"ମିଥ୍ୟା ଏବଂ ଭିତ୍ତିହୀନ ଅଭିଯୋଗ...," ଭୋଟ ଚୋରି ପ୍ରସଙ୍ଗରେ ରାହୁଲ ଗାନ୍ଧୀଙ୍କୁ ନିର୍ବାଚନ କମିଶନଙ୍କ ସ୍ପଷ୍ଟୀକରଣ

ନୂଆଦିଲ୍ଲୀ: ଭୋଟ ଚୋରି ପ୍ରସଙ୍ଗରେ ନିର୍ବାଚନ କମିଶନଙ୍କ ଉପରେ ଗମ୍ଭୀର ଅଭିଯୋଗ ଆଣିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ଭୋଟ ଚୋରମାନଙ୍କୁ ସୁରକ୍ଷା ଦେଉଥିବା ସାମ୍ବାଦିକ ସମ୍ମିଳନୀରେ ଅଭିଯୋଗ କରିଥିଲେ ରାହୁଲ।ନିର୍ବାଚନ କମିଶନ ଏବେ ଏହି ମାମଲାରେ ପ୍ରତିକ୍ରିୟା ଦେଇଛନ୍ତି। ନିର୍ବାଚନ କମିଶନ ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ରାହୁଲଙ୍କ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି।

ରାହୁଲ ଗାନ୍ଧୀଙ୍କ ସାମ୍ବାଦିକ ସମ୍ମିଳନୀ ଶେଷ ହେବାର କିଛି ମିନିଟ୍ ପରେ ପ୍ରତିକ୍ରିୟା ଦେଇଛନ୍ତି ନିର୍ବାଚନ କମିଶନ। ଟ୍ୱିଟରରେ ଏକ ପୋଷ୍ଟ ସେୟାର କରି କମିଶନ ଲେଖିଛନ୍ତି, "ରାହୁଲ ଗାନ୍ଧୀଙ୍କ ଅଭିଯୋଗ ମିଥ୍ୟା ଏବଂ ଭିତ୍ତିହୀନ।" କୌଣସି ସାଧାରଣ ନାଗରିକ ଅନଲାଇନରେ ଭୋଟ ଡିଲିଟ୍ କରିପାରିବେ ନାହିଁ। ରାହୁଲ ଗାନ୍ଧୀ ଏ ସମ୍ପର୍କରେ ଭୁଲ ସୂଚନା ଦେଇଛନ୍ତି। ପ୍ରଭାବିତ ବ୍ୟକ୍ତିଙ୍କୁ ଭୋଟ ଡିଲିଟ୍ କରିବା ପୂର୍ବରୁ ଶୁଣାଣୀର ସୁଯୋଗ ଦିଆଯାଇଛି। 2023 ମସିହାରେ ଆଲାଣ୍ଡ ବିଧାନସଭା ନିର୍ବାଚନମଣ୍ଡଳୀରେ ଜଣେ ଭୋଟରଙ୍କୁ ଡିଲିଟ୍ କରିବାକୁ ଏକ ବିଫଳ ପ୍ରୟାସ କରାଯାଇଥିଲା, ଏନେଇ ECI ଏକ ମାମଲା ଦାୟର କରିଥିଲା।

ରାହୁଲ ଗାନ୍ଧୀ ଏକ ସାମ୍ବାଦିକ ସମ୍ମିଳନୀରେ କହିଥିଲେ, "କର୍ଣ୍ଣାଟକର ଆଲାଣ୍ଡରେ ଭୋଟ ଚୋରି ହୋଇଥିଲା। ଆମେ ଚୋରି ଚିହ୍ନଟ କରିଥିଲୁ। ଆମେ ଦାବି କରୁଛୁ ଯେ ଜ୍ଞାନେଶ କୁମାର ଗଣତନ୍ତ୍ରକୁ ନଷ୍ଟ କରିବାକୁ ଚେଷ୍ଟା କରୁଥିବା ଲୋକଙ୍କୁ ସୁରକ୍ଷା ନ ଦିଅନ୍ତୁ। ନିର୍ବାଚନ କମିଶନ ଗୋଟିଏ ସପ୍ତାହ ମଧ୍ୟରେ କର୍ଣ୍ଣାଟକ CIDକୁ ଜବାବ ଦିଅନ୍ତୁ। ସମ୍ବିଧାନ ଆମକୁ ସଶକ୍ତ କରିଛି, ଏବଂ ଆମର ଲଢ଼େଇ ଏହାକୁ ସୁରକ୍ଷିତ ରଖିବା ପାଇଁ। ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର ସେମାନଙ୍କୁ ସୁରକ୍ଷା ଦେଉଛନ୍ତି ଯେଉଁମାନେ ସମ୍ବିଧାନକୁ ଦୁର୍ବଳ କରୁଛନ୍ତି।"