ଭଦ୍ରକ ୩୦।୧୧: ଲୋକଙ୍କୁ ସେବା ଦେଇପାରିଲି ନାହିଁ, ଦଳରୁ ଇସ୍ତଫା ଦେଲି । ବିଜୁ ଜନତା ଦଳରୁ ଇସ୍ତଫା ଦେବା ପରେ ଏଭଳି ବିସ୍ଫୋରକ ବୟାନ ଦେଇଛନ୍ତ ଭଦ୍ରକ ବ୍ଲକ୍ ଅଧ୍ୟକ୍ଷା ଉର୍ମିଳା ନାୟକ । ଶନିବାର ସେ ବିଜୁ ଜନତା ଦଳରୁ ଇସ୍ତଫା ଦେଇଥିଲେ । ସେ ତାଙ୍କ ଇସ୍ତଫା ପତ୍ର ଭଦ୍ରକ ଜିଲ୍ଲା ବିଜେଡି ସଭାପତି ଜଗନ୍ନାଥ ସ୍ୱାଇଁଙ୍କୁ ପଠାଇ ଦେଇଥିଲେ ।

ତେବେ ବିଜୁ ଜନତା ଦଳରୁ ଇସ୍ତଫା ଦେବା ପରେ ଉର୍ମିଳା ନାୟକ କହିଛନ୍ତି ଯେ, ଶିକ୍ଷକତା ଛାଡି ରାଜନୀତିକୁ ଆସିଥିଲି । କିନ୍ତୁ ନୂଆ ସରକାର ଆସିବା ପରେ ଲୋକଙ୍କ ସେବା କରିପାରୁନି । ସେପଟେ ସରପଞ୍ଚ ଓ ସମିତି ସଭ୍ୟ ମଧ୍ୟ କ୍ଷୋଭ ପ୍ରକାଶ କରିଛନ୍ତି । ତେଣୁ ବିଜୁ ଜନତା ଦଳରୁ ଇସ୍ତଫା ଦେଇଛି । ଆଗାମୀ ଦିନରେ କେଉଁ ଦଳକୁ ଯିବେ ସେ ନେଇ ସେ ମାନସିକ ଭାବେ ପ୍ରସ୍ତୁତ ନଥିବା ଉର୍ମିଳା ନାୟକ କହିଛନ୍ତି । ତେବେ ଅନାସ୍ଥା ଆସିଲେ ସେ ପୁନଃ ପଦବୀରେ ରହିବେ ବୋଲି କହିଛନ୍ତି ।

ସୂଚନାଯୋଗ୍ୟ ଯେ, ଭଦ୍ରକ ଜିଲ୍ଲାରେ ଏବେ ରାଜନୀତି ସରଗରମ । ଭଦ୍ରକ ଜିଲ୍ଲା ବନ୍ତ ବ୍ଲକ୍ ଅଧ୍ୟକ୍ଷ ମନୋରଞ୍ଜନ ଘଡେଇଙ୍କ ବିରୋଧରେ ଦଳ ବିରୋଧୀ କାର୍ଯ୍ୟ ଅଭିଯୋଗ ପରେ ତାଙ୍କୁ ବିଜେଡି ଦଳ ନିଲମ୍ବନ କରିଥିଲା । ପରେ ଭଦ୍ରକ ବ୍ଲକ୍ ଅଧ୍ୟକ୍ଷା ଉର୍ମିଳା ନାୟକ ଓ ଭଣ୍ଡାରପୋଖରୀ ବ୍ଲକ୍ ଅଧ୍ୟକ୍ଷା ସୁମତି ସେଠୀ ମଧ୍ୟ ଇସ୍ତଫା ଦେଇଥିଲେ । ଭଣ୍ଡାରିପୋଖରୀ ବ୍ଲକ୍ ଅଧିନ ବନ୍ତ ବ୍ଲକ୍ ଅଧ୍ୟକ୍ଷ ମନୋରଞ୍ଜନ ଘଡ଼େଇଙ୍କ ନାମରେ ଅଭିଯୋଗ ଆଣିଥିଲା ବିଜେଡି । ନିଜ ନାମରେ ଭେଣ୍ଡର କୋଡ୍ ମାଧ୍ୟମରେ ମହାତ୍ମା ଗାନ୍ଧୀ କର୍ମ ନିଯୁକ୍ତି ଯୋଜନାରେ କୋଟିଏ ଟଙ୍କା ଆତ୍ମସାତ ଅଭିଯୋଗ କରିଥିଲା ବିଜେଡି । କିଛି ସମୟ ମଧ୍ୟରେ ତାଙ୍କ ଇସ୍ତଫା ପତ୍ର ଗଣମାଧ୍ୟମକୁ ଆସିବା ମାତ୍ରେ ବିଜେଡି ରାଜ୍ୟ ସଭାପତି ତାଙ୍କୁ ନିଲମ୍ବନ କରିଥିବା ସୂଚନା ମିଳିଥିଲା । ତେବେ ପରେ ପରେ ଭଦ୍ରକ ବ୍ଲକ୍ ଅଧ୍ୟକ୍ଷା ଉର୍ମିଳା ନାୟକ ଓ ଭଣ୍ଡାରୀପୋଖରୀ ବ୍ଲକ୍ ଅଧ୍ୟକ୍ଷା ସୁମତି ସେଠୀ ମଧ୍ୟ ବିଜେଡିରୁ ଇସ୍ତଫା ଦେଇଥିଲେ । ବିଜେଡି ଜିଲ୍ଲା ସଭାପତିଙ୍କ ନିକଟକୁ ଇସ୍ତଫା ପତ୍ର ପଠାଇଥିଲେ । ତେବେ ଇସ୍ତଫା ଦେଇଥିବା ବ୍ଲକ୍ ଅଧ୍ୟକ୍ଷା ଇସ୍ତଫା ପତ୍ରରେ ବ୍ୟକ୍ତିଗତ କାରଣ ପାଇଁ ଇସ୍ତଫା ଦେଇଥିବା ଉଲ୍ଲେଖ କରିଥିଲେ ।

​​​​​​​