ଦିଗପହଣ୍ଡି ୨୦।୧୧ : ଫୁଲିଲାଣି ନଦୀ । ଲଗାଣ ବର୍ଷା ଓ ବାତ୍ୟାର ପ୍ରଭାବରେ ଧୀରେ ଧୀରେ ବଢ଼ିବାରେ ଲାଗିଛି ଘୋଡ଼ାହାଡ଼ ନଦୀର ଜଳସ୍ତର। ନଦୀରେ ଜଳପ୍ରବାହ ବୃଦ୍ଧି ପାଉଥିବାରୁ ଗଞ୍ଜାମ ଜିଲ୍ଲାର ସାନଖେମୁଣ୍ଡି ଓ ଦିଗପହଣ୍ଡି ଅଞ୍ଚଳର ନଦୀକୂଳିଆ ଲୋକଙ୍କ ମଧ୍ୟରେ ବନ୍ୟା ଆଶଙ୍କା ଦେଖାଦେଇଛି।

ଲଗାଣ ବର୍ଷା ଯୋଗୁଁ ନଦୀର ଜଳପ୍ରବାହ ବଢ଼ୁଥିବା ବେଳେ ନଦୀର ଉଭୟ ପାର୍ଶ୍ୱରେ ରହୁଥିବା ଲୋକେ ଏବେ ଚିନ୍ତାରେ ଅଛନ୍ତି। ବିଶେଷ କରି ନଦୀ ନିକଟବର୍ତ୍ତୀ ଗ୍ରାମଗୁଡ଼ିକରେ ରହୁଥିବା ପରିବାରଙ୍କ ମନରେ ବନ୍ୟାଜଳ ଗ୍ରାମ ମଧ୍ୟକୁ ପ୍ରବେଶ କରିବାର ଭୟ ଘାରିଛି। ସ୍ଥାନୀୟ ଅଞ୍ଚଳରେ ବର୍ଷା ଜାରି ରହିଲେ ଘୋଡ଼ାହାଡ଼ ନଦୀର ଜଳସ୍ତର ଆହୁରି ବୃଦ୍ଧି ପାଇବାର ଆଶଙ୍କା ରହିଛି। ଏପରି ସ୍ଥିତି ଉପୁଜିଲେ ନଦୀକୂଳିଆ ଗ୍ରାମଗୁଡ଼ିକରେ ଜଳ ପ୍ରବେଶ କରିବା ସହ ଜନଜୀବନ ପ୍ରଭାବିତ ହୋଇପାରେ। କେବଳ ଜନବସତି ନୁହେଁ, ନଦୀ ନିକଟବର୍ତ୍ତୀ ଚାଷଜମି ଓ ଗ୍ରାମାଞ୍ଚଳର ରାସ୍ତାଘାଟ ମଧ୍ୟ ବନ୍ୟାଜଳ ଦ୍ୱାରା ପ୍ରଭାବିତ ହେବାର ଆଶଙ୍କା ରହିଛି। ଏହାଦ୍ୱାରା ଚାଷୀଙ୍କ ଫସଲ କ୍ଷତି ହେବା ସହ ଯାତାୟାତରେ ସମସ୍ୟା ଉପୁଜିପାରେ।

Also Read:-ସ୍ଥଳଭାଗ ଅତିକ୍ରମ କରୁଛି ବାତ୍ୟା, ଆହୁରି ୨ ଘଣ୍ଟା ଜାରି ରହିପାରେ ପ୍ରକ୍ରିୟା

ଅନ୍ୟପଟେ ଘୋଡ଼ାହାଡ଼ ନଦୀର ଜଳସ୍ତର ଓ ଜଳପ୍ରବାହ ଉପରେ ନଜର ରଖିବା ସହ ସମ୍ଭାବ୍ୟ ବିପଦକୁ ନେଇ ଆଗୁଆ ସତର୍କ ରହିବା ଜରୁରୀ ହୋଇପଡ଼ିଛି। ନଦୀକୂଳିଆ ଅଞ୍ଚଳର ଲୋକଙ୍କୁ ନଦୀ ନିକଟକୁ ନଯିବା ଏବଂ ଜଳସ୍ତର ବୃଦ୍ଧି ପାଇଲେ ସୁରକ୍ଷିତ ସ୍ଥାନକୁ ଯିବା ପାଇଁ ସତର୍କ ରହିବାକୁ ପରାମର୍ଶ ଦିଆଯାଉଛି। ଆଗାମୀ ସମୟରେ ବର୍ଷାର ପରିମାଣ ଓ ନଦୀର ଜଳପ୍ରବାହ କେଉଁ ରୂପ ନେଉଛି, ତାହା ଉପରେ ଏବେ ସାନଖେମୁଣ୍ଡି ଓ ଦିଗପହଣ୍ଡି ଅଞ୍ଚଳବାସୀଙ୍କ ନଜର ରହିଛି।