ନୂଆଦିଲ୍ଲୀ: କୋଭିଡ୍ ମହାମାରୀ ପରେ ବିଭିନ୍ନ ଦେଶର କମ୍ପାନୀମାନେ ଆଉ ଚୀନ ଉପରେ ନିର୍ଭରଶୀଳ ହେବାକୁ ଚାହୁଁ ନାହାନ୍ତି। ଏଥିପାଇଁ କମ୍ପାନୀମାନେ ବର୍ତ୍ତମାନ ଚୀନ ପ୍ଲସ୍ ୱାନ୍ ରଣନୀତି ଉପରେ ଗୁରୁତ୍ୱ ଦେଉଛନ୍ତି। ଅର୍ଥାତ୍ ଚୀନ ସହିତ ଅନ୍ୟ ଏକ ଦେଶରେ ନିଜ ବ୍ୟବସାୟର ହବ୍ କରିବାକୁ ଲକ୍ଷ୍ୟ ରଖୁଛନ୍ତି। ଠିକ୍ ଯେମିତି ଜାପାନୀ କମ୍ପାନୀ।
ଜାପାନର କମ୍ପାନୀଗୁଡ଼ିକ ମଧ୍ୟ ଚୀନ୍ ଉପରେ ନିର୍ଭରଶୀଳତା ହ୍ରାସ କରିବା ପାଇଁ ସେମାନଙ୍କର ଉତ୍ପାଦନ ଏବଂ ଯୋଗାଣ ଶୃଙ୍ଖଳାରେ ବିବିଧତା ଆଣିବାକୁ 'ଚୀନ ପ୍ଲସ୍ ୱାନ୍' ରଣନୀତି ଉପରେ କାମ କରୁଛନ୍ତି। ଏବଂ ସେମାନଙ୍କ ଆଖି ବର୍ତ୍ତମାନ ଭାରତ ଉପରେ ରହିଛି। ଭାରତ ହିଁ ଚୀନର ବିକଳ୍ପ ହୋଇପାରିବ ବୋଲି ଜାପାନ କମ୍ପାନୀମାନେ ଚିନ୍ତା କରୁଥିବା ସଫ୍ଟୱୟାର କମ୍ପାନୀ ଡେଲୋଇଟ୍ର ଏକ୍ସପର୍ଟ କହିଛନ୍ତି। ଏନେଇ ଇକୋନୋମିକ୍ସ ଟାଇମ୍ସରେ ଖବର ପ୍ରକାଶ ପାଇଛି।
ଡେଲୋଇଟ୍ ଜାପାନର ସିଇଓ କେନିଚି କିମୁରା କହିଛନ୍ତି "କୋଭିଡ୍ ପରେ, ଜାପାନୀ କମ୍ପାନୀଗୁଡ଼ିକ ବଡ଼ ସକ୍ରିୟ ଭାବରେ ଚୀନ୍ ପ୍ଲସ୍ ସପ୍ଲାଏ ଚେନ୍ ରଣନୀତିର ସନ୍ଧାନରେ ଲାଗି ପଡ଼ିଛନ୍ତି। ଆଉ ଏପଟେ ଭାରତ ଏକ ପ୍ରମୁଖ ଆକର୍ଷଣୀୟ ସ୍ଥଳ ଭାବେ ଉଭା ହୋଇଛି। କିଛି କମ୍ପାନୀ ଚୀନରୁ ଜାପାନକୁ ଫେରି ଯାଇଥିବା ବେଳେ, ଅନ୍ୟମାନେ ଭାରତକୁ କେବଳ ଏକ ଉତ୍ପାଦନ କେନ୍ଦ୍ର ଭାବରେ ନୁହେଁ, ବରଂ ମଧ୍ୟପ୍ରାଚ୍ୟ ଏବଂ ଆଫ୍ରିକା ଭଳି ହାଇ ଗ୍ରୋଥ୍ ମାର୍କେଟ୍ର ପ୍ରବେଶ ଦ୍ୱାର ଭାବରେ ଦେଖୁଛନ୍ତି।"
ଯଦିଓ ଭାରତ ବିଶ୍ୱର ଏକ ବିଶାଳ ବଜାର ଭାବେ ବ୍ୟବସାୟୀଙ୍କ ଦୃଷ୍ଟି ଆକର୍ଷଣ କରୁଛି। ତଥାପି ଏହାର ସୁବ୍ୟବସ୍ଥିତ ବ୍ୟାପାର ଓ ନେଟୱର୍କ ଏହାକୁ ଆହୁରି ଆକର୍ଷଣ କରୁଛି। ଏନେଇ କିମୁରା କହିଛନ୍ତି "ଯଦିଓ ଜାପାନୀ ବ୍ୟବସାୟଗୁଡ଼ିକ ଏପର୍ଯ୍ୟନ୍ତ ଏହି ସମ୍ଭାବନାକୁ ସମ୍ପୂର୍ଣ୍ଣ ଭାବରେ ବ୍ୟବହାର କରିପାରି ନାହାନ୍ତି। ତଥାପି ଆମେ ଭାରତକୁ କେବଳ ଏକ ବଜାର ଭାବରେ ନୁହେଁ, ବରଂ ଏକ ଗୁରୁତ୍ୱପୂର୍ଣ୍ଣ ଯୋଗାଣ ଶୃଙ୍ଖଳ କେନ୍ଦ୍ର ଭାବରେ ଦେଖୁଛୁ ଯାହା ଆଞ୍ଚଳିକ ଏବଂ ବିଶ୍ୱସ୍ତରୀୟ ସଫଳତା ଆଣିପାରିବ।"
ସେପଟେ ଅନ୍ୟ ଦେଶର କମ୍ପାନୀଙ୍କ ଅପେକ୍ଷା ଜାପାନ କମ୍ପାନୀଗୁଡ଼ିକ ଭାରତରେ ଅଧିକ ନିବେଶ କରୁଛନ୍ତି। ଜାପାନ ଏଫ୍ଡିଆଇରେ ଭାରତ ଚୀନକୁ ବି ପଛରେ ପକାଇ ଦେଇଛି ବୋଲି ଜାପାନ ବାହ୍ୟ ବାଣିଜ୍ୟ ସଂଗଠନ(JETRO) କହିଛି। ଜାପାନରୁ ଚୀନକୁ ବିଦେଶୀ ପ୍ରତ୍ୟକ୍ଷ ନିବେଶ (FDI) ପେମେଣ୍ଟ ଆଧାରରେ ବାଲାନ୍ସରେ ଉଲ୍ଲେଖନୀୟ ହ୍ରାସ ଘଟିଛି। ୨୦୧୨ରେ ୧୩ ବିଲିୟନ ଆମେରିକୀୟ ଡଲାର ରୁ ୨୦୨୩ ରେ ଏହା ପ୍ରାୟ ୩ ବିଲିୟନ ଆମେରିକୀୟ ଡଲାର ରେ ପହଞ୍ଚିଛି। ଅନ୍ୟପଟେ ଭାରତରେ ଜାପାନୀ ଏଫଡିଆଇରେ ନିରନ୍ତର ବୃଦ୍ଧି ଘଟିଛି। ୨୦୨୩ରେ ଏହା ୬ ବିଲିୟନ ଡଲାରରେ ପହଞ୍ଚିଛି। ଫଳରେ ପ୍ରଥମ ଥର ପାଇଁ ଭାରଚ ଜାପାନ ଏଫ୍ଡିଆଇରେ ଚୀନକୁ ପଛରେ ପକାଇ ଦେଇଛି।
୨୦୦୦ ରୁ ୨୦୨୪ ମଧ୍ୟରେ, ଜାପାନ ଭାରତ ପାଇଁ ବିଦେଶୀ ପୁଞ୍ଜିର ଏକ ପ୍ରମୁଖ ଉତ୍ସ ଭାବରେ ନିଜର ସ୍ଥିତି ବଜାୟ ରଖିଛି। ଦୁଇ ଦଶନ୍ଧି ଧରି ଭାରତୀୟ ଅର୍ଥନୀତିରେ ପ୍ରାୟ ୪୪ ବିଲିୟନ ଆମେରିକୀୟ ଡଲାର ପରିଚାଳନା କରିଛି ଜାପାନ। ଭାରତରେ ନିବେଶ କରୁଥିବା ରାଷ୍ଟ୍ରମାନଙ୍କ ମଧ୍ୟରେ, କ୍ରମାଗତ ଏଫଡିଆଇ ପ୍ରବାହ ଦୃଷ୍ଟିରୁ ଜାପାନ ପଞ୍ଚମ ସ୍ଥାନ ଅଧିକାର କରିଛି ବୋଲି ଡେଲୋଇଟ୍ ଜାପାନର ସିଇଓ କେନିଚି କିମୁରା କହିଛନ୍ତି।
