ଆଉ ଗୋଟିଏ ଦେଶରେ ମାତିଲେ ଜେନ-ଜି, ବିଦ୍ୟୁତ୍ ଓ ପାଣି ସମସ୍ୟାକୁ ନେଇ ଗାଦିଚ୍ୟୁତ କରାଇଲେ

ନୂଆଦିଲ୍ଲୀ ୩୦/୦୯: ନେପାଳ ପରେ, ମେଡାଗାସ୍କରରକୁ ବ୍ୟାପିଲା ଜେନ-ଜି ଆନ୍ଦୋଳନ । ବିଦ୍ୟୁତ୍ ଏବଂ ପାଣି ସମସ୍ୟାକୁ ନେଇ ରାସ୍ତାକୁ ଓହ୍ଲାଇ ବିକ୍ଷୋଭକାରୀ । ସ୍ଥିତି ଏମିତି ହୋଇଛି ଯେ, ଜେନ-ଜି ଲୋକମାନେ ଦେଶର ସରକାରଙ୍କୁ ଥରାଇ ଦେଇଛନ୍ତି । ସେଠାରେ ବିଶାଳ ପ୍ରତିବାଦ ଓ ସ୍ଲୋଗାନ ଦିଆଯାଇଥିଲା । ଜାତିସଂଘ ଅନୁଯାୟୀ, ଏପର୍ଯ୍ୟନ୍ତ ପ୍ରତିବାଦରେ ୨୨ ଜଣଙ୍କର ମୃତ୍ୟୁ ହୋଇଛି । ୧୦୦ ଜଣ ଆହତ ହୋଇଛନ୍ତି । ଏହି ପ୍ରତିବାଦ ପରେ, ଦେଶରେ ଏକ ବିଦ୍ରୋହ ଘଟିଛି । ମେଡାଗାସ୍କରର ରାଷ୍ଟ୍ରପତି ଆଣ୍ଡ୍ରି ରାଜୋଏଲିନା ପ୍ରତିବାଦ ପରେ ସରକାରଙ୍କୁ ଭାଙ୍ଗି ଦେଇଛନ୍ତି । 

ଲଗାତାର ବିଦ୍ୟୁତ୍ ଏବଂ ପାଣି ବିଭ୍ରାଟ ବିରୋଧରେ ଗୁରୁବାର ସାରା ଦେଶରେ ପ୍ରତିବାଦ ଆରମ୍ଭ ହୋଇଥିଲା । ହଜାର ହଜାର ଜେନ-ଜେଡ ଲୋକ ରାସ୍ତାକୁ ଓହ୍ଲାଇ ସରକାରକୁ ରାଜଧାନୀ ଆଣ୍ଟାନାନାରିଭୋ ଏବଂ ଅନ୍ୟାନ୍ୟ ସହରରେ ରାତି କର୍ଫ୍ୟୁ ଲାଗୁ କରିବାକୁ ବାଧ୍ୟ କରିଥିଲେ । ପ୍ରତିବାଦ ଏତେ ମାତ୍ରାରେ ବ୍ୟାପିଲା ଯେ, ଯାହା ଫଳରେ ସରକାର ଯୁବକଙ୍କ ଦାବି ମାନିବାକୁ ବାଧ୍ୟ ହେଲେ। 

ସୋମବାର ହଜାର ହଜାର ପ୍ରଦର୍ଶନକାରୀ ରାଜଧାନୀ ଆଣ୍ଟାନାନାରିଭୋ ଏବଂ ଅନ୍ୟାନ୍ୟ ସହରଗୁଡ଼ିକର ରାସ୍ତାକୁ ଓହ୍ଲାଇଥିଲେ । ଯାହା ଫଳରେ ସୁରକ୍ଷା ବାହିନୀକୁ ଭିଡ଼ ବିରୋଧରେ ପୁଣି ଥରେ ଲୁହବୁହା ଗ୍ୟାସ ବ୍ୟବହାର କରିବାକୁ ବାଧ୍ୟ କରାଯାଇଥିଲା । ଗତ ପାଞ୍ଚ ଦିନ ଧରି, ପ୍ରତିବାଦକାରୀମାନେ ରାସ୍ତାରେ ଟାୟାର ଜାଳିଛନ୍ତି । ଆଣ୍ଟାନାନାରିଭୋର ନୂତନ କେବୁଲ କାର୍ ସାର୍ବଜନୀନ ପରିବହନ ବ୍ୟବସ୍ଥାର ଅନେକ ଷ୍ଟେସନ ପୋଡ଼ି ଦିଆଯାଇଛି । ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି ଯେ କିଛି ରାଜନେତାଙ୍କ ଘର ଉପରେ ମଧ୍ୟ ଆକ୍ରମଣ କରାଯାଇଛି। ସରକାର ଗୁରୁବାରଠାରୁ ରାଜଧାନୀ ଆଣ୍ଟାନାନାରିଭୋରେ ଓ ଶୁକ୍ରବାରଠାରୁ ଅନ୍ୟ ପ୍ରମୁଖ ସହରଗୁଡ଼ିକରେ ରାତି କର୍ଫ୍ୟୁ ଜାରି କରିଛନ୍ତି। 

ସଂଯୁକ୍ତ ରାଷ୍ଟ୍ର ମାନବାଧିକାର କାର୍ଯ୍ୟାଳୟ ସୋମବାର କହିଛି ଯେ ପ୍ରତିବାଦ ସମୟରେ ସଂଘର୍ଷରେ ୨୨ ଜଣଙ୍କର ମୃତ୍ୟୁ ହୋଇଛି। ଏଥିପାଇଁ ଜାତିସଂଘ ଏଜେନ୍ସି ସୁରକ୍ଷା ବାହିନୀର ହିଂସାତ୍ମକ ପ୍ରତିକ୍ରିୟାକୁ ଦାୟୀ କରିଛି। ସଂସ୍ଥା କହିଛି ଯେ ୧୦୦ରୁ ଅଧିକ ଲୋକ ଆହତ ମଧ୍ୟ ହୋଇଛନ୍ତି । ଜାତିସଂଘ କାର୍ଯ୍ୟାଳୟ କହିଛି ଯେ ଗୁରୁବାର ଦିନ ପ୍ରତିବାଦ ଶାନ୍ତିପୂର୍ଣ୍ଣ ଭାବରେ ଆରମ୍ଭ ହୋଇଥିଲା, କିନ୍ତୁ ସୁରକ୍ଷା ବାହିନୀ ଅନାବଶ୍ୟକ ବଳ ବ୍ୟବହାର କରି ଲୁହବୁହା ଗ୍ୟାସ୍ ଫୁଟାଇଥିଲେ, ମାଡ଼ ମାରିଥିଲେ ଏବଂ ପ୍ରତିବାଦକାରୀଙ୍କୁ ଗିରଫ କରିଥିଲେ। 

ଏକ ବିବୃତ୍ତିରେ, ମାଡାଗାସ୍କରର ବୈଦେଶିକ ମନ୍ତ୍ରୀ, ରାସାତା ରାଫାରଭାଭିତାଫିକା, ଜାତିସଂଘର ମୃତ୍ୟୁ ସଂଖ୍ୟାକୁ ପ୍ରତ୍ୟାଖ୍ୟାନ କରିଛନ୍ତି ଏବଂ କହିଛନ୍ତି ଯେ ସରକାର ୨୨ ଜଣଙ୍କ ମୃତ୍ୟୁ ହୋଇଥିବା କଥାକୁ ଦୃଢ଼ ଭାବରେ ଅସ୍ୱୀକାର କରୁଛନ୍ତି। ତଥାପି, ମାଡାଗାସ୍କର କର୍ତ୍ତୃପକ୍ଷ ଏପର୍ଯ୍ୟନ୍ତ କେତେ ଲୋକ ମୃତ କିମ୍ବା ଆହତ ହୋଇଛନ୍ତି ସେ ବିଷୟରେ ନିଜସ୍ୱ ସଂଖ୍ୟା ପ୍ରକାଶ କରିନାହାଁନ୍ତି।