲର କୌଣସି ନାମ ଦିଆଯାଇନାହିଁ । ଚୂଡାନ୍ତ ପରୀକ୍ଷଣ ହେଲା ପରେ ଏହାର ନାମ ଦିଆଯିବ ବୋଲି ସୂଚନା ମିଳିଛି ।
