ନୂଆଦିଲ୍ଲୀ: ବ୍ରିଟେନ୍ରେ ବର୍ତ୍ତମାନ କ୍ୟୁଆର କୋଡ୍ ଠକେଇ ବହୁଳ ମାତ୍ରା ହେଉଛି। ସେଠାକାର ସାଧାରଣ ଲୋକ ସାଇବର ଅପରାଧୀଙ୍କ ଜାଲରେ ପଡ଼ି ଲକ୍ଷ ଲକ୍ଷ ଟଙ୍କା ହରାଉଛନ୍ତି। ଯାହାକୁ କ୍ୟୁଆର୍ କ୍ୱିଶିଂ କିମ୍ବା କ୍ୟୁଆର୍ ଫିସିଂ ବୋଲି କୁହାଯାଉଛି।
ଅପରାଧୀମାନେ ସଠିକ୍ କୋଡ୍ ଉପରେ ନିଜର କ୍ୟୁଆର୍ କୋଡ୍ ଲଗାଇ ଲୋକଙ୍କଠାରୁ ଟଙ୍କା ଏବଂ ଗୁରୁତ୍ୱପୂର୍ଣ୍ଣ ସୂଚନା ଚୋରି କରି ନେଉଛନ୍ତି। ଏଭଳି ଠକାମୀ ବର୍ଷ ବର୍ଷ ଧରି ଜାରି ରହିଛି। ଜଣେ କି ଦୁଇ ଜଣ ନୁହେଁ ଏଥିପାଇଁ ପୂରା ଗ୍ୟାଙ୍ଗ କାମ କରୁଛି। ୨୦୨୪ ଏହି ପ୍ରକାର ଠକେଇ ଅଧିକ ବୃଦ୍ଧି ପାଇଛି।
ବ୍ରିଟେନ୍ର ଜାତୀୟ ଠକେଇ ରିପୋର୍ଟିଂ କେନ୍ଦ୍ର ଆକ୍ସନ୍ ଫ୍ରଡ୍ ଅନୁଯାୟୀ, ଗତ ବର୍ଷ ମୋଟ ୧,୩୮୬ ଜଣ ଏଭଳି ଠକେଇର ଶିକାର ହୋଇଥିଲେ। ହେଲେ ୨୦୧୯ରେ ଏହି ସଂଖ୍ୟା ମାତ୍ର ୧୦୦ ଥିଲା। ତେଣୁ ବ୍ରିଟେନ୍ରେ କ୍ୟୁଆର୍ କ୍ୱିଶିଂ ମାମଲା ବଢ଼ିବାରେ ଲାଗିଛି। ବିବିସି ରିପୋର୍ଟ ଅନୁସାରେ ୨୦୨୩ ରୁ ୨୦୨୪ ମଧ୍ୟରେ ୟୁକେରେ ଏଭଳି ଠକେଇ ଦ୍ୱିଗୁଣିତ ହୋଇଛି।
ପଢନ୍ତୁ- ଫିକା ପଡ଼ୁଛି ଲଣ୍ଡନର ଚମକ: ସହର ଛାଡ଼ି ପଳାଉଛନ୍ତି କୋଟିପତି,ଧନୀଙ୍କୁ ଆକର୍ଷଣ କରୁଛି ଏସିଆ ଓ ଆମେରିକା
କ୍ୟୁଆର "କ୍ୱିସିଂ" ଠକେଇ କ'ଣ?
ଏଭଳି ଠକେଇ ଜଣେ କି ଦୁଇ ଜଣ ନୁହେଁ, ପୂରା ଗ୍ୟାଙ୍ଗ ମିଳି ମିଶି କରିଥାଏ। ଲୋକମାନେ ସାଧାରଣତଃ ଯେଉଁ ସବୁ ଜିନିଷ ପାଇଁ କଣ୍ଟାକ୍ଟ ଲେସ୍ ପେମେଣ୍ଟର ଉପଯୋଗ କରନ୍ତି ସେହିସବୁ ସ୍ଥାନଗୁଡ଼ିକୁ ଏହି ଠକମାନେ ଟାର୍ଗେଟ୍ କରନ୍ତି। ଯେମିତି ପାର୍କିଂ ମିଟର୍ସ, ହୋଟେଲ,ରେଷ୍ଟୁରାଣ୍ଟ ଆଦି ସ୍ଥାନ।
ଠକମାନେ ଏହିସବୁ ସ୍ଥାନଗୁଡ଼ିକରେ ଲାଗିଥିବା କ୍ୟୁଆର କୋଡ୍ ଉପରେ ନିଜର ନକଲି କ୍ୟୁଆର୍ କୋଡ୍ ଲଗାଇଛନ୍ତି। ଯେତବେଳେ ଗ୍ରାହକ ନକଲି କ୍ୟୁଆର୍ କୋଡ୍ରେ ପେମେଣ୍ଟ କରନ୍ତି ସେତେବେଳେ ପଇସା ସହିତ ଠକଙ୍କ ପାଖକୁ ସେମାନଙ୍କର ସମସ୍ତ ବ୍ୟକ୍ତିଗତ ସମ୍ବଦନଶୀଳ ସୂଚନା ବି ଚାଲିଯାଇଥାଏ।
ତେବେ ସମସ୍ୟା କେବଳ ଏତିକିରେ ସରିନଥାଏ। ଏଭଳି ପେମେଣ୍ଟରେ ଯେହେତୁ ଲୋକମାନଙ୍କ ଖାତାରୁ ଅଳ୍ପ ଟଙ୍କା କଟେ, ସେଥିପାଇଁ ଅଧିକାଂଶ କ୍ଷେତ୍ରରେ ସେମାନେ ପୁଲିସରେ ମାମଲା କରନ୍ତି ନାହିଁ। ଯାହାର ସୁଯୋଗ ନେଇ ଠକ ପୁଣିଥରେ ଗ୍ରାହକଙ୍କୁ ଆଉ ଏକ ନୂଆ ଶୈଳୀରେ ଠକିବାକୁ ଚେଷ୍ଟା କରେ।
ଠକମାନେ କିଛି ଦିନ ପରେ ପୀଡିତଙ୍କୁ ଫୋନ୍ କରି ନିଜକୁ ପୁଲିସ ଅଫିସର କିମ୍ବା ବ୍ୟାଙ୍କ କର୍ମଚାରୀ ବୋଲି ପରିଚୟ ଦିଅନ୍ତି। ଏବଂ ପୀଡ଼ିତକୁ ସାଇବର ଠକେଇର ଶିକାର ହୋଇଛନ୍ତି ବୋଲି କୁହନ୍ତି। ଯେହେତୁ କ୍ୟୁଆର୍ କୋଡ୍ ମାଧ୍ୟମରେ ସେମାନଙ୍କ ପାଖକୁ ସମସ୍ତ ସୂଚନା ଆଗୁଆ ପହଞ୍ଚି ଯାଇଥାଏ, ତେଣୁ ସେମାନେ ଠକେଇର ପୂରା ତାରିଖ ଓ ସମୟ ବି ପୀଡ଼ିତକୁ ବତାଇ ଦିଅନ୍ତି।
ସାଧାରଣ ଲୋକଙ୍କୁ ଏଥିରେ ବିଶ୍ୱାସ କରିବା ପରେ ସେମାନେ ସହଯୋଗ କରି ଟଙ୍କା ଫେରାଇ ଆଣିବେ ବୋଲି ପ୍ରତିଶ୍ରୁତି ଦିଅନ୍ତି, ଏବଂ ତାଙ୍କ ଠାରୁ ସବୁ ଗୁରୁତ୍ୱପୂର୍ଣ୍ଣ ସୂଚନା ମାଗି ନିଅନ୍ତି। ତାଙ୍କ କହିବା ମୁତାବକ ପୀଡ଼ିତ ସବୁ ସୂଚନା ଦେଇସାରିବା ପରେ ତାଙ୍କ ଆକାଉଣ୍ଟରୁ ସବୁ ଟଙ୍କା ଗାୟବ ହୋଇଯାଇଥାଏ।
ତେବେ ଏଭଳି ଘଟଣା ବ୍ରିଟେନରେ ବଢିବାରେ ଲାଗିଛି। ତେଣୁ ସାଧାରଣ ଲୋକେ ଏଥିପ୍ରତି ସତର୍କ ରହୁନ୍ତୁ ଓ ଛୋଟ ଘଟଣାଟିଏ ହେଲେ ବି ପୁଲିସକୁ ରିପୋର୍ଟ କରିବାକୁ ବ୍ରିଟେନ ପୁଲିସ ସୂଚନା ଦେଇଛି। ତେବେ ଭାରତରେ ମଧ୍ୟ ଏଭଳି ଅନେକ ଠକେଇର ଉଦାହରଣ ଦେଖିବାକୁ ମିଳେ।
