ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ଏପ୍ରିଲ ୨୨ରେ ଘଟିଥିବା ବର୍ବୋରଚିତ ଆତଙ୍କବାଦୀ ହମଲା ପୂରା ଦେଶକୁ ସ୍ତବ୍ଧ କରି ଦେଇଛି। ଆକ୍ରମଣରେ ୨୬ ପର୍ଯ୍ୟଟକଙ୍କ ମୃତ୍ୟୁ ଘଟିଥିବା ବେଳେ ୧୭ ଜଣ ଆହତ ହୋଇଛନ୍ତି। ଆହତଙ୍କ ଚିକିତ୍ସା ଏବେ ବି ଜାରି ରହିଛି। ଏହା ମଧ୍ୟରେ ଆତଙ୍କୀ ହମଲାର ଗୋଟିଏ ପରେ ଗୋଟିଏ ଭିଡିଓ ସାମ୍ନାକୁ ଆସିବାରେ ଲାଗିଛି। ଏହି କ୍ରମରେ ସୋମବାର ଏକ ସଦ୍ୟତମ ଭିଡିଓ ଭାଇରାଲ୍ ହେବାରେ ଲାଗିଛି।

ଏହି ଭିଡିଓରେ ଜଣେ ପର୍ଯ୍ୟଟକ ବେଶ ଖୁସିରେ ଜିପଲାଇନ ଆଡଭେଞ୍ଚର କରୁଛନ୍ତି। ଏହି ସମୟରେ ଫାୟରିଂ ହେଉଛି। ହେଲେ ଜିପଲାଇନର ମଜା ନେଉଥିବା ପର୍ଯ୍ୟଟକଜଣକ ଏତେ ମଜି ରହିଥିଲେ ଯେ, ଗୁଳି ଶବ୍ଦ ବି ଶୁଣି ପାରି ନଥିଲେ। ସେ ହସି ହସି ନିଜର ଭିଡିଓ ରେକର୍ଡ କରି ଚାଲିଥିଲେ।  ଲୋକେ ପ୍ରାଣ ବିକଳରେ ଏଣେ ତେଣେ ଦୌଡ଼ୁଥିବା ଦେଖିବାକୁ ମିଳିଛି। ତଥାପି ପର୍ଯ୍ୟଟକ ତଳେ କଣ ହେଉଛି କିଛି ଜାଣି ପାରି ନଥିଲେ । 

Also read: ଭାରତର ପହଲଗାମ ପ୍ରତିଶୋଧ ଭୟରେ ଥରିଲା ପାକିସ୍ତାନ: ପାକ୍ ମନ୍ତ୍ରୀ କହିଲେ ଯୁଦ୍ଧ ଏବେ ଆସନ୍ନ, ଆମେ ପ୍ରସ୍ତୁତ

ଭିଡିଓକୁ ନିରିଖେଇ ଦେଖିଲେ ଆତଙ୍କୀ କେମିତି ନୃଶଂସ ଭାବେ ଲୋକଙ୍କୁ ହତ୍ୟା କରୁଛନ୍ତି ତାହା ଦେଖିବାକୁ ମିଳିଛି। ଏହି ସମୟରେ ଗୁଳି ବାଜିବା ପରେ ଜଣେ ପର୍ଯ୍ୟଟକ କେମିତି ଟଳି ପଡୁଛନ୍ତି ତାର ହୃଦୟ ବିଦାରକ ଦୃଶ୍ୟ ବି ଦେଖିବାକୁ ମିଳିଛି। ଆତଙ୍କବାଦୀମାନେ ଦୌଡ଼ି ଦୌଡ଼ି ପର୍ଯ୍ୟଟକଙ୍କୁ ଗୁଳି କରୁଛନ୍ତି ତାର ଚିତ୍ର ବି ଭିଡିଓରେ ସ୍ପଷ୍ଟ ଭାବେ ଦେଖା ଯାଉଛି। 

ଆକ୍ରମଣ ସମୟରେ ଜିପଲାଇନ ଜିପଲାଇନର ମଜା ନେଉଥିବା ବ୍ୟକ୍ତିଙ୍କ ନାଁ ହେଉଛି ଋଷି ଭଟ୍ଟ।  ସେ କହିଛନ୍ତି ଆମେ ପ୍ରାୟ ୧୧ଟାରେ ପହଲଗାମରେ ପହଞ୍ଚିଥିଲୁ। ପାଖାପାଖି ୨ଟାରୁ ୨ଟା ୩୦ ଭିତରେ ଆମେ ଜିପଲାଇନ କରୁଥିଲୁ। ମୋ ଆଗରେ ୭ରୁ ୮ ଜଣ ଲୋକ ଥିଲେ। ମୋ ସହ ମୋ ପରିବାର ବି ଥିଲେ। ବୋଧହୁଏ ଘଟଣା ଦିନ ମୁଁ ଶେଷ ବ୍ୟକ୍ତି ଜିପ ଲାଇନ କରୁଥିଲି। ମୁଁ ଜିପଲାଇନର ମଜା ନେବା ବେଳେ ତଳେ କଣ ଘଟୁଛି ଜାଣି ପାରି ନ ଥିଲି। ମୁଁ ମୋର ଭିଡିଓ ପ୍ରସ୍ତୁତିରେ ମଗ୍ନ ଥିଲି। କିନ୍ତୁ ସ୍ତ୍ରୀର ଚିତ୍କାର ଶୁଣିବା ପରେ ତଳେ ଫାୟରିଂ ହେଉଥିବା ଜାଣିବାକୁ ପାଇଲି। 

ମୁଁ ଜିପଲାଇନକୁ ଅଧାରେ ଅଟକାଇଲି। ସେ ସମୟରେ ମୁଁ ତଳୁ ୧୮ ଫୁଟ୍ ଉଚ୍ଚରେ ଥିଲି। କିନ୍ତୁ ଯେଉଁଠି ଜିପ୍‌ଲାଇନ୍ ସରୁଥିଲା ସେ ପାର୍ଶ୍ଵରୁ ଗୁଳି ଫୁଟୁଥିଲା। ତେଣୁ ମୁଁ ଜିପଲାଇନକୁ ଅଧାରେ ଅଟକାଇ ତଳକୁ ଡେଇଁ ନିଜ ପିଲା ଓ ସ୍ତ୍ରୀକୁ ବଞ୍ଚାଇବାକୁ ଚେଷ୍ଟା କରିଥିଲି। କିଛି ଲୋକ ବୁଦାମୂଳରୁ ଗୁଳି ମାଡ଼ କରୁଥିବା ବେଳେ  ଦୁଇ ଜଣ ଆତଙ୍କବାଦୀ ପଡିଆ ଭିତରେ ନାଁ ପଚାରି ପଚାରି ଗୁଳି କରୁଥିଲେ। ମୋ ପତ୍ନୀଙ୍କଠୁ ୫-୭ ଫୁଟ୍ ଦୂରରେ ଥିବା ଜଣେ ବ୍ୟକ୍ତିଙ୍କୁ ନାଁ ପଚାରି ଆତଙ୍କବାଦୀ ଗୁଳି କରିଥିଲେ। ସେମାନଙ୍କ ଟାର୍ଗେଟ୍‌ରେ କେବଳ ହିନ୍ଦୁ ପୁରୁଷ ଥିଲେ। ପାଖାପାଖି ୧୫ରୁ ୨୦ ମିନିଟ୍ ଧରି ଆତଙ୍କବାଦୀ ନରସଂହାର ଚଳାଇଥିଲେ।