ଭୁବନେଶ୍ବର ୧୨।୧୧:ବିଶ୍ବ ପ୍ରସିଦ୍ଧ କଟକ ବାଲିଯାତ୍ରାର ଅବଧି ଆଉ ଗୋଟିଏ ଦିନ ବୃଦ୍ଧି ହୋଇଛି । ବାଲିଯାତ୍ରା ଅବଧି ଆଉ ଗୋଟିଏ ବଢ଼ାଇବା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି । ଫଳରେ ନଭେମ୍ବର ୧୨ ତାରିଖ ଅର୍ଥାତ ବୁଧବାର ଶେଷ ହେବାକୁ ଥିବା କଟକ ବାଲିଯାତ୍ରା ନଭେମ୍ବର ୧୩ ତାରିଖ ଅର୍ଥାତ ଗୁରୁବାର ଉଦ୍‌ଯାପିତ ହେବ । ବାଲିଯାତ୍ରା ପ୍ରତି ସାଧାରଣ ଲୋକଙ୍କ ଆକର୍ଷଣ ଓ ଆଗ୍ରହ ତଥା ମେଳାରେ ବ୍ୟବସାୟୀ ମାନଙ୍କ କାରବାରକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ ଏହାର ଅବଧି ବୃଦ୍ଧି କରିଛନ୍ତି ।

ଐତିହାସିକ କଟକ ବାଲିଯାତ୍ରାର ଆକର୍ଷଣରେ ଯୋଡି ହୋଇଛି ଆଉ ଗୋଟିଏ ଫର୍ଦ୍ଦ । ଚଳିତ ବର୍ଷ ବାଲିଯାତ୍ରାକୁ ଆହୁରି ଆକର୍ଷଣୀୟ କରିବା ପାଇଁ ଦୁଃସାହସିକ ଜଳକ୍ରୀଡା ବା ଫ୍ଲାଏ  ବୋଟ୍ ଶୋ’ ଆରମ୍ଭ ହୋଇଛି । ଏହାସହ ମହାନଦୀର ଗଡଗଡିଆ ଘାଟରେ ଜାତୀୟ ସ୍ତରୀୟ ମହାନଦୀ ବୋଟ୍ ରେସ୍ ଆରମ୍ଭ ହୋଇଛି । ଏଭଳି ଆୟୋଜନ ଓଡ଼ିଶାର ନୌଚାଳନା ଖେଳକୁ ନୂଆ ଦିଗ ଦେବା ସହ ପର୍ଯ୍ୟଟନ ଓ ବାଲିଯାତ୍ରାକୁ ଆହୁରି ଲୋକପ୍ରିୟ କରିପାରିବ ।