ନୂଆଦିଲ୍ଲୀ,୨୯/୧୧: କର୍ଣ୍ଣାଟକ କ୍ଷମତା କନ୍ଦଳ ଦିଲ୍ଲୀରେ ପହଞ୍ଚିବା ପରେ କଂଗ୍ରେସ ହାଇକମାଣ୍ଡ ସେଥିରେ ହସ୍ତକ୍ଷେପ କରିଛନ୍ତି । ଉଭୟ ମୁଖ୍ୟମନ୍ତ୍ରୀ ସିଦ୍ଦରମୈୟା ଓ ଉପମୁଖ୍ୟମନ୍ତ୍ରୀ ଡିକେ ଶିବକୁମାରଙ୍କୁ ଏକାଠି ବସି ବିବାଦର ଆପୋସ ସମାଧାନ ଲାଗି ପରାମର୍ଶ ଦେଇଛନ୍ତି । ସେହିକ୍ରମରେ ଶନିବାର ଉଭୟଙ୍କ ମଧ୍ୟରେ ବୈଠକ ହେବ ବୋଲି ସୂଚନା ମିଳିଛି ।

ଶିବକୁମାରଙ୍କ ଏକ ବୟାନ ପରେ ଦଳୀୟ ହାଇକମାଣ୍ଡ ହସ୍ତକ୍ଷେପ କରିବାରୁ ଏହି ବୈଠକ ଡକାଯାଇଛି । ବେଙ୍ଗାଲୁରୁ ଠାରେ ଶିବକୁମାର କହିଥିଲେ ଯେ ୨୦୦୪ରେ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ଡକ୍ଟର ମନମୋହନ ସିଂହଙ୍କ ପାଇଁ ପ୍ରଧାନମନ୍ତ୍ରୀ ପଦ ଉତ୍ସର୍ଗ କରିଥିଲେ । ସେତେବେଳେ ସୋନିଆ ପ୍ରଧାନମନ୍ତ୍ରୀ ହୁଅନ୍ତୁ ବୋଲି ଏପିଜେ ଅବଦୁଲ କଲାମ ଅନୁରୋଧ କରିଥିଲେ ।

​​​​​​​

କିନ୍ତୁ ସୋନିଆ ମନାକରିବା ସହ ଡକ୍ଟର ସିଂହଙ୍କ ନାମ ପ୍ରଧାନମନ୍ତ୍ରୀ ପଦ ଲାଗି ଚୟନ କରିଥିଲେ । ମଜାର କଥା ହେଉଛି କି ସିଦ୍ଦରମୈୟାଙ୍କ ଉପସ୍ଥିତିରେ ସେ ଏହି ବୟାନ ଦେଇଥିଲେ । ୨୦୨୩ କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସ ବିଜୟୀ ହେବା ପରେ ମୁଖ୍ୟମନ୍ତ୍ରୀ କିଏ ହେବେ ତାକୁ ନେଇ ବିବାଦ ଆରମ୍ଭ ହୋଇଥିଲା ।

କୁହାଯାଉଛି କି କଂଗ୍ରେସର ନେତୃତ୍ୱ ସେତେବେଳେ କୁଆଡେ ପ୍ରତିଶ୍ରୁତି ଦେଇଥିଲେ ଯେ ସିଦ୍ଦରମୈୟା ୨.୫ ବର୍ଷ ମୁଖ୍ୟମନ୍ତ୍ରୀ ରହିବା ପରେ ଶିବକୁମାର ପରବର୍ତ୍ତୀ ୨.୫ ବର୍ଷ ମୁଖ୍ୟମନ୍ତ୍ରୀ ହେବେ । ସିଦ୍ଦରମୈୟାଙ୍କ ୨.୫ ବର୍ଷ ନଭେମ୍ବର ୨୦ରେ ଶେଷ ହୋଇଛି । ତେଣୁ ଶିବକୁମାରଙ୍କ ସମର୍ଥକ ତାଙ୍କୁ ମୁଖ୍ୟମନ୍ତ୍ରୀ କରାଇବା ଲାଗି ଦାବି କରିଛନ୍ତି । କିନ୍ତୁ ଏଭଳି କୌଣସି ପ୍ରତିଶ୍ରୁତିକୁ ସିଦ୍ଦରମୈୟା ଖଣ୍ଡନ କରିଛନ୍ତି ।