ସ୍ଥଳ, ବାୟୁ ଏବଂ ସମୁଦ୍ର... ତିନୋଟି ମୋର୍ଚ୍ଚାରେ ସାଉଦି ଆରବର ସାମରିକ ଶକ୍ତି କେତେ ?

ନୂଆଦିଲ୍ଲୀ: ସାଉଦି ଆରବ ଏବଂ ପାକିସ୍ତାନ ସମ୍ପ୍ରତି ଏକ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଚୁକ୍ତିନାମା ସ୍ୱାକ୍ଷର କରିଛନ୍ତି। ଏହା ଅଧୀନରେ ଗୋଟିଏ ଦେଶ ଉପରେ ଆକ୍ରମଣକୁ ଉଭୟଙ୍କ ଉପରେ ଆକ୍ରମଣ ବୋଲି ବିବେଚନା କରାଯିବ। ଏହି ଚୁକ୍ତିନାମା ସମଗ୍ର ଏସିଆରେ ଏକ ହଇଚଇ ସୃଷ୍ଟି କରିଛି। କାରଣ ଏହା ପାକିସ୍ତାନର ପରମାଣୁ ଅସ୍ତ୍ର ବ୍ୟବହାର କରିବାର ବିକଳ୍ପକୁ ମଧ୍ୟ ଖୋଲା ରଖିଛି। ସାଉଦି ଆରବର ଯୁବରାଜ ମହମ୍ମଦ ବିନ୍ ସଲମାନ (MBS) ଏବଂ ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫଙ୍କ ମଧ୍ୟରେ ହୋଇଥିବା ଏହି ଚୁକ୍ତିନାମାକୁ ଏକ ପଦକ୍ଷେପ ଭାବରେ ବିବେଚନା କରାଯାଉଛି। ଯାହା ଉପସାଗର ଏବଂ ଦକ୍ଷିଣ ଏସିଆରେ ସୁରକ୍ଷା ସନ୍ତୁଳନକୁ ପରିବର୍ତ୍ତନ କରିବ।

ଗ୍ଲୋବାଲ ଫାୟାରପାୱାର 2025 ର ସଦ୍ୟତମ ରିପୋର୍ଟ ଅନୁସାରେ, ବିଶ୍ୱର ୧୪୫ ସାମରିକ ଶକ୍ତି ମଧ୍ୟରେ ୨୪ ତମ ସ୍ଥାନରେ ଅଛି ସାଉଦି ଆରବ। ଏହାର ଅର୍ଥ ହେଉଛି କେବଳ ତେଲ ନୁହେଁ, ବରଂ ଏହାର ଅସ୍ତ୍ରଶସ୍ତ୍ର ଏବଂ ସାମରିକ ଶକ୍ତିର ରେସ୍‌ରେ ରହିଛି ସାଉଦି।

ଦଶନ୍ଧି ଧରି ଧାରଣା ଥିଲା ଯେ ସାଉଦି ଆରବ ଏହାର ସୁରକ୍ଷା ପାଇଁ ସମ୍ପୂର୍ଣ୍ଣ ଭାବରେ ଆମେରିକା ଉପରେ ନିର୍ଭରଶୀଳ ଥିଲା। କିନ୍ତୁ ବର୍ତ୍ତମାନ ଚିତ୍ର ବଦଳିବାରେ ଲାଗିଛି। ଆଜି, ସାଉଦି ଆରବର ନିଜସ୍ୱ ଶକ୍ତିଶାଳୀ ସେନା ଏବଂ ଆଧୁନିକ ଅସ୍ତ୍ରଶସ୍ତ୍ରର ଏକ ବଡ଼ ଭଣ୍ଡାର ଅଛି। ଆମେରିକା ଏବଂ ୟୁରୋପରୁ କିଣାଯାଇଥିବା ଲଢ଼ୁଆ ବିମାନ ଏବଂ ଟ୍ୟାଙ୍କ ସହିତ, ଏହା ଚୀନ୍‌ ସହିତ ପ୍ରତିରକ୍ଷା ସହଯୋଗକୁ ନୂତନ ଉଚ୍ଚତାକୁ ନେଇଯାଇଛି। ଏହି କାରଣରୁ ଦେଶ ଏବେ ପଶ୍ଚିମ ଏସୀୟ ରାଜନୀତିରେ ଆମେରିକା ଏବଂ ଚୀନ୍‌ ଉଭୟ ପାଇଁ ଏକ ପ୍ରମୁଖ ଅଂଶୀଦାର ପାଲଟିଛି।

ପ୍ରାୟ 35 ନିୟୁତ ଜନସଂଖ୍ୟା ସହିତ, ସାଉଦି ଆରବରେ ୨୫.୭ ନିୟୁତ ସେନା ଅଛନ୍ତି। ଏହା ସହିତ ଦେଢ ଲକ୍ଷ ଅର୍ଦ୍ଧସାମରିକ ବାହିନୀର କର୍ମଚାରୀ ନିୟୋଜିତ ଅଛନ୍ତି। ସେନାର ତିନୋଟି ଶାଖା- ସ୍ଥଳସେନା, ବାୟୁସେନା ଏବଂ ନୌସେନାରେ ସୈନ୍ୟଙ୍କ ଦୃଢ଼ ଉପସ୍ଥିତି ଏହାକୁ ଯେକୌଣସି ବାହ୍ୟ ବିପଦର ମୁକାବିଲା କରିବା ପାଇଁ ପ୍ରସ୍ତୁତ କରେ। ଏତେ ବଡ଼ ସକ୍ରିୟ ବାହିନୀ ସତ୍ତ୍ୱେ, ସାଉଦି ଆରବରେ କୌଣସି ରିଜର୍ଭ ଫୋର୍ସ ନାହିଁ, ଅର୍ଥାତ୍ ଏହାର ସମ୍ପୂର୍ଣ୍ଣ ବାହିନୀ ସର୍ବଦା ଆଗ ଧାଡିରେ ସକ୍ରିୟ ରହିଥାଏ।

ସାଉଦି ଆରବର ସବୁଠାରୁ ବଡ଼ ଶକ୍ତି ହେଉଛି ଏହାର ବାୟୁସେନା। ରୟାଲ୍ ସାଉଦି ବାୟୁସେନା (RSAF) ପାଖରେ ଏକ ହଜାରରୁ ଅଧିକ ବିମାନ ଅଛି। ଏଗୁଡ଼ିକ ମଧ୍ୟରେ ସବୁଠାରୁ ପ୍ରମୁଖ ହେଉଛି ଆମେରିକାରୁ ଅଧିଗ୍ରହଣ କରାଯାଇଥିବା F-15E ଷ୍ଟ୍ରାଇକ୍ ଇଗଲ୍, ବ୍ରିଟେନରୁ ଟୋର୍ନାଡୋ IDS ଏବଂ ୟୁରୋପରୁ ୟୁରୋଫାଇଟର ଟାଇଫୁନ୍। ଲଢ଼ୁଆ ବିମାନ ବ୍ୟତୀତ, ଦେଶରେ 185ରୁ ଅଧିକ ହେଲିକପ୍ଟର, ତାଲିମ ଏବଂ ପରିବହନ ପାଇଁ ବହୁ ସଂଖ୍ୟକ ବିମାନ ଅଛି। ଏହି ବାୟୁ ଶକ୍ତି ସାଉଦି ଆରବକୁ ଯେକୌଣସି ସମୟରେ ଆକାଶରୁ ତାର ଶତ୍ରୁମାନଙ୍କୁ ପରାସ୍ତ କରିବାକୁ ସକ୍ଷମ।

ସାଉଦି ଆରବରେ ସ୍ଥଳସେନାର ଦବଦବା ରହିଛି। ୨୨,୮୬୦ ରୁ ଅଧିକ ଅସ୍ତ୍ରଶସ୍ତ୍ର ସହିତ, ଏହାର ସେନାକୁ ଉପସାଗର ଅଞ୍ଚଳରେ ସବୁଠାରୁ ଶକ୍ତିଶାଳୀ ବୋଲି ବିବେଚନା କରାଯାଏ। ଏଥିରେ ଆମେରିକୀୟ ଆବ୍ରାମସ୍ ଟ୍ୟାଙ୍କ, ପାଟନ୍ ଏବଂ ପାଲାଡିନ୍ ଅନ୍ତର୍ଭୁକ୍ତ। ସାଉଦି ଆରବ ସମ୍ପ୍ରତି ଆମେରିକାରୁ ୧୭୭ଟି ଆଧୁନିକ M109A6 ଟ୍ୟାଙ୍କ ଅର୍ଡର କରିଛି। ଏହାର ନ୍ୟାସନାଲ୍ ଗାର୍ଡ ପାଖରେ ପୂର୍ବରୁ ୧୫୬ଟି ସିଜର SPH ଟ୍ରକ୍ ଅଛି। ପଦାତିକ ଯୁଦ୍ଧ ଯାନ, ଉପଯୋଗୀ ଯାନ ଏବଂ ଉନ୍ନତ ବାୟୁ ପ୍ରତିରକ୍ଷା ପ୍ରଣାଳୀ ଏହି ସ୍ଥଳ ବାହିନୀକୁ ଆହୁରି ବିପଜ୍ଜନକ କରିଥାଏ।