କୋଲକାତା: ଆଗାମୀ ବକ୍ରି ଇଦ୍ (ଈଦ୍-ଉଲ୍-ଅଜ୍‌ହା) ପୂର୍ବରୁ ପଶୁ ବଳି ଏବଂ ଗୋ-ହତ୍ୟା ନିୟନ୍ତ୍ରଣକୁ ନେଇ କଲିକତା ହାଇକୋର୍ଟ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ପଶୁ ସମ୍ପଦ ରୋକିବା ପାଇଁ ପଶ୍ଚିମବଙ୍ଗ ସରକାର ଜାରି କରିଥିବା ନୂଆ ନିର୍ଦ୍ଦେଶନାମା ଉପରେ ରୋକ୍ ଲଗାଇବାକୁ ହାଇକୋର୍ଟ ମନା କରିଦେଇଛନ୍ତି। ଏହା ସହିତ କୋର୍ଟ ସ୍ପଷ୍ଟ କରିଛନ୍ତି ଯେ, ସର୍ବସାଧାରଣ ସ୍ଥାନରେ ଗୋ-ହତ୍ୟା ସମ୍ପୂର୍ଣ୍ଣ ନିଷେଧ ଏବଂ ଗୋ-ବଳି ଦେବା ଇସଲାମ ଧର୍ମର କୌଣସି ଅପରିହାର୍ଯ୍ୟ ଧାର୍ମିକ ଆବଶ୍ୟକତା ନୁହେଁ।

ମୁଖ୍ୟ ବିଚାରପତି ସୁଜୟ ପାଲ୍ ଏବଂ ବିଚାରପତି ପାର୍ଥ ସାରଥୀ ସେନଙ୍କୁ ନେଇ ଗଠିତ ଏକ ଡିଭିଜନ ବେଞ୍ଚ ଗୁରୁବାର ଦିନ ଏହି ସମ୍ପର୍କିତ ଏକାଧିକ ଜନସ୍ୱାର୍ଥ ମାମଲା (PIL) ଏବଂ ଆବେଦନର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି। ସରକାରଙ୍କ ଗାଇଡ ଲାଇନକୁ ଚ୍ୟାଲେଞ୍ଜ କରି ତୃଣମୂଳ କଂଗ୍ରେସ (TMC) ବିଧାୟକ ଆଖରୁଜମାନ ଏବଂ ସାଂସଦ ମହୁଆ ମୋଇତ୍ରାଙ୍କ ସମେତ କିଛି ମୁସଲିମ ସଂଗଠନ ଓ ଗୋ-ବ୍ୟବସାୟୀ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।

Also Read- Abhijeet Dipke: ଦିଲ୍ଲୀରେ ପହଞ୍ଚିବା ମାତ୍ରେ ମତେ ତିହାର ଜେଲ୍ ନେଇଯିବେ: କକରୋଚ୍ ଜନତା ପାର୍ଟି ପ୍ରତିଷ୍ଠାତା ଅଭିଜିତ ଦୀପକେଙ୍କୁ ଘାରିଲା ଗିରଫ ଭୟ

କୋର୍ଟଙ୍କ ପ୍ରମୁଖ ନିର୍ଦ୍ଦେଶ ଓ ସ୍ପଷ୍ଟୀକରଣ:

ନିଷେଧାଦେଶ ଜାରି: କୋର୍ଟ ପଶ୍ଚିମବଙ୍ଗ ସରକାରଙ୍କୁ ସେମାନଙ୍କର ବିଜ୍ଞପ୍ତିରେ ସ୍ପଷ୍ଟ ଭାବେ ଦୁଇଟି ନୂଆ ବିନ୍ଦୁ ଯୋଡ଼ିବାକୁ ନିର୍ଦ୍ଦେଶ ଦେଇଛନ୍ତି। ପ୍ରଥମତଃ, ଖୋଲା ସର୍ବସାଧାରଣ ସ୍ଥାନ, ରାସ୍ତାକଡ଼ କିମ୍ବା ବଜାରରେ ଗାଈ ଏବଂ ମଇଁଷିଙ୍କ ଭଳି କୌଣସି ପଶୁଙ୍କୁ ହତ୍ୟା ବା ବଳି ଦିଆଯାଇପାରିବ ନାହିଁ। ଦ୍ୱିତୀୟତଃ, 'ମହମ୍ମଦ ହନିଫ୍ କୁରେଶୀ ବନାମ ବିହାର ସରକାର' ମାମଲାରେ ସୁପ୍ରିମକୋର୍ଟଙ୍କ ପୂର୍ବ ରାୟକୁ ଆଧାର କରି କୋର୍ଟ କହିଛନ୍ତି ଯେ ଇଦ୍ ପର୍ବରେ ଗୋ-ବଳି ଦେବା ଇସଲାମର କୌଣସି ଅପରିହାର୍ଯ୍ୟ ଅଙ୍ଗ ନୁହେଁ।

ସରକାରୀ ନିୟମରେ ହସ୍ତକ୍ଷେପ କରିବାକୁ ମନା: ଗତ ମେ ୧୩ ତାରିଖରେ ପଶ୍ଚିମବଙ୍ଗ ସରକାର ପଶ୍ଚିମବଙ୍ଗ ପଶୁ ହତ୍ୟା ନିୟନ୍ତ୍ରଣ ଆଇନ, ୧୯୫୦ ଅଧୀନରେ ଏକ ନୋଟିସ୍ ଜାରି କରିଥିଲେ। ଏହା ଅନୁସାରେ ୧୪ ବର୍ଷରୁ କମ୍ ବୟସର କିମ୍ବା ସମ୍ପୂର୍ଣ୍ଣ ସୁସ୍ଥ ଥିବା ଗାଈ, ବଳଦ, ବାଛୁରୀ ଓ ମଇଁଷିଙ୍କୁ ହତ୍ୟା କରାଯାଇପାରିବ ନାହିଁ। କେବଳ ବାର୍ଦ୍ଧକ୍ୟ, ଆଘାତ ବା ରୋଗ୍ୟ ବ୍ୟାଧି କାରଣରୁ ଅକ୍ଷମ ହୋଇପଡ଼ିଥିବା ପଶୁଙ୍କୁ ଡାକ୍ତରୀ ପ୍ରମାଣପତ୍ର (Fit Certificate) ମିଳିବା ପରେ ହିଁ ପ୍ରଶାସନ ଅନୁମୋଦିତ କସେଇଖାନାରେ ହତ୍ୟା କରାଯାଇପାରିବ। ହାଇକୋର୍ଟ ଏହି ସରକାରୀ ବିଜ୍ଞପ୍ତିକୁ କାଏମ ରଖିଛନ୍ତି।

Also Read- ବିଜେପିକୁ ନେଇ Axis MY India ମୁଖ୍ୟଙ୍କ ଭବିଷ୍ୟବାଣୀ, କହିଲେ-ରହିବ ଆଉ ଏତିକି ବର୍ଷ

ଆବେଦନକାରୀଙ୍କ ଯୁକ୍ତି କଣ ଥିଲା?

ଟିଏମସି ସାଂସଦ ମହୁଆ ମୋଇତ୍ରାଙ୍କ ପକ୍ଷରୁ ହାଜର ହୋଇଥିବା ବରିଷ୍ଠ ଆଇନଜୀବୀ ଶାଦାନ ଫରାସତ ଯୁକ୍ତି ବାଢ଼ିଥିଲେ ଯେ, ଇସଲାମରେ ବକ୍ରି ଇଦ୍ ଅବସରରେ କେବଳ ସୁସ୍ଥ ପଶୁଙ୍କର ହିଁ 'କୁରବାନୀ' (ବଳି) ଦିଆଯାଏ। ସରକାରଙ୍କ ନିୟମ ଅନୁସାରେ କେବଳ ବୁଢ଼ା ଓ ଅକ୍ଷମ ପଶୁଙ୍କୁ କାଟିବାକୁ ଅନୁମତି ମିଳୁଥିବାରୁ ଏହା ଦ୍ୱାରା ଧାର୍ମିକ ରୀତିନୀତି ବାଧାପ୍ରାପ୍ତ ହେବ ଏବଂ ଗ୍ରାମୀଣ ଅର୍ଥନୀତି ଉପରେ ଏହାର ଖରାପ ପ୍ରଭାବ ପଡ଼ିବ। ଆବେଦନକାରୀମାନେ ସରକାରଙ୍କ ଆଇନର ଧାରା ୧୨ ଅନୁସାରେ ପର୍ବ ପାଇଁ ସ୍ୱତନ୍ତ୍ର ଛାଡ଼ ଦେବାକୁ ଦାବି କରିଥିଲେ।

ତେବେ ଅଦାଲତ ଏହି ସମସ୍ତ ଯୁକ୍ତିକୁ ଗ୍ରହଣ ନକରି ସ୍ପଷ୍ଟ କରିଛନ୍ତି ଯେ ୨୦୧୮ ମସିହାରେ ହାଇକୋର୍ଟ ଦେଇଥିବା ନିର୍ଦ୍ଦେଶକୁ ହିଁ ସରକାର ଚଳିତ ବର୍ଷ ଲାଗୁ କରିଛନ୍ତି, ଯାହା ଆଇନଗତ ଭାବେ ସମ୍ପୂର୍ଣ୍ଣ ବୈଧ। କୋର୍ଟଙ୍କ ଏହି ଆଦେଶ ପରେ ଚଳିତ ବର୍ଷ ବେଙ୍ଗଲରେ କେବଳ ପ୍ରଶାସନ ଦ୍ୱାରା ନିର୍ଦ୍ଧାରିତ ସ୍ଥାନରେ ଏବଂ ସରକାରୀ ନିୟମ ମାନି ହିଁ ପଶୁ ବଳି ଦିଆଯାଇପାରିବ।