ପାଟନା ୨୯।୧୧: ରାଷ୍ଟ୍ରୀୟ ଜନତା ଦଳ (ଆରଜେଡି) ବିହାର ପ୍ରଦେଶ ଅଧ୍ୟକ୍ଷ ମଙ୍ଗନୀଲାଲ ମଣ୍ଡଲ ଶନିବାର ବିଧାନସଭା ନିର୍ବାଚନରେ ମହାଗଠବନ୍ଧନ (ଏମଜିବି)ର ପରାଜୟ ପାଇଁ କଂଗ୍ରେସକୁ ଦାୟି କରିଛନ୍ତି। ସେ କହିଛନ୍ତି ଯେ ଯଦି କଂଗ୍ରେସ ଏମଜିବି ଛାଡି ଦିଏ ଓ ଭବିଷ୍ୟତରେ ଅଲଗା ନିର୍ବାଚନ ଲଢିବାକୁ ନିଷ୍ପତ୍ତି କରେ ତେବେ ତାଙ୍କ ପାର୍ଟି ଏହାକୁ ସ୍ୱାଗତ କରିବ। ସେ ଶନିବାର ପାଟନାସ୍ଥିତ ଆରଜେଡି କାର୍ଯ୍ୟାଳୟରେ ନିର୍ବାଚନ ପରବର୍ତ୍ତି ସମୀକ୍ଷା ବୈଠକ ଶେଷରେ ଗଣମାଧ୍ୟମ ସହ ଆଲୋଚନାରେ ଏହା କହିଛନ୍ତି।

ତାଙ୍କର ଏହି ଟିପ୍ପଣୀ ରାଜ୍ୟରେ କଂଗ୍ରେସ ନେତାମାନଙ୍କ ବୟାନର ଅନେକ ପରେ ଆସିଛି। କଂଗ୍ରେସ ନେତାମାନେ ସେମାନଙ୍କ ପ୍ରାର୍ଥୀଙ୍କ ଦୟନୀୟ ପରାଜୟ ପାଇଁ ନିର୍ବାଚନରେ ଆରଜେଡିର ସହଯୋଗ ଅଭାବକୁ ଦାୟୀ କରୁଥିଲେ। ମଣ୍ଡଳ କହିଛନ୍ତି ଯେ ଆମ ପାର୍ଟିର କାର୍ଯ୍ୟକର୍ତ୍ତା ଆରମ୍ଭରୁ ଏମଜିବି ସପକ୍ଷରେ ନଥିଲେ। ଏହା ସତ୍ତ୍ୱେ ତେଜସ୍ୱୀ ଯାଦବ ବିଶାଳ ହୃଦୟ ଦେଖାଇ ମେଣ୍ଟରେ କଂଗ୍ରେକୁ ୬୧ଟି ଆସନ ଦେଇଥିଲେ। ହେଲେ କଂଗ୍ରେସ ଜିଦ୍ ରେ ଆସି କେତେକ ସ୍ଥାନରେ ଆମ ପ୍ରାର୍ଥୀଙ୍କ ବିରୋଧରେ ପ୍ରାର୍ଥୀ ଛିଡା କରିଥିଲା। ଫଳରେ ଭୋଟ ବାଣ୍ଟି ହୋଇଯାଇଥିଲା।

ସେ କହିଛନ୍ତି ଯେ କଂଗ୍ରେସକୁ ଯାହା ବି ଆସନ ମିଳିଛି ତାହା ଆରଜେଡି ସମର୍ଥନ ଯୋଗୁ ମିଳିଛି। ମଣ୍ଡଳ କହିଛନ୍ତି ଯେ ଆରଜେଡି ବିନା କଂଗ୍ରେସର ପ୍ରଦର୍ଶନ ଆହୁରି ଦୟନିୟ ହୋଇଥାନ୍ତା। ୨୦୨୦ ବିଧାନସଭା ନିର୍ବାଚନରେ ମଧ୍ୟ କଂଗ୍ରେସକୁ ଆରଜେଡି ଯୋଗୁ ୧୯ଟି ସିଟ୍ ମିଳିଥିଲା। ସେ କହିଛନ୍ତି ଯେ ଯଦି କଂଗ୍ରେସ ପାର୍ଟି ଅଲଗା ନିର୍ବାଚନ ଲଢିବାକୁ ଚାହିଁବ ତେବେ ବହୁତ ଭଲ ହେବ। ସେ କହିଛନ୍ତି ଯେ ଆମେ ଏହାକୁ ସ୍ୱାଗତ କରିବୁ। ଥରେ ସେମାନେ ଏକାକୀ ଲଢିଲେ ସେମାନଙ୍କ ସାମର୍ଥ୍ୟ ନିଜେ ଜାଣିଯିବେ। କେହି କାହାକୁ ଜୋର ଜବରଦସ୍ତ ବାନ୍ଧିକି ରଖି ପାରିବେନି। ଆରଜେଡି ସମୀକ୍ଷା ବୈଠକରେ ପାର୍ଟିର ବିଧାୟକ, ବିଧାନପରିଷଦ ସଦସ୍ୟ ଓ ଗତ ନିର୍ବାଚନରେ ପରାସ୍ତ ହୋଇଥିବା ପ୍ରାର୍ଥୀ ଯୋଗ ଦେଇଥିଲେ। ବୁଧବାର ଆରମ୍ଭ ହୋଇଥିବା ଏହି ବୈଠକ ଡିସେମ୍ବର ୪ ତାରିଖ ପର୍ଯ୍ୟନ୍ତ ଚାଲିବ।

ମଣ୍ଡଳ ଏହା ବି କହିଛନ୍ତି ଯେ ‘ନିର୍ବାଚନ ନିରପେକ୍ଷ ନଥିଲା’। ସେ କହିଛନ୍ତି ଯେ ବିଜେପି ଖୋଲାଖୋଲି ପଇସା ଖେଳ ଖେଳିଥିଲା ଓ ଭାରତୀୟ ନିର୍ବାଚନ ଆୟୋଗ(ଇସିଆଇ) ଆଖି ବନ୍ଦ କରିଦେଇଥିଲେ। ଏହା ସତ୍ତ୍ୱେ ଆମକୁ ୧ କୋଟିରୁ ଅଧିକ ଭୋଟ ମିଳିଛି। ଏଣୁ ନୈତିକ ରୂପେ ଆମେ ବିଜେତା। ସେପଟେ ମଣ୍ଡଳଙ୍କ ବୟାନରେ କଂଗ୍ରେସ ନେତାମାନେ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି। ପ୍ରଦେଶ କଂଗ୍ରେସ ମୁଖପାତ୍ର ଅସିତ ନାଥ ତିୱାରୀ ଆଶ୍ଚର୍ଯ୍ୟ ପ୍ରକାଶ କରି କହିଛନ୍ତି ଯେ ଯଦି ଆରଜେଡିର ଇଛା ନଥିଲା ତେବେ କଂଗ୍ରେସ ସହ ମେଣ୍ଟ କରିଥିଲା କାହିଁକି?ତିୱାରୀ କହିଛନ୍ତି ଯିଏ ସିଟ୍ ଭିକ ମାଗୁଥିଲେ ସେମାନେ ଏବେ ଆମ ଉପରେ ଆରୋପ ଲଗାଉଛନ୍ତି।