ଗ୍ରାମାଞ୍ଚଳରେ ଲୋକଙ୍କ ଘରେ ରହିବେ ପର୍ଯ୍ୟଟକ, କାର୍ଯ୍ୟକାରୀ ହେବ ହୋମଷ୍ଟେ ଏଷ୍ଟାବ୍ଲିସମେଣ୍ଟ ଯୋଜନା

ଭୁବନେଶ୍ୱର: ଗ୍ରାମାଞ୍ଚଳରେ ଲୋକଙ୍କ ଘରେ ରହିବେ ପର୍ଯ୍ୟଟକ । ଓଡ଼ିଶା ହୋମଷ୍ଟେ ଏଷ୍ଟାବ୍ଲିସମେଣ୍ଟ ଯୋଜନା ୨୦୨୫କୁ କାର୍ଯ୍ୟକାରୀ କରିବାକୁ ପର୍ଯ୍ୟଟନ ବିଭାଗର ଅନ୍ୟ ବିଭାଗକୁ ନିର୍ଦେଶ । ହୋମ ଷ୍ଟେ ପ୍ରତିଷ୍ଠା ପାଇଁ ଅଢେଇ ଲକ୍ଷରୁ ଦଶ ଲକ୍ଷ ପର୍ଯ୍ୟନ୍ତ ପ୍ରୋତ୍ସାହନ ରାଶି ଦେବେ ସରକାର । ଗ୍ରାମାଞ୍ଚଳରେ ପର୍ଯ୍ୟଟନ କ୍ଷେତ୍ରର ବିକାଶ ସହିତ ଗାଁ ଲୋକମାନେ ରୋଜଗାରକ୍ଷମ ହୋଇପାରିବେ ।

ରାଜ୍ୟରେ ପର୍ଯ୍ୟଟନ ଶିଳ୍ପକୁ ପ୍ରୋତ୍ସାହନ ଦେବାକୁ ନୂଆ ପଦକ୍ଷେପ । କାର୍ଯ୍ୟକାରୀ ହେବ ଓଡ଼ିଶା ହୋମଷ୍ଟେ ଏଷ୍ଟାବ୍ଲିସମେଣ୍ଟ ଯୋଜନା ୨୦୨୫ । ଯୋଜନା ପାଇଁ ୨୦୨୫ରୁ ୨୦୩୦, ଅର୍ଥାତ୍ ୫ ଆର୍ଥିକ ବର୍ଷ ଲାଗି ୫୦ କୋଟି ଟଙ୍କାର ବଜେଟ୍ ରଖାଯାଇଛି । ଓଡ଼ିଶାର ଗ୍ରାମୀଣ ଏବଂ କମ ଜଣାଶୁଣା ପର୍ଯ୍ୟଟନସ୍ଥଳୀରେ ହୋମଷ୍ଟେ ରହଣୀକୁ ପ୍ରୋତ୍ସାହିତ କରିବା ଯୋଜନାର ଉଦ୍ଦେଶ୍ୟ । ଏହାଦ୍ହାରା ପର୍ଯ୍ୟଟନରେ ଗ୍ରାମାଞ୍ଚଳ ଲୋକଙ୍କ ଭାଗିଦାରୀ ବଢିବ, ସ୍ଥାନୀୟ ନିଯୁକ୍ତି ସୃଷ୍ଟି ହେବ । ପର୍ଯ୍ୟଟକମାନେ ସ୍ଥାନୀୟ ସଂସ୍କୃତି ସଂପପର୍କରେ ଜାଣିବା ସହ ଗ୍ରାମୀଣ ଅନଭୂତି ପାଇପାରିବେ । ଯୋଜନା ଅଧୀନରେ ପ୍ରାୟ ୪୫୦ ନୂତନ ହୋମେ ଷ୍ଟେ’ରେ ୧୮୦୦ ଶଯ୍ୟା ପାଇଁ ଯୋଜନା ରହିଛି । ନୂତନ ଗୃହ ନିବାସ ୟୁନିଟ୍ ନିର୍ମାଣ ପାଇଁ ଯୋଗ୍ୟ ହିତାଧିକାରୀଙ୍କୁ ଆର୍ଥିକ ପ୍ରୋତ୍ସାହନ ମିଳିବ । ପର୍ଯ୍ୟଟନ ବିଭାଗର ଅତିରିକ୍ତ ସଚିବ ଏନେଇ ବିଭିନ୍ନ ବିଭାଗଗୁଡ଼ିକୁ ଚିଠି ଲେଖିଛନ୍ତି ।

ହୋମେ ଷ୍ଟେ ଯୋଜନାରେ କେଉଁମାନେ ସାମିଲ ହୋଇପାରିବେ ? ଗ୍ରାପଞ୍ଚାୟତର ଯେକୌଣସି ବାସିନ୍ଦା, ୧୮ବର୍ଷରୁ ଅଧିକ ବୟସର ହୋଇଥିବା । ବୈଧ ପରିଚୟ ପତ୍ର ଥିବ । ଆଇନ ଅନୁଯାୟୀ ଦୋଷୀ ସାବ୍ୟସ୍ତ ହୋଇ ନଥିବେ । ସରକାରୀ କର୍ମଚାରୀ ହୋଇନଥିବେ । ଆବେଦନକାରୀଙ୍କର ଜମି ମାଲିକାନା ନେଇ ବୈଧ ଲିଜ୍ ବା ଚୁକ୍ତିନାମା ରହିଥିବ । ପ୍ରତ୍ୟେକ ଯୋଗ୍ୟ ହୋମଷ୍ଟେ ଆବେଦନକାରୀ, ଜମିର ମୂଲ୍ୟ ବାଦ ଦେଇ ସ୍ଥାୟୀ ପୁଞ୍ଜି ନିବେଶର ୫୦ ପ୍ରତିଶତ ପର୍ଯ୍ୟନ୍ତ ଏକକାଳୀନ ଆର୍ଥିକ ପ୍ରୋତ୍ସାହନ ପାଇପାରିବେ । ଗୋଟିଏ କଠୋରୀ ପିଛା ଅଢେଇ ଲକ୍ଷ ଟଙ୍କା ହିସାବରେ ସର୍ବାଧିକ ୪ଟି ହୋମଷ୍ଟେ ପାଇଁ ସର୍ବାଧିକ ୧୦ ଲକ୍ଷ ଟଙ୍କା ପାଇବା ବ୍ୟବସ୍ଥା କରିଛନ୍ତି ରାଜ୍ୟ ସରକାର । ଏହାଦ୍ୱାରା ଗ୍ରାମାଞ୍ଚଳରେ ଲୋକଙ୍କ ଆର୍ଥିକ ଅଭିବୃଦ୍ଧି ହୋଇପାରିବ ।

ଜିଲ୍ଲା ପ୍ରଶାସନ ଏବଂ ପର୍ଯ୍ୟଟନ ବିଭାଗ ଦ୍ୱାରା ହୋମଷ୍ଟେ ଯୋଜନା କାର୍ଯ୍ୟକାରୀ କରାଯିବ । ଏଥିପାଇଁ ରହିବ ଦୁଇଟି କମିଟି, ରାଜ୍ୟ ସ୍ତରରେ ରାଜ୍ୟସ୍ତରୀୟ ହୋମଷ୍ଟେ କମିଟି ଏବଂ ଜିଲ୍ଲା ସ୍ତରରେ ଜିଲ୍ଲାସ୍ତରୀୟ ହୋମଷ୍ଟେ କମିଟି ଗଠନ ହେବ ।