ୟୁରୋପୀୟ ସଂଘ ନେତାଙ୍କ ସହ ମିଳିତ ଭାବେ ଫୋନ କଲରେ କଥା ହେଲେ ପ୍ରଧାନମନ୍ତ୍ରୀ: ୟୁକ୍ରେନ ଯୁଦ୍ଧ ଓ ମୁକ୍ତ ବାଣିଜ୍ୟ ଚୁକ୍ତି ନେଇ ହେଲା ଆଲୋଚନା

ନୂଆଦିଲ୍ଲୀ: ଭାରତ ଓ ୟୁରୋପିୟନ ୟୁନିୟନ ସହିତ ବାଣିଜ୍ୟିକ ସମ୍ପର୍କ ନେଇ ସମୀକ୍ଷା କରିଛନ୍ତି  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ମଙ୍ଗଳବାର ପ୍ରଧାନମନ୍ତ୍ରୀ ମୋଦୀ ୟୁରୋପୀୟ ପରିଷଦର ସଭାପତି ଆଣ୍ଟୋନିଓ କୋଷ୍ଟା ଏବଂ ୟୁରୋପୀୟ କମିଶନର ଅଧ୍ୟକ୍ଷ ଉର୍ସୁଲା ଭନ୍ ଡେର୍ ଲେଏନଙ୍କ ସହ ମିଳିତ ଭାବେ ଟେଲିଫୋନ୍ କଲରେ ଆଲୋଚନା କରିଥିଲେ।

ଆଲୋଚନା ବେଳେ ନେତାମାନେ ବାଣିଜ୍ୟ, ପ୍ରଯୁକ୍ତିବିଦ୍ୟା, ନିବେଶ, ନବସୃଜନ, ସ୍ଥିରତା, ପ୍ରତିରକ୍ଷା, ସୁରକ୍ଷା ଏବଂ ଯୋଗାଣ ଶୃଙ୍ଖଳ ସ୍ଥିରତା ସମେତ ବିଭିନ୍ନ ପ୍ରମୁଖ କ୍ଷେତ୍ରଗୁଡ଼ିକରେ ହୋଇଥିବା ପ୍ରଗତିକୁ ସ୍ୱାଗତ କରିଥିଲେ। ୩ ନେତା ଭାରତ-ୟୁରୋପୀୟ ସଂଘ ମୁକ୍ତ ବାଣିଜ୍ୟ ଚୁକ୍ତିନାମା (FTA) ର ଶୀଘ୍ର ସମାପ୍ତି ଏବଂ IMEEC କରିଡର କାର୍ଯ୍ୟକାରୀ କରିବା ପ୍ରତି ସେମାନଙ୍କର ପ୍ରତିବଦ୍ଧତାକୁ ପୁଣି ଥରେ ଦୋହରାଇଥିଲେ। ଆଲୋଚନା ବେଳେ ପ୍ରଧାନମନ୍ତ୍ରୀ ମୋଦି ପରବର୍ତ୍ତୀ ଭାରତ-ଇୟୁ ଶିଖର ସମ୍ମିଳନୀ ପାଇଁ ଉଭୟ ନେତାଙ୍କୁ ଭାରତକୁ ନିମନ୍ତ୍ରଣ କରିଛନ୍ତି।

ଏହି ଫୋନ ଯୋଗେ ଆଲୋଚନା ବେଳେ ୩ ନେତା ୟୁକ୍ରେନରେ ସଂଘର୍ଷର ସମାପ୍ତି ପାଇଁ ପ୍ରୟାସ ସମେତ ଗୁରୁତ୍ୱପୂର୍ଣ୍ଣ ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ମଧ୍ୟ ମତ ବିନିମୟ କରିଥିଲେ। ପ୍ରଧାନମନ୍ତ୍ରୀ ମୋଦୀ ଶାନ୍ତିପୂର୍ଣ୍ଣ ସମାଧାନ ଏବଂ ସ୍ଥିରତା ପୁନଃସ୍ଥାପନ ପାଇଁ ଭାରତର ଦୃଢ଼ ସମର୍ଥନକୁ ଦୋହରାଇଥିଲେ।

ସେହିପରି ଭାରତ-ୟୁରୋପୀୟ ସଂଘ ରଣନୈତିକ ସହଭାଗୀତାକୁ ସୁଦୃଢ଼ ​​କରିବା ପାଇଁ ଘନିଷ୍ଠ ଭାବେ ଯୋଗାଯୋଗରେ ରହିବାକୁ ଉଭୟ ପକ୍ଷ ସହମତ ହୋଇଛନ୍ତି। ଏହା ସମାନ ଗଣତାନ୍ତ୍ରିକ ମୂଲ୍ୟବୋଧ ଏବଂ ବିଶ୍ୱ ଶାନ୍ତି ଏବଂ ସମୃଦ୍ଧି ପାଇଁ ଏକ ସାଧାରଣ ଦୃଷ୍ଟିକୋଣ ବୋଲି ନେତାମାନେ କହିଛନ୍ତି।  

ସେପଟେ ଟ୍ରମ୍ପ ଟାରିଫ ଦ୍ୱାରା ଚାପ ପକାଇବାକୁ ଚେଷ୍ଟା କରୁଥିବା ବେଳେ ଏପଟେ ଭାରତ ରଣନୈତିକ ଭାବରେ ଆମେରିକାକୁ ବିଶ୍ୱରୁ ବିଛିନ୍ନ କରୁଛି। ଆମେରିକାର ସବୁବେଳେ ନିକଟତର ଥିବା ୟୁରୋପିୟନ ୟୁନିୟନ ଏବେ ଭାରତ ସହିତ ମୁକ୍ତ ବାଣିଜ୍ୟ ଚୁକ୍ତି କରିବାକୁ ଉତ୍ସୁକତା ଦେଖାଇବା ଟ୍ରମ୍ପଙ୍କ ପାଇଁ ଚିନ୍ତାର କାରଣ ପାଲଟିପାରେ। ​​​​​​​