ନୂଆଦିଲ୍ଲୀ: କେନ୍ଦ୍ର ସରକାର କର୍ମଚାରୀ ପେନ୍ସନ୍ ସ୍କିମ୍ ଅଧିନରେ ସର୍ବନିମ୍ନ ପେନ୍ସନ୍କୁ ବଢାଇବା ପାଇଁ ଯୋଜନା କରୁଛନ୍ତି । ସରକାର ଇପିଏସକୁ ୧୦୦୦ ଟଙ୍କାରୁ ବଢାଇ ୩୦୦୦ ଟଙ୍କା କରିବା ପାଇଁ ବିଚାର କରୁଛନ୍ତି । ଆଗାମୀ କିଛି ମାସ ଭିତରେ ଏହା ଲାଗୁ ହୋଇପାରେ । ସରକାରଙ୍କ ଦ୍ୱାରା ଏହି ବଡ଼ ଘୋଷଣା ଏପରି ସମୟରେ ହେବାକୁ ଯାଉଛି, ଯେତେବେଳ ଦରଦାମ ବୃଦ୍ଧି ଓ ବୟସ୍କଙ୍କ ସାମାଜିକ ସୁରକ୍ଷା ଉପରେ ଚିନ୍ତା ବଢିଛି ।
ଇପିଏସ୍ ଭାରତରେ ସଂଗଠିତ କ୍ଷେତ୍ରର କର୍ମଚାରୀଙ୍କ ପାଇଁ ଏକ ଅବସରକାଳୀନ ଯୋଜନା । ଏହାକୁ କର୍ମଚାରୀ ଭବିଷ୍ୟ ନିଧି ସଂଗଠନ (EPFO) ପରିଚାଳନା କରେ । ଏହାର ଉଦ୍ଦେଶ୍ୟ ପ୍ରାଇଭେଟ୍ ସେକ୍ଟରର କର୍ମଚାରୀଙ୍କୁ ଅବସର ପରେ ଏକ ନିଶ୍ଚିତ ମାସିକ ଆୟ ପ୍ରଦାନ କରିବା । ଏହି ଯୋଜନା ପାଇଁ ଫଣ୍ଡ୍ ନିଯୁକ୍ତିଦାତା ଅର୍ଥାତ କମ୍ପାନିର ଯୋଗଦାନରୁ ଆସିଥାଏ । ଏହାର ଅର୍ଥ ଇପିଏଫରେ ୧୨ ପ୍ରତିଶତରୁ ୮.୩୩ ପ୍ରତିଶତ ଇପିଏସ୍ ଓ ବଳକା ୩.୬୭ ପ୍ରତିଶତ ଇପିଏଫରୁ ଆସିଥାଏ ।
ସରକାରୀ ଅଧିକାରୀ କହିଛନ୍ତି, ସର୍ବନିମ୍ନ ପେନ୍ସନ୍କୁ ପ୍ରତି ମାସ ୩୦୦୦ ଟଙ୍କା କରିବା ପାଇଁ ପ୍ରସ୍ତୁତି କରାଯାଉଛି । ଦୀର୍ଘ ଦିନରୁ ଏହା ବିଚାରାଧୀନ ରହିଛି । ଏହା ପୂର୍ବରୁ ୨୦୨୦ରେ ଶ୍ରମ ମନ୍ତ୍ରଣାଳୟ ସର୍ବନିମ୍ନ ପେନ୍ସନ୍ ୨୦୦୦ ଟଙ୍କା କରିବା ପାଇଁ ପ୍ରସ୍ତାବ ଅର୍ଥ ମନ୍ତ୍ରଣାଳୟକୁ ପଠାଯାଇଥିଲା, କିନ୍ତୁ ଏହାରୁ ମଞ୍ଜୁରି ମିଳି ନଥିଲା । ରିପୋର୍ଟ ଅନୁସାରେ ଶ୍ରମ ମନ୍ତ୍ରଣାଳୟ ବର୍ତ୍ତମାନ ୩୦୦୦ ଟଙ୍କା ପେନସନ ଲାଗୁ କରିବା ସହ ଜଡ଼ିତ ଅତିରିକ୍ତ ଖର୍ଚ୍ଚର ମୂଲ୍ୟାଙ୍କନ କରୁଛି । ଆର୍ଥିକ ବର୍ଷ ୨୦୨୩-୨୪ରେ ସରକାର ଇପିଏସ୍ ପେନ୍ସନ୍ଭୋଗୀଙ୍କୁ ସର୍ବନିମ୍ନ ପେନ୍ସନ୍ ଦେବା ପାଇଁ ୧,୨୨୩ କୋଟି ଟଙ୍କା ଖର୍ଚ୍ଚ କରିଥିଲେ । ଯାହା ପୂର୍ବ ବର୍ଷ ତୁଳନାରେ ୩୬ ପ୍ରତିଶତ ଅଧିକ । ନିକଟରେ ବିଜେପି ସାଂସଦ ବସବରାଜ ବୋମ୍ମାଇଙ୍କ ଅଧ୍ୟକ୍ଷତାରେ ସଂସଦୀୟ ସମିତି ଶ୍ରମ ମନ୍ତ୍ରଣାଳୟକୁ ସର୍ବନିମ୍ନ ଇପିଏସ୍ ପେନସନକୁ ତତ୍କାଳ ବଢାଇବା ପାଇଁ ସୁପାରିଶ କରିଥିଲା ।
