ବିଜାପୁରରେ ନକ୍ସଲଙ୍କ IED ବିସ୍ଫୋରଣ, ଆହତ ମାଓବାଦୀକୁ ଛାଡି ପଳାଇଥିଲେ ସାଥୀ

ରାୟପୁର ୪।୧୦: ଛତିଶଗଡ଼ ବିଜାପୁର ଜିଲ୍ଲା ମଦେଡ ଥାନା ବାନ୍ଦେପାରା ଜଙ୍ଗଲରେ ଶନିବାର ନକ୍ସଲଙ୍କ ଆଇଇଡି ବିସ୍ଫୋରଣରେ ଜଣେ ମାଓବାଦୀ ଗୁରୁତର ଆହତ ହୋଇଛି। ପୋଲିସ ଅଧିକାରୀଙ୍କ ଅନୁସାରେ ମାଓବାଦୀଙ୍କ ଏକ ସମୂହ ଆଇଇଡି ଲଗାଉଥିଲେ, ସେତେବେଳେ ଏଥିରେ ବିସ୍ଫୋରଣ ହେବା ଯୋଗୁ ସେମାନଙ୍କ ଜଣେ ସାଥୀ ଆହତ ହୋଇଛି। ଆହତ ମାଓବାଦୀକୁ ଗୁଜ୍ଜା ସୋଢୀ ରୂପେ ଚିହ୍ନଟ କରାଯାଇଛି।

ଘଟଣାର ପ୍ରତ୍ୟକ୍ଷଦର୍ଶୀ ଏ ନେଇ ତୁରନ୍ତ ପୋଲିସକୁ ସୂଚନା ଦେଇଥିଲେ। ମଦ୍ଦେଢ ପୋଲିସ ଥାନା ତୁରନ୍ତ ଘଟଣାସ୍ଥଳରେ ପହଞ୍ଚି କାର୍ଯ୍ୟାନୁଷ୍ଠାନ କରିଛି। ପୋଲିସ ସ୍ଥାନୀୟ ଲୋକଙ୍କ ସହାୟତାରେ ମାଓବାଦୀକୁ ହସ୍ପିଟାଲ ପହଞ୍ଚାଇଥିଲା। ପ୍ରାଥମିକ ଚିକିତ୍ସା ପରେ ତାକୁ ବିଜାପୁର ଜିଲ୍ଲା ହସ୍ପିଟାଲ ସ୍ଥାନାନ୍ତର କରାଯାଇଛି। ପୋଲିସ ସୂଚନା ଅନୁସାରେ ସୋଢୀ ଗତ ୬-୭ବର୍ଷ ହେଲା ମଦ୍ଦେଢ ଅଞ୍ଚଳରେ ସକ୍ରିୟ ଥିଲା ଓ ସେ ଏସିଏମ କନ୍ନା ବୁଚନା ସହିତ କାମ କରୁଥିଲା। ତେବେ ଆଜିର ଘଟଣାରୁ ସାଥୀ ସଦସ୍ୟଙ୍କ ଲାଗି ମାଓବାଦୀଙ୍କ ଦୟାମାୟା ନଥିବା ପ୍ରମାଣିତ କରିଛି।

ପୋଲିସ ଅଧିକାରୀ କହିଛନ୍ତି ଯେ ମାଓବାଦୀଙ୍କ ଇତିହାସରୁ ଆହତ ଓ ଅସୁସ୍ଥ ସାଥୀକୁ ସେମାନେ ପ୍ରାୟ ଦୁର୍ଗମ ଜଙ୍ଗଲରେ ମରିବାକୁ ଛାଡି ଦିଅନ୍ତି। ‘ଲଢ ନଚେତ ମର’ ସଙ୍ଗଠନର କଠୋର ସିଦ୍ଧାନ୍ତରେ ସେମାନେ ଏପରି ଆଚରଣ କରନ୍ତି। ଏବେ ସଙ୍ଗଠନରେ ବରିଷ୍ଠ ନେତା ଆଭ୍ୟନ୍ତରୀଣ ବିବାଦରେ ଫଶି ରହିଛନ୍ତି, ସେପଟେ ତଳତଳିଆ କାର୍ଯ୍ୟକର୍ତ୍ତା ଉପେକ୍ଷା ର  ସମ୍ମୁଖୀନ ହେଉଛନ୍ତି। ବସ୍ତରର ସଂଭାଗରେ ଏହି ବିସ୍ଫୋରଣ ଦ୍ରୁତ ନକ୍ସଲ ବିରୋଧୀ ଅଭିଯାନ କାଳରେ ହୋଇଛି। ଏଠାରେ ନିକଟରେ ୧୦୦ରୁ ଅଧିକ ମାଓବାଦୀ ଆତ୍ମସମର୍ପଣ କରିଥିଲେ।

ସରକାର ମାର୍ଚ୍ଚ ୨୦୨୬ ସୁଦ୍ଧା ଦେଶରୁ ନକ୍ସଲବାଦ ସମାପ୍ତ କରିବାକୁ ଲକ୍ଷ୍ୟ ଧାର୍ଯ୍ୟ କରିଛନ୍ତି। ଏଥିରେ ଏପରି ଘଟଣା ଏହି ମିସନର ତତ୍କାଳିକତାକୁ ଆହୁରି ମଜଭୁତ କରିଛି। ସୁରକ୍ଷା ବଳ ବିଜାପୁର ସ୍ଥିତି ଉପରେ ଲଗାତାର ନଜର ରଖି ରହିଛନ୍ତି। ସେହିପରି ଆଇଇଡି ସମ୍ପର୍କିତ ବିପଦ ଅଟକାଇବା ଲାଗି ସମ୍ବେଦନଶୀଳ ଅଞ୍ଚଳରେ ପାଟ୍ରୋଲିଂ ବଢାଇ ଦେଇଛନ୍ତି।