ଚେନ୍ନାଇ ୩୦।୧୧: ଘୂର୍ଣ୍ଣିବାତ୍ୟା ‘ଡିଟୱା’ ପ୍ରଭାବରେ ତାମିଲନାଡୁର ବିଭିନ୍ନ ଅଞ୍ଚଳରେ ରବିବାର ବର୍ଷା ଜାରି ରହିଛି। ଏହି ସମୟରେ ବର୍ଷା ସମ୍ପର୍କିତ ଦୁର୍ଘଟଣାରେ ୩ ଜଣଙ୍କ ମୃତ୍ୟୁ ହୋଇଥିବା ଖବର ଆସୁଛି। ପାଣିପାଗ କାର୍ଯ୍ୟାଳୟ ସୂଚନା ଅନୁସାରେ ଆଗାମୀ ୨୪ ଘଣ୍ଟାରେ ଘୂର୍ଣ୍ଣିବାତ୍ୟା ରାଜ୍ୟର ଉତ୍ତର ଉପକୂଳ ଓ ପୁଡିଚେରୀ ସମାନ୍ତରରେ ପହଞ୍ଚିବ। ତାମିଲନାଡୁର କାବେରୀ ଡେଲ୍ଟାରେ ରାମନାଥପୁରମ ଓ ନାଗପଟ୍ଟିନମ ଜିଲ୍ଲାରେ ଭୀଷଣ ବର୍ଷା ଲାଗି ରହିଛି। ଉପକୂଳ ସହର ରାମେଶ୍ୱରମ ଓ ନାଗପଟ୍ଟିନମରେ ଲଗାଣ ବର୍ଷା ଯୋଗୁ ଜନଜୀବନ ଗୁରୁତର ପ୍ରଭାବିତ ହୋଇଛି। କାରଣ ବର୍ଷାରେ ତଳିଆ ଅଞ୍ଚଳରେ ପାଣି ପଶି ଯାଇଛି।

ଆଞ୍ଚଳିକ ପାଣିପାଗ ବିଜ୍ଞାନ ବିଭାଗ ଙ୍କ ତାଜା ବୁଲେଟିନ ଅନୁସାରେ ଘୂର୍ଣ୍ଣିବାତ୍ୟା ଘଣ୍ଟାପ୍ରତି ୭ କିଲୋମିଟର ବେଗରେ ଉତ୍ତର ଦିଗକୁ ବଢୁଛି। ଏହା ଏବେ କୁଡାଲୋରର ପୂର୍ବ-ଦକ୍ଷିଣ-ପୂର୍ବ ଦିଗରେ ୧୦୦ କିଲୋମିଟର ଦୂରରେ ଥିବା ବେଳେ କରାଇକେଲରୁ ୧୦୦ କିଲୋମିଟର ଉତ୍ତରପୂର୍ବ, ବେଦାରଣ୍ୟମରୁ ୧୪୦ କିଲୋମିଟର ଉତ୍ତର-ପୂର୍ବ, ପୁଡୁଚେରୀରୁ ୧୧୦ କିଲୋମିଟର ଦକ୍ଷିଣ ପୂର୍ବ ଓ ଚେନ୍ନାଇରୁ ୧୮୦ କିଲୋମିଟର ଦକ୍ଷିଣ-ଦକ୍ଷିଣ-ପୂର୍ବ ଦିଗରେ କେନ୍ଦ୍ରିତ ରହିଛି। ଏହା ପୂର୍ବରୁ ମଧ୍ୟାହ୍ନରେ ପାଣିପାଗ ବିଭାଗ ପକ୍ଷରୁ ଜାରି ବୁଲେଟିନରେ କୁହାଯାଇଥିଲା ଯେ ଉତ୍ତର ତାମିଲନାଡୁ ଓ ପୁଡୁଚେରୀ ଉପକୂଳରୁ ଘୂର୍ଣ୍ଣିବାତ୍ୟାର କେନ୍ଦ୍ର ସ୍ଥଳ ଦୂରତା ୭୦ କିଲୋମିଟର ରହିଛି। ଆଗାମୀ ୨୪ ଘଣ୍ଟାରେ ଏହା ଉତ୍ତର ତାମିଲନାଡୁ ଓ ପୁଡୁଚେରୀ ଉପକୂଳ ସମାନାନ୍ତରରେ ଉତ୍ତରକୁ ବଢିବାର ପ୍ରବଳ ସମ୍ଭାବନା ରହିଛି। ଉତ୍ତରଦିଗକୁ ଗତି କରି ଘୂର୍ଣ୍ଣିବାତ୍ୟା କ୍ରମଶଃ ଅବପାତରେ ପରିଣତ ହେବ।

 

ରାଜ୍ୟ ରାଜସ୍ୱ ଓ ବିପର୍ଯ୍ୟୟ ପ୍ରବନ୍ଧନ ମନ୍ତ୍ରୀ କେ.କେ.ଏସ.ଏସ୍.ଆର ରାମଚନ୍ଦ୍ରନ କହିଛନ୍ତି ଯେ ଘୂର୍ଣ୍ଣିବାତ୍ୟା ଓ ବର୍ଷା ସମ୍ପର୍କିତ ଘଟଣାରେ ରାଜ୍ୟରେ ଏ ପର୍ଯ୍ୟନ୍ତ ୩ ଜଣଙ୍କ ମୃତ୍ୟୁ ହୋଇଛି। ଏଥିରେ ଟୁଟିକୋରିନ ଓ ତାଞ୍ଜାଭୁରୁରେ କାନ୍ଥ ପଡିବା ଯୋଗୁ ୨ ଜଣଙ୍କ ମୃତ୍ୟୁ ହୋଇଥିବା ବେଳେ ମଇଲାଦୁଥରାଇରେ ବିଦ୍ୟୁତ ଆଘାତରେ ଜଣେ ୨୦ ବର୍ଷ ବୟଷ୍କ ଯୁବକର ମୃତ୍ୟୁ ହୋଇଛି। ମନ୍ତ୍ରୀ କହିଛନ୍ତି ଯେ ଡେଲ୍ଟା ଜିଲ୍ଲାରେ ୧୪୯ ଗୃହପାଳିତ ପଶୁଙ୍କ ମୃତ୍ୟୁ ହୋଇଛି। ସେହିପରି ୫୭,୦୦୦ କୃଷିଭୂମି ପ୍ରଭାବିତ ହୋଇଛି।