ନେତନ୍ୟାହୁଙ୍କ ଉପରେ ଖୁବ୍ ବର୍ଷିଲେ ଅସଦୁଦ୍ଦିନ ଓୱେସି, କହିଲେ- ବିଶ୍ୱର ସବୁଠୁ ବଡ଼ ଗୁଣ୍ଡା

ହାଇଦ୍ରାବାଦ : ହାଇଦ୍ରାବାଦରୁ ସାଂସଦ ଓ ଏଆଇଏମଆଇଏମ୍‌ ମୁଖ୍ୟ ଅସଦୁଦ୍ଦିନ ଓୱେସି ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍‌ ନେତନ୍ୟାହୁଙ୍କ ଉପରେ ଶନିବାର ଖୁବ୍‌ ବର୍ଷିଛନ୍ତି। ସେ ଇସ୍ରାଏଲର ପିଏମ୍‌ଙ୍କୁ ବିଶ୍ୱର ସବୁଠୁ ବଡ଼ ଗୁଣ୍ଡା କହି ଆଲ୍ଲା ତାଙ୍କ କଥା ବୁଝିବେ ବୋଲି କହିଛନ୍ତି। ଓୱେସି ପିଏମ୍‌ ମୋଦିଙ୍କ ଦ୍ୱାରା ଇସ୍ରାଏଲ-ଗାଜା ଶାନ୍ତି ଚୁକ୍ତି ଉପରେ କରାଯାଇ ଥିବା ପୋଷ୍ଟର ଉଲ୍ଲେଖ କରି ନେତନ୍ୟାହୁଙ୍କୁ ଟାର୍ଗେଟ୍‌ କରିଛନ୍ତି।

ଓୱେସି ଲୋକଙ୍କୁ ସମ୍ୱୋଧିତ କରି କହିଛନ୍ତି , ଆଜି ପିଏମ୍‌ ମୋଦି ଡୋନାଲ୍ଡ ଟ୍ରମ୍ପଙ୍କୁ ଶୁଭେଚ୍ଛା ଦେଇଛନ୍ତି ଏବଂ ନେତନ୍ୟାହୁଙ୍କ ଲିଡରଶିପ୍‌ର ପ୍ରଶଂସା କରିଛନ୍ତି। ନେତନ୍ୟାହୁ ବିଶ୍ୱର ସବୁଠୁ ବଡ଼ ଗୁଣ୍ଡା , ଯିଏକି ୨୦ ହଜାର ପିଲାଙ୍କ ସମେତ ୬୫ ହଜାର ଲୋକଙ୍କୁ ହତ୍ୟା କରିଛନ୍ତି। ୧୨ ଲକ୍ଷ ଲୋକ ବାସହରା ହୋଇ ଯାଇଛନ୍ତି। ପିଏମ୍‌ ତାଙ୍କର ଲିଡରସିପ୍‌ର ପ୍ରଶଂସା କରୁଛନ୍ତି। ହେଲେ କାହିଁକି ତାଙ୍କର ପ୍ରଶଂସା କରୁଛନ୍ତି ? ଆପଣ ତ ଭାରତର ପ୍ରଧାନମନ୍ତ୍ରୀ। ଆମେ ଏହି କଥାର ନିନ୍ଦା କରୁଛୁ ଯେ, ପିଏମ୍‌ ମୋଦି ନେତନ୍ୟାହୁଙ୍କର ଲିଡରସିପ୍‌ର ପ୍ରଶଂସା କରିଛନ୍ତି। ଆଲ୍ଲା ନେତନ୍ୟାହୁଙ୍କ କଥା ବୁଝି ନେବେ।

ଏଆଇଏମଆଇଏମ୍‌ ମୁଖ୍ୟ ଆହୁରି କହିଛନ୍ତି, ପିଏମ୍‌ ତାଙ୍କର ପ୍ରଶଂସା କରୁଛନ୍ତି,  କୌଣସି ନା କୌଣସି ସ୍ଥାନରେ ନିଶ୍ଚୟ କନେକ୍ସନ ଅଛି। ଏମିତି ଅଭ୍ୟାସ (ନେତନ୍ୟାହୁ)ର ବିରୋଧରେ ଇଣ୍ଟରନ୍ୟାସନାଲ କୋର୍ଟ ୱାରେଣ୍ଟ ଜାରି କରିଛି। ହିନ୍ଦୁତ୍ୱର ଲୋକ କହିବେ ଓୱେସି କଣ କହୁଛି। ଶୁଣନ୍ତୁ , କୁଳଭୂଷଣ ଯିଏ ପାକିସ୍ତାନ ଜେଲ୍‌ ଯାଇଛନ୍ତି ,ତାଙ୍କୁ ସଜା-ଏ-ମୌତ ଦେବାକୁ ଚାହୁଁ ଥିଲେ ତ ଭାରତ ଇଣ୍ଟରନ୍ୟାସନାଲ କୋର୍ଟ ଗଲା ଏବଂ ତାଙ୍କର ଦଣ୍ଡକୁ ରୋକିଥିଲା।

ଓୱେସି ପିଏମ୍‌ ମୋଦିଙ୍କ ଯେଉଁ ପୋଷ୍ଟର ଉଲ୍ଲେଖ କରିଛନ୍ତି , ଏଥିରେ ପ୍ରଧାନମନ୍ତ୍ରୀ ଲେଖି ଥିଲେ ଯେ, ରାଷ୍ଟ୍ରପତି ଟ୍ରମ୍ପଙ୍କ ଗାଜା ଶାନ୍ତି ଯୋଜନା ଅନୁସାରେ ହୋଇଥିବା ପ୍ରଗତିରେ ଶୁଭେଚ୍ଛା ଦେବା ପାଇଁ ନିଜର ବନ୍ଧୁ , ପ୍ରଧାନମନ୍ତ୍ରୀ ନେତନ୍ୟାହୁଙ୍କୁ ଫୋନ୍‌ କରିଥିଲି। ଆମେ ବନ୍ଧକଙ୍କ ମୁକ୍ତି ଓ ଗାଜାର ଲୋକଙ୍କୁ ମାନବୀୟ ସହାୟତା ବୃଦ୍ଧି ଉପରେ ହୋଇଥିବା ଚୁକ୍ତିର ସ୍ୱାଗତ କରୁଛୁ।