ୱାସିଂଟନ ୩୧।୧: ଗ୍ରହାଣୁ ବା ଆଷ୍ଟ୍ରଏଡ୍ ଯଦି ପୃଥିବୀ ସହ ଧକ୍କା ହୋଇଯାଏ ତେବେ ପ୍ରଳୟ ରଚିବ। କୁହାଯାଉଛି ଥରେ ଏହିପରି ଏକ ଗ୍ରହାଣୁ ପୃଥିବୀ ସହ ଧକ୍କା ହୋଇଥିଲା ଓ ଏହା ସହ ପୃଥିବୀ ବକ୍ଷରୁ ଡାୟନୋସର ବଂଶ ବିଲୁପ୍ତ ହୋଇଯାଇଥିଲା। ବୈଜ୍ଞାନିକମାନେ ଅନେକ ବାର ପୃଥିବୀ ସହ ଗ୍ରହାଣୁ ଧକ୍କା ନେଇ ଆଶଙ୍କା ପ୍ରକାଶ କରିଛନ୍ତି। ଏବେ ଆମେରିକୀୟ ମହାକାଶ ଗବେଷଣା ସଂସ୍ଥା ନାସାଙ୍କ ବୈଜ୍ଞାନିକ ଏପରି ଏକ ଗ୍ରହାଣୁକୁ ଅନ୍ତରୀକ୍ଷରେ ଠାବ କରିଛନ୍ତି ଯାହା ପୃଥିବୀ ସହିତ ଧକ୍କା ହୋଇପାରେ।
ଏହାକୁ ନେଇ ବୈଜ୍ଞାନିକମାନେ ଚେତାବନୀ ମଧ୍ୟ ଜାରି କରିଛନ୍ତି। ଏହି ଗ୍ରହାଣୁର ଆକାର ପାଖାପାଖି ୧୩୦ରୁ ୩୦୦ ଫୁଟ ଚୌଡା ହୋଇପାରେ। ଏହି ଗ୍ରହାଣୁକୁ ବୈଜ୍ଞାନିକମାନେ ୨୦୨୪ ୱାଇଆର-୪ ନାମରେ ନାମିତ କରିଛନ୍ତି। ଯାହା ପୃଥିବୀ ଲାଗି ବିପଦଜନକ ସାବ୍ୟସ୍ତ ହୋଇପାରେ। ନାସାଙ୍କ ବିଶ୍ଲେଷଣରୁ ଜଣା ପଡୁଛି ଯେ ଏହି ଗ୍ରହାଣୁ ପୃଥିବୀ ସହ ୨୨ଡିସେମ୍ବର ୨୦୩୨ରେ ଧକ୍କା ଲାଗିପାରେ। ଏହି ଗ୍ରହାଣୁକୁ ପ୍ରଥମ ଥର ୨୭ ଡିସେମ୍ବର ୨୦୨୪ରେ ଆଷ୍ଟ୍ରଏଡ୍ ଟେରେଷ୍ଟରିଆଲ ଇମ୍ପାକ୍ଟ ଲାଷ୍ଟ ଆଲର୍ଟ ସିଷ୍ଟମ (ଏଟିଏଲଏଏସ) ଦେଖିଥିଲା।
ଏହା ପରେ ଯେପରି ଏହା ସମ୍ପର୍କରେ ଅଧିକରୁ ଅଧିକ ସୂଚନା ଆସିବାକୁ ଲାଗିଲା ସେତେବେଳେ ବୈଜ୍ଞାନିକମାନେ ଚେତାବନୀ ଦେଇ ଏହି ଗ୍ରହାଣୁର ପୃଥିବୀ ସହ ଧକ୍କା ଲାଗିବାର ଆଶଙ୍କା କରିଛନ୍ତି। ବୈଜ୍ଞାନିକମାନେ ଆଷ୍ଟ୍ରଏଡ ୨୦୨୪ ୱାଇଆର-୪କକ୍ଷର ବିଶ୍ଲେଷଣ କରିବା ପରେ ଜାଣିବାକୁ ପାଇଛନ୍ତି ଯେ ଏହା ପ୍ରତି ୮ ବର୍ଷରେ ଥରେ ପୃଥିବୀକୁ ଅତି ନିକଟରୁ ଅତିକ୍ରମ କରୁଛି। ନାସାର ସେଣ୍ଟର ଫର ନିୟର ଆର୍ଥ ଅବଜେକ୍ଟ ଷ୍ଟଡିଜ (ସିଏନଇଓଏସ୍) ମୁତାବକ ଆଷ୍ଟ୍ରଏଡ୍ ୨୨ ଡିସେମ୍ବର ୨୦୩୨ରେ ପୃଥିବୀକୁ ଅତି ନିକଟରୁ ଅତିକ୍ରମ କରିବ।
ସେହି ସମୟରେ ଏହା ପୃଥିବୀରୁ ପାଖାପାଖି ୬୬,୦୦୦ ମାଇଲ ଅର୍ଥାତ ୧୦୬,୨୦୦ କିଲୋମିଟର ଦୂରରେ ଥିବ। ଯଦି ଏହାର କକ୍ଷପଥରେ ସାମାନ୍ୟ ପରିବର୍ତ୍ତନ ବି ହେଲା ତେବେ ଏହା ପୃଥିବୀ ସହିତ ଧକ୍କା ହୋଇଯାଇପାରେ। ୟୁରୋପୀୟ ମହାକାଶ ଏଜେନ୍ସୀ (ଇଏସଏ)ଙ୍କ ପ୍ଲାନେଟ୍ରି ଡିଫେନ୍ସ ଅଫିସ ମଧ୍ୟ ଏହାର ପୁଷ୍ଟି କରିଛି। ତେବେ ଏହି ଗ୍ରହାଣୁ ପୃଥିବୀଠୁ ସୁରକ୍ଷିତ ଦୂରତାରେ ଗତିକରିବାର ୯୯ ପ୍ରତିଶତ ସମ୍ଭାବନା ରହିଛି। ତେବେ ସମ୍ଭାବିତ ଧକ୍କାକୁ ଏବେଠୁ ସମ୍ପୂର୍ଣ୍ଣ ଖାରଜ କରାଯାଇ ନପାରେ।
NASA analysis of near-Earth asteroid 2024 YR4 indicates it has >1% chance of impacting Earth on Dec. 22, 2032, which also means there's ~99% chance this asteroid will not impact. Such initial analysis will change over time as more observations are gathered https://t.co/LMFH12K9N8 pic.twitter.com/WyXh0uUqeq
— NASA Asteroid Watch (@AsteroidWatch) January 29, 2025
ବୈଜ୍ଞାନିକଙ୍କ ଅନୁସାରେ ଆଷ୍ଟ୍ରଏଡ୍ ପୃଥିବୀ ସହ ଧକ୍କା ଲାଗିବାର ୧ ପ୍ରତିଶତ ସମ୍ଭାବନା ରହିଛି। ଏଥି ପାଇଁ ଆଷ୍ଟ୍ରଏଡ୍ ୨୦୨୪ ୱାଇଆର-୪କୁ ନେଇ ୟୁରୋପୀୟ ସ୍ପେସ୍ ଏଜେନ୍ସୀର ଇମ୍ପାକ୍ଟ ରିସ୍କ ଲିଷ୍ଟ ଓ ନାସାର ରିସ୍କ ଟେବୁଲରେ ଶୀର୍ଷରେ ରହିଛି। ବୈଜ୍ଞାନିକଙ୍କ ଅନୁସାରେ ଯଦି ଏହି ଆଷ୍ଟ୍ରଏଡ୍ ପୃଥିବୀ ବାୟୁମଣ୍ଡଳକୁ ପ୍ରବେଶ କରିଯାଏ ତେବେ ଏଥି ପାଇଁ ଏକ ଭୀଷଣ ବିସ୍ଫୋରଣ ହୋଇପାରେ। ଏହି ବିସ୍ଫୋରଣ ଯୋଗୁ ପୃଥିବୀରେ ପ୍ରଳୟ ଆସିପାରେ। ଏହା ପରେ ଯଦି ପୃଥିବୀରେ କେଉଁଠି ଏହା ମାଡ଼ ହୁଏ ସେଠାରେ ବିଶାଳ ଗର୍ତ୍ତ ସୃଷ୍ଟି କରିବ ଓ ପୁରା କ୍ଷେତ୍ରରେ ଭୂମିକମ୍ପ ଭଳି ପରିସ୍ଥିତି ସୃଷ୍ଟି କରିବ। ଯାହାଦ୍ୱାରା ବେଶ କ୍ଷୟକ୍ଷତି ବି ହୋଇପାରେ।
