ନୂଆଦିଲ୍ଲୀ, ୨୮/୦୮ : ନେପାଳରେ ଅଚାନକ ଆସିଥିବା ବନ୍ୟା ଯେଭଳି ବିପର୍ଯ୍ୟୟ ଆଣିଛି ବିନାଶକାରୀ ଶବ୍ଦ ତା ପାଇଁ କମ୍ ହେବ । ପ୍ରକୃତିର ପ୍ରକୋପ ନିକଟରେ ମଣିଷ କେବଳ ଅସହାୟ ହେବା ଛଡା ଆଉ କିଛି ନୁହେଁ । ଯାହା ନେପାଳ ବନ୍ୟା ପ୍ରମାଣିତ କରିଦେଇଛି। ଏଭଳି ସ୍ଥିତିରେ ପ୍ରଶାସନ ଭୋଟେକୋଶୀ ନଦୀରେ ପୁଣି ବନ୍ୟା ଆସିବାର ଆଶଙ୍କା ପ୍ରକାଶ କରି ସତର୍କ ସୂଚନା ଜାରି କରିଛି। ସେହିଭଳି ବିଶେଷଜ୍ଞଙ୍କ କହିବାନୁଯାୟୀ ବିପଦ ସମ୍ପୂର୍ଣ ଭାବେ ଯାଇନାହିଁ । ଆଗାମୀ ଦିନରେ ପୁଣି ବନ୍ୟା ଆସିବାର ଆଶଙ୍କାକୁ ଏଡାଇ ଦିଆଯାଇନପାରେ।

ବିଶେଷଜ୍ଞମାନେ ଚେତାବନୀ ଦେଇ କହିଛନ୍ତି ଯେ ଏଭଳି ଘଟଣା ପୁଣିଥରେ ଘଟିପାରେ । ସେଥିପାଇଁ ପ୍ରାକ୍-ପ୍ରସ୍ତୁତି ଓ ସମୟ ପୂର୍ବରୁ ଜରୁରି ଭିଭିଭୂମି ବ୍ୟବସ୍ଥାକୁ ମଜଭୁତ କରିବାର ଆବଶ୍ୟକତା ରହିଛି। ନେପାଳର ପାଣିପାଗ ବିଶେଷଜ୍ଞ ଡକ୍ଟର ନୀରା ଶ୍ରେଷ୍ଠ ପ୍ରଧାନଙ୍କ କହିବାନୁଯାୟୀ ଯେଉଁ ଅଞ୍ଚଳ ବନ୍ୟାରେ କ୍ଷତିଗ୍ରସ୍ତ ହୋଇଛି ତାହା ବର୍ତ୍ତମାନ ସମ୍ପୂର୍ଣ ସୁରକ୍ଷିତ ବୋଲି କୁହାଯାଇପାରିବ ନାହିଁ । ନେପାଳରେ ଅଚାନକ ଏତେବଡ ବିପର୍ଯ୍ୟୟ କିଭଳି ଆସିଲା ତାହା ଉପରେ ବୈଜ୍ଞାନିକ ଓ ଗବେଷକମାନେ ଅନୁସନ୍ଧାନ ଜାରି ରଖିଛନ୍ତି।

ବିଶେଷଜ୍ଞଙ୍କ କହିବାନୁଯାୟୀ ଏହା ପଛରେ ଅନେକ ସମ୍ଭାବନା ରହିଛି । ପ୍ରଥମ ସମ୍ଭାବନା ହେଲା ପାହାଡର ଚଟାଣ କିମ୍ବା ବରଫର ବଡ ଅଂଶ ଖସି ନଦୀରେ ପଡିଛି। ଫଳରେ କିଛି ସମୟ ପାଇଁ ନଦୀର ବାଟ ବନ୍ଦ ହୋଇଛି ଓ ପାଣି ଜମା ହୋଇଯାଇଛି। ପରେ ସେହି ବାଟ ଭାଙ୍ଗିଯିବାରୁ ହଠାତ୍ ବନ୍ୟା ଆସିଛି। ସେହିଭଳି ଦ୍ଵିତୀୟ ସମ୍ଭାବନା ଭାବେ ସେମାନେ କହିଛନ୍ତି ଯେ ହିମହ୍ରଦ ବିସ୍ଫୋରଣ ଯୋଗୁ ଏଭଳି ବନ୍ୟା ଆସିଥାଇପାରେ। ପାହାଡ ଉପରେ ବରଫ ହ୍ରଦରେ ପ୍ରଚୁର ପରିମାଣର ପାଣି ଜମି ରହିଥାଇପାରେ। କୌଣସି କାରଣରୁ ହଠାତ୍ ହ୍ରଦ ଭାଙ୍ଗିଯିବାରୁ ପାହାଡ ଉପରୁ ପ୍ରଖର ବେଗରେ ବିପୁଳ ପରିମାଣର ପାଣି ତଳକୁ ଆସିଥାଇପାରେ।

ଉପଗ୍ରହ ଚିତ୍ରରୁ ଦେଖାଯାଇଛି କି ବନ୍ୟା ଆସିଥିବା ଅଞ୍ଚଳର ଉପରି ଭାଗରେ ୩ଟି ହିମହ୍ରଦ ରହିଛି। ବୈଜ୍ଞାନିକମାନେ ଆଶଙ୍କା ବ୍ୟକ୍ତ କରୁଛନ୍ତି ଯେ ସେହି ହ୍ରଦରୁ ଏଭଳି ବନ୍ୟାପାଣି ଆସି ନାହିଁ ତ। ବୈଜ୍ଞାନିକମାନେ ଏକଥା ମଧ୍ୟ ସ୍ବୀକାର କରିଛନ୍ତି ଯେ ବୁଧବାର ଯେଉଁ ସମୟରେ ଏହି ବନ୍ୟା ଆସିଲା ଠିକ୍ ସେହି ସମୟରେ ତିବତରେ ୪.୪ ତୀବ୍ରତାର ଭୂକମ୍ପ ହୋଇଥିଲା । ଡକ୍ଟର ପ୍ରଧାନଙ୍କ ଅନୁସାରେ ଏହି ଭୂକମ୍ପ ହିଁ ବନ୍ୟାର ହୁଏତ ଏକ କାରଣ ହୋଇଥାଇପାରେ। କିନ୍ତୁ ଏହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ଏହା ଉପରେ ଅନୁସନ୍ଧାନ ଏବେ ବି ଜାରି ରହିଛି। ନେପାଳର ଅଧିକାଂଶ ନଦୀ ଉଚ୍ଚ ପାହାଡାରୁ ବାହାରିଛି। ସେହି କାରଣରୁ ନେପାଳକୁ ଅଚାନକ ବନ୍ୟା, ଭୂସ୍ଖଳନ ଓ ହିମହ୍ରଦ ସହ ଜଡିତ ବିପର୍ଯ୍ୟୟର ସାମ୍ନା କରିବାକୁ ପଡ଼ୁଛି ।

କୋଏଲିସନ ଫର ଡିଜାଷ୍ଟର ରେଜିଲିଏନ୍ସ ଇନଫ୍ରାଷ୍ଟ୍ରକଚରର ବିଶେଷଜ୍ଞ ରାମରାଜ ନରସିହ୍ନ ନେପାଳ ବନ୍ୟାକୁ ଅତ୍ୟନ୍ତ ଅସ୍ବାଭାବିକ ବୋଲି କହିଛନ୍ତି। ତାଙ୍କ ଅନୁଯାୟୀ ଏହି ବନ୍ୟା ଅଚାନକ ଓ ବହୁଶୀଘ୍ର ନିଜର କରାଳ ରୂପ ଦେଖାଇଥିଲା। ଯାହାଫଳରେ ଲୋକଙ୍କୁ ସତର୍କ କରାଇବାର ସୁଯୋଗ ମିଳିନଥିଲା। ସେ କହିଛନ୍ତି ପାହାଡରୁ ଆସିଥିବା ନଦୀର ଉପରି ଭାଗରେ ହୁଏତ ଏବେ ବି ଅବରୋଧ ରହିଥାଇପାରେ। ଯଦି ସେହି ଅବରୋଧ ଭାଙ୍ଗିଯିବ ତେବେ ପୁଣିଥରେ ପ୍ରଚଣ୍ଡ ବନ୍ୟା ଆସିବାର ସମ୍ଭାବନା ରହିଛି।

Also Read :- ଆଜି ବର୍ଷର ଶେଷ ଚନ୍ଦ୍ରଗ୍ରହଣ, ଜାଣନ୍ତୁ ଭାରତରେ ଦେଖାଯିବ କି ନାହିଁ ?

ସାଧାରଣତଃ ବର୍ଷା ଯୋଗୁ ବନ୍ୟା ଆଶଙ୍କା ଥିବାରୁ ପୂର୍ବରୁ ଲୋକଙ୍କୁ ସୂଚୀତ କରାଯାଏ । ଫଳରେ ଲୋକଙ୍କୁ ସୁରକ୍ଷିତ ସ୍ଥାନକୁ ଯିବା ଲାଗି ସମୟ ମିଳେ। କିନ୍ତୁ ନେପାଳରେ ଘଟିଥିବା ଏହି ଘଟଣା ଭିନ୍ନ ଥିଲା। ନେପାଳ ବନ୍ୟାକୁ ବୁଝିବାକୁ ହେଲେ ଏହାପଛରେ ରହିଥିବା ବୈଜ୍ଞାନିକ କାରଣକୁ ଜାଣିବା ନିହାତି ଜରୁରି। ଏଭଳି ଘଟଣାରେ କିଛି ଅଘଟଣ ପୂର୍ବରୁ ଚେତାବନୀ ଦେବା କିମ୍ବା ଲୋକଙ୍କୁ ସତର୍କ କରାଇବା ପାଇଁ ସମୟ ନଥାଏ I କିମ୍ବା ଯଦି ଥାଏ ବହୁତ କମ୍। ସେଥିପାଇଁ କେବଳ ଚେତାବନୀ ପ୍ରଣାଳୀ ଉପରେ ନିର୍ଭର କରିବା ବଦଳରେ ଏହାର ମୁକାବିଲା ଲାଗି ପ୍ରସ୍ତୁତି ଓ ଭିଭିଭୂମି ବ୍ୟବସ୍ଥାକୁ ଅଧିକ ସୁଦୃଢ଼ କରଯିବାର ଆବଶ୍ୟକତା ରହିଛି ।