ନୂଆଦିଲ୍ଲୀ: ଅଶୋଧିତ ତୈଳ ମୂଲ୍ୟ ଚାରି ବର୍ଷର ସର୍ବନିମ୍ନ ସ୍ତରରେ (ବ୍ୟାରେଲ ପ୍ରତି ୬୫.୪୧ ଡଲାର) ପହଞ୍ଚିଛି। ପୂର୍ବରୁ ଏପ୍ରିଲ ୨୦୨୧ରେ, ମୂଲ୍ୟ ବ୍ୟାରେଲ ପିଛା ୬୩.୪୦ ଡଲାର ଥିଲା। ଏହି ହ୍ରାସ ଯୋଗୁ, ପେଟ୍ରୋଲ ଏବଂ ଡିଜେଲ ବିଶୋଧନରୁ କମ୍ପାନୀଗୁଡ଼ିକର ଆୟ ଐତିହାସିକ ସ୍ତରରେ ପହଞ୍ଚିଛି।

ରେଟିଂ ଏଜେନ୍ସିଗୁଡ଼ିକ ଅନୁସାରେ, ବର୍ତ୍ତମାନ ତୈଳ କମ୍ପାନୀଗୁଡ଼ିକ ପେଟ୍ରୋଲ ଉପରେ ପ୍ରତି ଲିଟର  ୧୨-୧୫ ଏବଂ ଡିଜେଲରେ ପ୍ରତି ଲିଟର ୬-୧୨ ଲାଭ କରୁଛନ୍ତି। ଏହା ସତ୍ତ୍ୱେ, ତେଲ କମ୍ପାନୀଗୁଡ଼ିକ ଗତ ବର୍ଷେ ହେଲାଣି ପେଟ୍ରୋଲ ଏବଂ ଡିଜେଲର ମୂଲ୍ୟ ହ୍ରାସ କରୁ ନାହାନ୍ତି। ଏନେଇ ଜାତୀୟ ଗଣାଧ୍ୟମ ମନି ଭାସ୍କରରେ ଖବର ପ୍ରକାଶ ପାଇଛି।

ନିକଟରେ ତେଲ କମ୍ପାନୀଗୁଡ଼ିକ ମୂଲ୍ୟ କମାଇବାର ସମ୍ଭାବନା ଥିଲା। କିନ୍ତୁ ସରକାର ଲିଟର ପିଛା ଉତ୍ପାଦ ଶୁଳ୍କ  ୨ ଟଙ୍କା ବୃଦ୍ଧି କଲେ। ଏହି ବାହାନାରେ ତେଲ କମ୍ପାନୀଗୁ଼ଡ଼ିକ ଦାମ କମାଇବାରୁ ବର୍ତ୍ତିଗଲେ। ଦୀର୍ଘ ସମୟ ହେଲାଣି ତେଲ କମ୍ପାନୀଗୁଡ଼ିକ କ୍ଷତି ହେଉଛି ବୋଲି କହି ମୂଲ୍ୟ କମାଉ ନାହାନ୍ତି। କିନ୍ତୁ ବାସ୍ତବତା ହେଉଛି ଯେ ଗତ ୫ ବର୍ଷ ମଧ୍ୟରେ, ୭ଟି ବଡ଼ ତେଲ ଏବଂ ଗ୍ୟାସ କମ୍ପାନୀ ମଧ୍ୟରୁ, କେବଳ ଗୋଟିଏ କମ୍ପାନୀ ଆଇଓସିଏଲ୍‌କୁ ୨୦୧୯-୨୦ ରେ ଥରେ ସାମାନ୍ୟ କ୍ଷତି ହୋଇଥିଲା। ଏହା ବ୍ୟତୀତ, ତୈଳ କମ୍ପାନୀଗୁଡ଼ିକ ବର୍ଷ ବର୍ଷ ଧରି ବିପୁଳ ଲାଭ କମାଉଛନ୍ତି, ହେଲେ ତୈଳ ଦର ହ୍ରାସ କରୁ ନାହାନ୍ତି। 

କେନ୍ଦ୍ର ସରକାରଙ୍କ ପେଟ୍ରୋଲିୟମ ମନ୍ତ୍ରଣାଳୟର ପେଟ୍ରୋଲିୟମ ପ୍ଲାନିଂ ଆଣ୍ଡ ଏନାଲଲିସି ସେଲ୍ ଅନୁଯାୟୀ, କେନ୍ଦ୍ର ଏବଂ ରାଜ୍ୟ ସରକାର ୫ ବର୍ଷ ମଧ୍ୟରେ ପେଟ୍ରୋଲ ଏବଂ ଡିଜେଲରୁ ୩୫ ଲକ୍ଷ କୋଟି ଟଙ୍କା ସଂଗ୍ରହ କରିଛନ୍ତି। ହେଲେ ଜନତାଙ୍କୁ କିଭଳି ମହଙ୍ଗା ମାଡ଼ରୁ ଟିକେ ଆଶ୍ୱସ୍ତି ମିଳିବ ସେ ଦିଗରେ କିନ୍ତୁ ଧ୍ୟାନ ଦିଆଯାଉ ନାହିଁ। 

ପଢନ୍ତୁ- ଚୀନ ତୁଳନାରେ ୨୦ ଶସ୍ତା ହେବା ଭାରତୀୟ ସାମଗ୍ରୀ: ଟ୍ରମ୍ପଙ୍କ ଶୁଳ୍କ ହ୍ରାସ ଭାରତ ପାଇଁ ମୌକା ବୋଲି କହିଲା ICEA

କେନ୍ଦ୍ର ସରକାରଙ୍କ ରୋଜଗାର ମୋଟ ୨୧.୪ ଲକ୍ଷ କୋଟି 

କେନ୍ଦ୍ର ସରକାର ଏକ୍ସାଇଡ୍ ଡ୍ୟୁଟି, କମ୍ପାନୀଗୁଡ଼ିକର ଲାଭାଂଶ ଏବଂ ଆୟକରରୁ ମୋଟ ୨୧.୪ ଲକ୍ଷ କୋଟି ଏବଂ ରାଜ୍ୟ ସରକାରଙ୍କଠାରୁ ଭାଟ୍ ଏବଂ ଲାଭାଂଶରୁ ଅଂଶ ଭାବରେ ୧୩.୬ ଲକ୍ଷ କୋଟି ଆୟ କରିଛନ୍ତି।

• ୨୦୨୩-୨୪ରେ ୭ଟି ପ୍ରମୁଖ ତୈଳ କମ୍ପାନୀ ୨.୨୯ ଲକ୍ଷ କୋଟି ଟଙ୍କା ଲାଭ କରିଥିଲେ। ଏମାନଙ୍କର ଗତ ୫ ବର୍ଷ ଧରି ନିରନ୍ତର ଲାଭ କରୁଛନ୍ତି। ୨୦୧୯-୨୦ରେ କେବଳ ଆଇଓସି ୯୩୪ କୋଟି ଟଙ୍କାର କ୍ଷତି ସହିଥିଲା। 

• ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (RIL) ଗତ ପାଞ୍ଚ ବର୍ଷ ମଧ୍ୟରେ ସର୍ବାଧିକ୨.୮୬ ଲକ୍ଷ କୋଟି ଲାଭ କରିଛି। ସେହିପରି ଲାଭ କମାଇବାରେ ONGC ଦ୍ୱିତୀୟ ସ୍ଥାନରେ ରହିଛି।

• ଏହି ତୈଳ କମ୍ପାନୀଗୁଡ଼ିକ ୨୦୧୯-୨୦ ଏବଂ ୨୦୨୩-୨୪ ମଧ୍ୟରେ ମୋଟ ୭ ଲକ୍ଷ କୋଟିରୁ ଅଧିକ ଲାଭ ଅର୍ଜନ କରିଛନ୍ତି। କିନ୍ତୁ ଲାଭର ଲୋଭରେ ଗ୍ରାହକମାନଙ୍କୁ ଯେମିତି ଏମାନେ ଭୁଲିଯାଇଛନ୍ତି।  

ପଢନ୍ତୁ- ଟାରିଫ ବିବାଦ: ସତର୍କ କଲେ UN ଶୀର୍ଷ ଅର୍ଥଶାସ୍ତ୍ରୀ, କହିଲେ-୩% ପର୍ଯ୍ୟନ୍ତ ହ୍ରାସ ହେବ ବିଶ୍ୱ ବ୍ୟାପାର

 ସବସିଡି ଖର୍ଚ୍ଚର ୮୫% ପେଟ୍ରୋଲ ଏବଂ ଡିଜେଲ ଦ୍ୱାରା ଭରଣା କରାଯାଉଛି।

୨୦୨୪-୨୫ ବର୍ଷରେ ରାଜ୍ୟ ସରକାରଙ୍କ ସବସିଡି ବିଲ୍ ୪.୭ ଲକ୍ଷ କୋଟି ଥିଲା। ଏହି ବର୍ଷ କେନ୍ଦ୍ରର ମୋଟ ସବସିଡି ୩.୮୧ ଲକ୍ଷ କୋଟି ଥିଲା। ଉଭୟକୁ ମିଶାଇଲେ, ଦେଶରେ ମୋଟ ସବସିଡି  ୮.୫୧ ଲକ୍ଷ କୋଟି ଥିଲା। ବଦଳରେ, ରାଜ୍ୟଗୁଡ଼ିକ ପେଟ୍ରୋଲ ଏବଂ ଡିଜେଲ ଉପରେ ଟିକସରୁ ୩.୨ ଲକ୍ଷ କୋଟି ପାଇଲେ ଏବଂ କେନ୍ଦ୍ର ୪ ଲକ୍ଷ କୋଟି ପାଇଲା।

ଉଭୟକୁ ମିଶାଇଲେ ମୋଟ ଆୟ ୭.୨ ଲକ୍ଷ କୋଟି ଥିଲା। ଅର୍ଥାତ୍, କେନ୍ଦ୍ର ଏବଂ ରାଜ୍ୟ ସରକାର ବଣ୍ଟନ କରୁଥିବା ସବସିଡିର ପ୍ରାୟ ୮୫% ପେଟ୍ରୋଲ ଏବଂ ଡିଜେଲ ଉପରେ ଟିକସ ଲଗାଇ ଆଦାୟ କରାଯାଇଥିଲା। କେନ୍ଦ୍ର ଏବଂ ରାଜ୍ୟ ସରକାରଙ୍କ ପାଇଁ ପେଟ୍ରୋଲ ଏବଂ ଡିଜେଲ ଆୟର ଏକ ପ୍ରମୁଖ ଉତ୍ସ ପାଲଟିଛି।

ସୂଚନା ଅନୁସାରେ, କେନ୍ଦ୍ର ସରକାର ପେଟ୍ରୋଲ ଉପରେ ୨୧.୯୦ ଟିକସ ଆଦାୟ କରୁଛନ୍ତି। ଦିଲ୍ଲୀ ସରକାର୧୫.୩୯ ଭାଟ୍ ଆଦାୟ କରନ୍ତି। ମୋଟ ଟିକସ ହେଉଛି ପ୍ରତି ଲିଟର ୩୭.୩୦। କେନ୍ଦ୍ର ସରକାର ଡିଜେଲ ଉପରେ ପ୍ରତି ଲିଟର ପିଛା ୧୭.୮୦ ଆଦାୟ କରନ୍ତି। ଦିଲ୍ଲୀ ସରକାର ପ୍ରତି ଲିଟର ପିଛା ଭାଟ୍ ଭାବରେ ୧୨.୮୩ ଆଦାୟ କରୁଛନ୍ତି। ସେହିପରି ଓଡ଼ିଶା ସରକାର ପେଟ୍ରୋଲ ଉପରେ ୨୮ ଓ ଡିଜେଲ ଉପରେ ୨୪ ପ୍ରତିଶତ ଭାଟ ସଂଗ୍ରହ କରୁଛନ୍ତି।