ବିପର୍ଯ୍ୟୟ ପାଇଁ ବେଆଇନ ଗଛକଟାକୁ ଦାୟୀ କଲେ ସୁପ୍ରିମକୋର୍ଟ, ଜବାବ ରଖିବାକୁ ୩ ରାଜ୍ୟର ସରକାରଙ୍କୁ କଲେ ନୋଟିସ୍‌

ନୂଆଦିଲ୍ଲୀ: ବିଭିନ୍ନ ରାଜ୍ୟରେ ହୋଇଥିବା ଭୟଙ୍କର ଭୂସ୍ଖଳନ ଏବଂ ବନ୍ୟାକୁ ଗୁରୁତର ସହ ନେଇଛନ୍ତି ସୁପ୍ରିମକୋର୍ଟ। ଏହି ମାମଲାରେ କେନ୍ଦ୍ର ସରକାର, NDMA ଏବଂ ଅନ୍ୟମାନଙ୍କୁ ନୋଟିସ୍ ଜାରି କରିଛନ୍ତି କୋର୍ଟ। ବିପର୍ଯ୍ୟୟ ପାଇଁ ପ୍ରମୁଖ କାରଣ ବେଆଇନ ଗଛକଟାକୁ ଦାୟୀ କରିଛନ୍ତି ଟପ୍‌ କୋର୍ଟ। ହିମାଚଳ ପ୍ରଦେଶ, ଉତ୍ତରାଖଣ୍ଡ ଏବଂ ଜମ୍ମୁ ଏବଂ କାଶ୍ମୀର ଭଳି ରାଜ୍ୟରେ ବେଆଇନ ଗଛ କାଟିବା ଯୋଗୁଁ ବିପର୍ଯ୍ୟୟ ଘଟିଛି। କୋର୍ଟ ଏକ ଆବେଦନର ଶୁଣାଣି କରି ଏହି ମନ୍ତବ୍ୟ ଦେଇଛନ୍ତି ଯେଉଁଥିରେ ବେଆଇନ ଗଛ କାଟିବା ଏପରି ବିପର୍ଯ୍ୟୟର ଏକ ପ୍ରମୁଖ କାରଣ ଭାବରେ ଦର୍ଶାଯାଇଛି।

ପ୍ରଧାନ ବିଚାରପତି ବି.ଆର. ଗଭାଇ ଏବଂ ବିଚାରପତି କେ. ବିନୋଦ ଚନ୍ଦ୍ରନଙ୍କ ଖଣ୍ଡପୀଠ କେନ୍ଦ୍ର ପରିବେଶ, ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ ମନ୍ତ୍ରଣାଳୟ, ଭାରତୀୟ ଜାତୀୟ ରାଜପଥ ପ୍ରାଧିକରଣ (NHAI) ସହିତ ହିମାଚଳ ପ୍ରଦେଶ, ଉତ୍ତରାଖଣ୍ଡ, ଜମ୍ମୁ ଏବଂ କାଶ୍ମୀର ଏବଂ ପଞ୍ଜାବ ସରକାରଙ୍କୁ ନୋଟିସ୍ ଜାରି କରିଛନ୍ତି। ଖଣ୍ଡପୀଠ ଅନାମିକା ରାଣାଙ୍କ ଦ୍ୱାରା ଦାଖଲ କରାଯାଇଥିବା ଆବେଦନକୁ ଦୁଇ ସପ୍ତାହ ପରେ ଶୁଣାଣି ପାଇଁ ତାଲିକାଭୁକ୍ତ କରିଛନ୍ତି ଏବଂ ସଲିସିଟର ଜେନେରାଲ ତୁଷାର ମେହେଟ୍ଟାଙ୍କୁ ସଂଶୋଧନମୂଳକ ପଦକ୍ଷେପ ସୁନିଶ୍ଚିତ କରିବାକୁ କହିଛନ୍ତି।

ପ୍ରଧାନବିଚାରପତି କହିଛନ୍ତି, 'ଆମେ ଉତ୍ତରାଖଣ୍ଡ, ହିମାଚଳ ପ୍ରଦେଶ ଏବଂ ପଞ୍ଜାବରେ ଅଭୂତପୂର୍ବ ଭୂସ୍ଖଳନ ଏବଂ ବନ୍ୟା ଦେଖୁଛୁ। ଗଣମାଧ୍ୟମ ରିପୋର୍ଟରୁ ଜଣାପଡିଛି ଯେ ବନ୍ୟାରେ ବିପୁଳ ପରିମାଣର କାଠ ଭାସିଯାଇଛି। ପ୍ରଥମ ଦୃଷ୍ଟିରୁ ଏହା ଜଣାପଡୁଛି ଯେ ଗଛଗୁଡ଼ିକ ବେଆଇନ ଭାବରେ କଟାଯାଇଛି। ତେଣୁ, ପ୍ରତିପକ୍ଷଙ୍କୁ ନୋଟିସ ଜାରି କରନ୍ତୁ। ଦୁଇ ସପ୍ତାହ ମଧ୍ୟରେ ଉତ୍ତର ରଖିବାକୁ କୁହାଯାଇଛି।