H-1B ଭିସା ଫି’ ୮୮ ଲକ୍ଷ ଟଙ୍କା...ଭାରତୀୟ ଆଇଟି କମ୍ପାନି ପାଇଁ ଝଟକା ! ଖସିଲା ସେୟାର ମୂଲ୍ୟ

ନୂଆଦିଲ୍ଲୀ: ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରତ୍ୟେକ H-1B ଭିସା ଆବେଦନ ଉପରେ ୧୦୦,୦୦୦ ଡଲାର ବାର୍ଷିକ ଶୁଳ୍କ ଲଗାଇଛନ୍ତି । ଏହାପରେ ଭାରତୀୟ ଆଇଟି କମ୍ପାନିଗୁଡିକୁ ବଡ଼ ଝଟକା ଲାଗିଛି । ୱାଲ୍ ଷ୍ଟ୍ରିଟ୍‌ରେ ଏହି କମ୍ପାନିଗୁଡ଼ିକର ସେୟାର ମୂଲ୍ୟରେ ବଡ଼ ହ୍ରାସ ଦେଖିବାକୁ ମିଳିଛି । ଏହା ଏକ ନୀତିଗତ ପରିବର୍ତ୍ତନ ଅଟେ, ଯାହାଦ୍ୱାରା ନିଯୁକ୍ତି ଉପରେ ଖର୍ଚ୍ଚ ବଢିବ । ଆମେରିକାର ନିଯୁକ୍ତି ମଡେଲରେ ବି ପରିବର୍ତ୍ତନ ଆସିବ, କିନ୍ତୁ ବିଶ୍ୱ ସ୍ତରରେ ବୈଷୟିକ ପ୍ରତିଭାମାନଙ୍କ ପାଇଁ ଆମେରିକାରେ ପ୍ରବେଶ କଷ୍ଟସାଧ୍ୟ ହେବ ।

ଡୋନାଲ୍ଡ ଟ୍ରମ୍ପଙ୍କ ଏହି ନିଷ୍ପତ୍ତି ପରେ ନ୍ୟୁୟର୍କ ଟ୍ରେଡିଂରେ ଇନଫୋସିସର ଏଡିଆର ୪.୫ ପ୍ରତିଶତ ଯାଏ ହ୍ରାସ ପାଇଛି । ଅନ୍ୟପଟେ ୱିପ୍ରୋରେ ୩.୪ ପ୍ରତିଶତ ହ୍ରାସ ଘଟିଛି । କଗ୍ନିଜେଣ୍ଟରେ ୪.୩ ପ୍ରତିଶତ ଓ ଏକ୍ସେଞ୍ଚରରେ ୧.୩ ପ୍ରତିଶତ ହ୍ରାସ ରେକର୍ଡ ହୋଇଛି, ଯାହା ନିବେଶକଙ୍କ ଚିନ୍ତା ବଢାଇଛି ।

ଟ୍ରମ୍ପଙ୍କ ଘୋଷଣା ଅନୁଯାୟୀ, କମ୍ପାନିଗୁଡ଼ିକୁ ପ୍ରତ୍ୟେକ ନୂଆ କିମ୍ବା ବିଦେଶରୁ ଫେରୁଥିବା H-1B କର୍ମଚାରୀଙ୍କ ପାଇଁ ଶୁଳ୍କ ଦେବାକୁ ପଡ଼ିବ ଓ ଏହାର ପ୍ରମାଣ ରଖିବାକୁ ହେବ । ଏହି କ୍ଷେତ୍ରରେ ପ୍ରମୁଖ ଥିବା ଭାରତୀୟ IT କମ୍ପାନିଗୁଡ଼ିକ ସମସ୍ତ H-1B ଭିସାର ୭୦%ରୁ ରଖନ୍ତି । ଟ୍ରମ୍ପଙ୍କ ଏହି ନୀତି ଏକ ବଡ଼ ଆର୍ଥିକ ଝଟକା ।

ଆମେରିକାର ବାଣିଜ୍ୟ ସଚିବ ହାୱାର୍ଡ ଲୁଟନିକ୍ ଶୁଳ୍କ ବୃଦ୍ଧିକୁ ସମର୍ଥନ କରି କହିଛନ୍ତି, ଏହା "ଶସ୍ତା ବିଦେଶୀ ପ୍ରତିଭା"ର ପ୍ରବେଶକୁ ରୋକିବା । କେବଳ ମୂଲ୍ୟବାନ ଶ୍ରମିକ ହିଁ ଏଥିପାଇଁ ଯୋଗ୍ୟ ହେବେ । ହ୍ୱାଇଟ୍ ହାଉସ୍ ଏହି ପଦକ୍ଷେପକୁ H-1B ବ୍ୟବସ୍ଥାର "ଅପବ୍ୟବହାର" ରୋକିବା ଏବଂ ଆମେରିକୀୟଙ୍କୁ ନିଯୁକ୍ତିରେ ପ୍ରାଥମିକତା ଦେବାକୁ ପ୍ରୋତ୍ସାହିତ କରିବ ବୋଲି କହିଛି ।

ଟ୍ରମ୍ପଙ୍କ ଏହି ନିଷ୍ପତ୍ତିର ବ୍ୟାପକ ପରିଣାମ ପଡ଼ିପାରେ । ବିଶ୍ଳେଷଜ୍ଞମାନେ ବଡ଼ ଧରଣର ଛଟେଇର ପୂର୍ବାନୁମାନ କରିଛନ୍ତି । ଇନଫୋସିସ୍ , ଟିସିଏସ୍, ୱିପ୍ରୋ, କଗ୍ନିଜାଣ୍ଟ ଓ ଏଚସିଏଲ୍ ଭଳି କମ୍ପାନିଗୁଡ଼ିକ ଆମେରିକାରେ ସେମାନଙ୍କର ଅନସାଇଟ୍ କର୍ମଚାରୀଙ୍କୁ ହ୍ରାସ କରିବେ । କେବଳ ଉଚ୍ଚ-ସ୍ତରୀୟ ପଦବୀ ପାଇଁ H-1B ସଂରକ୍ଷଣ କରିବେ ଏବଂ ଅଫସୋରିଂ ଓ ରିମୋଟ୍ ଡେଲିଭରି ମଡେଲଗୁଡ଼ିକୁ ତ୍ୱରାନ୍ୱିତ କରିବେ ।