ନୂଆଦିଲ୍ଲୀ: ୱାର୍ଲଡ୍ ଟେଷ୍ଟ ଚାମ୍ପିଅନଶିପ୍ ୨୦୨୫ ଫାଇନାଲ୍କୁ ଭାରତ କ୍ୱାଲିଫାଏ ନକରିବା ଫଳରେ ଲର୍ଡ୍ସକୁ ବଡ଼ କ୍ଷତି ସହିବାକୁ ପଡ଼ିବ । ଜୁନ୍ରେ ପାଞ୍ଚ ଦିନିଆ ଫାଇନାଲ୍ ମ୍ୟାଚ୍ ଆୟୋଜନ କରିବା ବେଳେ ପ୍ରାୟ ୪ ମିଲିୟନ ପାଉଣ୍ଡ (ପ୍ରାୟ ୪୫ କୋଟି ଟଙ୍କା) କ୍ଷତି ହେବା ନେଇ ଆଶଂକା କରାଯାଉଛି । ଗତ ଦୁଇ ସିଜିନ୍ରେ ଉପବିଜେତା ରହିବା ପରେ ଚଳିତ ଥର ଭାରତ ଫାଇନାଲରେ ପ୍ରବେଶ କରିବାରେ ବିଫଳ ହେବା । ଟାଇଟଲ୍ ମୁକାବିଲା ପାଇଁ ଏବେ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମୁହାଁମୁହିଁ ହେବେ ।
'ଦ ଟାଇମ୍ସ' ରିପୋର୍ଟ ଅନୁସାରେ, 'ଭାରତ କ୍ୱାଲିଫାଏ କରିବାରେ ବିଫଳ ହେବା ଯୋଗୁ ଆଗାମୀ ଆଇସିସି ୱାର୍ଲଡ୍ ଟେଷ୍ଟ ଚାମ୍ପିଅନଶିପ୍ ଫାଇନାଲ୍ ପାଇଁ ଲର୍ଡର ରାଜସ୍ୱରେ ପ୍ରାୟ ୪ ମିଲିୟିନ ପାଉଣ୍ଡ କମ ହେବ ।' ଏଥିରେ କୁହାଯାଇଛି, 'ଭାରତର ଅନୁପସ୍ଥିତି ମେରିଲ୍ବୋନ୍ କ୍ରିକେଟ୍ କ୍ଲବ୍ (ଏମ୍ସିସି) ଦ୍ୱାରା ଆକଳନ କରାଯାଇଥିବା ଲାଭକୁ କାମ କରାଯାଇଛି, ଯାହା ବୈଶ୍ୱିକ ଖେଳରେ ଭାରତୀୟ କ୍ରିକେଟର ଆର୍ଥିକ ପ୍ରଭାବକୁ ଦର୍ଶାଉଛି ।'
ଆଇସିସି ୱାର୍ଲଡ୍ ଟେଷ୍ଟ ଚାମ୍ପିଅନଶିପ ପାଇଁ ଗତ ବର୍ଷ ଅଧିକାଂଶ ସମୟରେ ତାଲିକାର ଶୀର୍ଷ ଦୁଇ ଭିତରେ ରହିବା ସତ୍ତ୍ୱେ ରୋହିତ୍ ବାହିନୀ ଫାଇନାଲ୍ରେ ସ୍ଥାନ ପାଇପାରିଲା ନାହିଁ । ଘରୋଇ ଶୃଙ୍ଖଳାରେ ନ୍ୟୁଜିଲାଣ୍ଡଠାରୁ ୦-୩ରେ ହାରିବା ପରେ ତୃତୀୟ ସ୍ଥାନକୁ ଖସିଥିଲା । ଏହାପରେ ବର୍ଡର-ଗାଭାସ୍କାର ଟ୍ରଫି ସିରିଜରେ ଅଷ୍ଟ୍ରେଲିଆଠାରୁ ୧-୩ରେ ହାରିଥିଲା । ଏହି ଦୁଇ ଶୃଙ୍ଖଳାରେ ପରାଜୟ ପରେ ଟିମ୍ ଇଣ୍ଡିଆର ଫାଇନାଲ୍ରେ ପହଞ୍ଚିପାରିଲା ନାହିଁ ।
ଏମ୍ସିସି ଫାଇନାଲରେ ଭାରତ ପହଞ୍ଚିବା ଅନୁମାନ କରି ୱାର୍ଲଡ୍ ଟେଷ୍ଟ ଚାମ୍ପିଅନଶିପ ଫାଇନାଲ୍ ପାଇଁ ଟିକଟ୍ ମୂଲ୍ୟ ଅଧିକ ସ୍ଥିର କରିଥିଲା । ଭାରତ ଫାଇନାଲରେ ପହଞ୍ଚିବ ନାହିଁ ବୋଲି ସ୍ପଷ୍ଟ ହେବା ପରେ ଏମ୍ସିସି ଏବେ ଏଥିରେ ସଂଶୋଧନ କରି ଟିକଟ୍ ମୂଲ୍ୟକୁ କମ କରିଛି । ରିପୋର୍ଟରେ କୁହାଯାଇଛି, ୱାର୍ଲଡ୍ ଟେଷ୍ଟ ଚାମ୍ପିଅନଶିପ ଫାଇନାଲ୍ ପାଇଁ ଟିକଟ୍ ମୂଲ୍ୟ ୪୦ରୁ ୯୦ ପାଉଣ୍ଡ ବିକ୍ରି କରାଯାଉଛି । ଯାହା ମୂଳ ମୂଲ୍ୟଠାରୁ ୫୦ ପାଉଣ୍ଡ ଶସ୍ତା । ଯେଉଁଥି ପାଆଇଁ ରାଜସ୍ୱ ହ୍ରାସ କଥା କୁହାଯାଉଛି ।
