ପ୍ରଧାନମନ୍ତ୍ରୀଙ୍କ ଚେତାବନୀ, ଦିଲ୍ଲୀ ବିସ୍ଫୋରଣର କାରପାଟଦାରଙ୍କୁ ମିଳିବନି ତ୍ରାହି: ଏଲଏନଜେପି ହସପିଟାଲରେ ଆହତଙ୍କୁ ଭେଟି ଦେଲେ ଭରସା

ନୂଆଦିଲ୍ଲୀ: ଭୂଟ୍ଟାନରୁ ଫେରିବା ପରେ ଡାକ୍ତରଖାନାକୁ ଯାଇ ଲାଲ୍କିଲ୍ଲା ସମ୍ମୁଖରେ ଘଟିଥିବା କାର ବିସ୍ଫୋରଣରେ ଆହତଙ୍କୁ ଭେଟିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପଡୋଶୀ ଭୂଟ୍ଟାନକୁ ଦୁଇ ଦିନିଆ ଗସ୍ତରେ ଯାଇଥିଲେ ପ୍ରଧାନମନ୍ତ୍ରୀ । ଏପଟେ ସୋମବାର ସଂଧ୍ୟାରେ ଲାଲକିଲ୍ଲା ସମ୍ମୁଖରେ କାର ବିସ୍ଫୋରଣରେ ଯାଇଛି ୧୩ ଜଣଙ୍କ ଜୀବନ । ଡଜନେରୁ ଅଧିକ ଲୋକ ଆହତ ହୋଇ ଏଲ୍ଏନଜେପି ହସପିଟାଲରେ ଚିକିତ୍ସାଧିନ ଅଛନ୍ତି । ପ୍ରଧାନମନ୍ତ୍ରୀ ବୁଧବାର ଦିଲ୍ଲୀରେ ଅବତରଣ ପରେ ତୁରନ୍ତ କେନ୍ଦ୍ରୀୟ ଦିଲ୍ଲୀ ସ୍ଥିତ ଡାକ୍ତରଖାନାକୁ ଯାଇ ସେହି ବିସ୍ଫୋରଣ ପୀଡିତଙ୍କୁ ଭେଟିଛନ୍ତି । ସେମାନଙ୍କ ସ୍ବାସ୍ଥ୍ୟାବସ୍ଥା ଓ ଚିକିତ୍ସା ସଂପର୍କରେ ବୁଝିଛନ୍ତି । ଏହାସହ ବିସ୍ଫୋରଣ ସଂପର୍କୀତ ଏକ ଗୁରୁତ୍ବପୂର୍ଣ୍ମ ବୈଠକରେ ପ୍ରଧାନମନ୍ତ୍ରୀ ଯୋଗ ଦେବାର କାର୍ଯ୍ୟକ୍ରମ ରହିଛି ।

ସାରା ଦେଶକୁ ଥରାଇଦେଇଛି ୧୦/୧୧ ଦିଲ୍ଲୀ କାର ବୋମା ବିସ୍ଫୋରଣ । ତେବେ ଏନେଇ ବିଦେଶ ମାଟିରୁ ବି ଷଡୟନ୍ତ୍ରକାରୀଙ୍କୁ ପ୍ରଧାନମନ୍ତ୍ରୀ ଦେଇସାରିଛନ୍ତି ଚେତାବନୀ । ବିସ୍ଫୋରଣ ଘଟାଇଥିବା , ସେଥିରେ ସଂପୃକ୍ତ ଥିବା କେହି ବି ଜଣେ ଅଭିଯୁକ୍ତ ଏବଂ ଷଡୟନ୍ତ୍ରକାରୀ ନିସ୍ତାର ପାଇବେ ନାହିଁ । ସେମାନଙ୍କୁ ନିଶ୍ଚିତ ଭାବେ ଆଇନର କାଠଗଡ଼ାରେ ଛିଡ଼ାକରାଯିବ । କାହାରିକୁ ମଧ୍ୟ ଛଡାଯିବ ନାହିଁ । ଆଉ ବୁଧବାର ଆହତଙ୍କୁ ସାକ୍ଷାତ କରିସାରିବା ପରେ ସେହି କଥା ଦୋହରାଇଛନ୍ତି ପ୍ରଧାନମନ୍ତ୍ରୀ । “ ଆଜି ମୁଁ ଏକ ବ୍ୟଥିତ ହୃଦୟରେ ଏଠାକୁ ଆସିଛି । ସୋମବାର ଲାଲ୍କିଲ୍ଲା ସାମ୍ନାରେ ଘଟିଥିବା ଅଭାବନୀୟ ଘଟଣା ମୋତେ ଗଭୀର ବେଦନା ଦେଇଛି । ଏହି ଭୟାନକ ଏବଂ ନୃଶଂସ ଘଟଣା ସମସ୍ତଙ୍କ ପାଇଁ ଅତି ଦୁଃଖଦ ଏବଂ କଷ୍ଟକର । ମୁଁ ପୀଡିତ ପରିବାରଙ୍କ ଦୁଃଖ ଓ ବେଦନାକୁ ଅନୁଭବ କରୁଛି । ତେବେ ଏହି କ୍ଷଣରେ ସାରା ଦେଶ ସେହି ପରିବାର ମାନଙ୍କ ପଛରେ ଛିଡା ହୋଇଛି । “ ଏହା କହିଛନ୍ତି ପ୍ରଧାନମନ୍ତ୍ରୀ ।

ପ୍ରଧାନମନ୍ତ୍ରୀ ଆହୁରି କହିଛନ୍ତି, ଦିଲ୍ଲୀରେ ଏହି ଅଘଟଣ ଘଟିବା ସମୟରୁ ହିଁ ସେ, ସମସ୍ତ ଘଟଣାକ୍ରମ ଉପରେ ନଜର ରଖିଛନ୍ତି । ତଦନ୍ତ ପ୍ରକିୟାକୁ ପ୍ରତ୍ୟକ୍ଷଭାବେ ଅନୁଧ୍ୟାନ କରୁଛନ୍ତି । ସେ ତଦନ୍ତକାରୀ ଏଜେନ୍ସୀ ଗୁଡିକ ସହ ନିରନ୍ତରଭାବେ ଯୋଗାଯୋଗରେ ଅଛନ୍ତି ଏବଂ ପ୍ରତିଟି ତଦନ୍ତ ଦିଗ ଉପରେ ମଧ୍ୟ ଦୃଷ୍ଟି ରଖିଛନ୍ତି। “ ଏହି ଭୟାନକ ହିଂସାରେ ସଂପୃକ୍ତ ଦେୋଷୀଙ୍କୁ କେବେ ବି ଛଡ଼ାଯିବ ନାହିଁ । ଷଡୟନ୍ତ୍ରକାରୀଙ୍କୁ ତ୍ରାହୀ ମିଳିବ ନାହିଁ । ଆମ ତଦନ୍ତକାରୀ ଟିମ୍ ଘଟଣାର ମୂଳକୁ ନିଶ୍ଚିତ ଭାବେ ଯିବେ ଏବଂ ଷଡୟନ୍ତ୍ରକାରୀଙ୍କ ପାଖରେ ହିଁ ପହଞ୍ଚିବେ । ସମସ୍ତ ଦେଷୀଙ୍କୁ ଆଇନର କାଠଗଡ଼ାକୁ ଅଣାଯିବ। “

ବୁଧବାର ସୁରକ୍ଷା ସଂପର୍କୀତ ତଥା ଦିଲ୍ଲୀ ବିସ୍ଫୋରଣ ସଂକ୍ରାନ୍ତ ଏକ ଗୁରୁତ୍ବପୂର୍ଣ୍ଣ ବୈଠକରେ ପ୍ରଧାନମନ୍ତ୍ରୀ ଅଧ୍ୟକ୍ଷତା କରିବାର କାର୍ଯ୍ୟକ୍ରମ ରହିଛି । ସେପଟେ ମଙ୍ଗଳବାର ଦୁଇଟି ଗୁରୁତ୍ବପୂର୍ଣ୍ଣ ବୈଠକରେ ଗୃହମନ୍ତ୍ରୀ ଅମିତ ଶାହ, ଦିଲ୍ଲୀ ବିସ୍ଫୋରଣ ଘଟଣାର ତଦନ୍ତ ସ୍ଥିତି ନେଇ ଅନୁଧ୍ୟାନ କରିଛନ୍ତି । ବିଭିନ୍ନ ସୁରକ୍ଷା ଏଜେନ୍ସିର ଅଫିସର ଏବଂ ଅନ୍ୟ ବରିଷ୍ଠ ଅଧିକାରୀଙ୍କୁ ନେଇ ଅନୁଷ୍ଠିତ ବୈଠକରେ ସେ ମଧ୍ୟ ତ୍ବରିତ ଯାଞ୍ଚ ଉପରେ ଫୋକସ କରିଛନ ସେ । ଏହାସହ ତୁରନ୍ତ ଦୋଷୀଙ୍କୁ ଖୋଜି ବାହାର କରି ବିଚାରର ସାମ୍ନାକୁ ଆଣିବାକୁ ଅଫିସରଙ୍କୁ ନିର୍ଦ୍ଦେଶ ଦେଇଛନ୍ତି ଅମିତ ଶାହ ।