ନୂଆଦିଲ୍ଲୀ: ଦିଲ୍ଲୀ ପ୍ରିମିୟର୍ ଲିଗ୍ ମ୍ୟାଚ୍ରେ ବିବାଦକୁ ଖେଳାଳିଙ୍କ ଉପରେ ଆକ୍ସନ ହୋଇଛି । ନୀତୀଶ ରାଣାଙ୍କ ସମେତ ପାଞ୍ଚ ଖେଳାଳିଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଏଥିରେ ଖେଳାଳିଙ୍କ ଉପରେ ମ୍ୟାଚ୍ ଫି’ର ୩୦ରୁ ୧୦୦ ପ୍ରତିଶତ ଯାଏ ଜରିମାନା ଲଗାଯାଇଛି । ଉଲ୍ଲେଖଯୋଗ୍ୟ ଯେ ଦିଲ୍ଲୀ ସୁପରଷ୍ଟାର୍ସ ଓ ୱେଷ୍ଟ ଦିଲ୍ଲୀ ଲାୟନ୍ସ ମଧ୍ୟରେ ଡିପିଏଲ୍ର ଏଲିମିନେଟର୍ ମ୍ୟାଚ୍ ବେଳେ ଖେଳାଳିଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା ।
ୱେଷ୍ଟ ଦିଲ୍ଲୀର ବ୍ୟାଟର କ୍ରିଶ୍ ଯାଦବଙ୍କ ସାଉଥ୍ ଦିଲ୍ଲୀର କିଛି ଖେଳାଳିଙ୍କ ସହ ମ୍ୟାଚ୍ ବେଳେ ଝଗଡ଼ା ହୋଇଥିଲା । ୱେଷ୍ଟ ଦିଲ୍ଲୀର ୧୧ତମ ଓଭରରେ କ୍ରିଶ୍ ଅମନ ଭାରତୀଙ୍କ ବଲ୍ ଉପରେ ଏକ ସଟ୍ ମାରିଥିଲେ, କିନ୍ତୁ ଅନମୋଲ ଶର୍ମାଙ୍କ ହାତରେ କ୍ୟାଚ୍ ହୋଇଥିଲେ । କ୍ରିଶ ପାଭିଲିୟନ୍ ଫେରିବା ବେଳେ ଅମନ୍ ଆକ୍ରମଣାତ୍ମକ ସେଲିବ୍ରେସନ କରି କ୍ରିଶଙ୍କୁ କିଛି କହିବାକୁ ଲାଗିଲେ । ଏହା ପରେ କ୍ରିଶ୍ ତାଙ୍କ ପାଖକୁ ଯାଇ କିଛି କହିବାକୁ ଲାଗିଲେ, ଯାହା ପରେ ବିବାଦ ବଢ଼ିଥିଲା । ସାଉଥ୍ ଦିଲ୍ଲୀର ଖେଳାଳି ସୁମିତ୍ ମାଥୁର ମଧ୍ୟ ଏଥିରେ ବିବାଦରେ ଡେଇଁଥିଲେ ଏବଂ ଯୁକ୍ତିତର୍କ ବଢ଼ିଥିଲା । ସ୍ଥିତିକୁ ଶାନ୍ତ କରିବା ପାଇଁ, ନୀତିଶ ରାଣା ଏବଂ ଜଣେ ମହିଳା ଅମ୍ପାୟର ହସ୍ତକ୍ଷେପ କରି ଝଗଡ଼ା କରୁଥିବା ଖେଳାଳିମାନଙ୍କୁ ଅଲଗା କରିଥିଲେ ।
ମ୍ୟାଚ୍ ବେଳେ ଖରାପ ବ୍ୟବହାର ପାଇଁ ୱେଷ୍ଟ ଦିଲ୍ଲୀ ଲାୟନ୍ସର କ୍ରିଶ ଯାଦବଙ୍କୁ ସର୍ବାଧିକ ଜରିମାନା ଲଗାଯାଇଛି । ତାଙ୍କୁ ମ୍ୟାଚ୍ ଫି’ର ୧୦୦ ପ୍ରତିଶତ ଜରିମାନା ଲଗାଯାଇଛି । ପ୍ରତିପକ୍ଷ ଖେଳାଳିଙ୍କ ପ୍ରତି ଅପମାନଜନକ ଭାଷା ବ୍ୟବହାର କରିବା ଏବଂ ତାଙ୍କ ବ୍ୟାଟ୍ ଦେଖାଇବା ପାଇଁ କ୍ରିଶ ଯାଦବଙ୍କୁ ଧାରା ୨.୩ (୨) ଅନୁଯାୟୀ ଆଚରଣ ସଂହିତାର ଉଲ୍ଲଂଘନ କରିବା ପାଇଁ ତାଙ୍କ ମ୍ୟାଚ୍ ଫିର ୧୦୦ ପ୍ରତିଶତ ଜରିମାନା କରାଯାଇଛି । ଖେଳ ଭାବନା ବିପରୀତ ଆଚରଣ ପାଇଁ ଧାରା ୨.୨ (୨) ଅନୁଯାୟୀ ଦିଗବେଶ ରାଠିଙ୍କୁ ତାଙ୍କ ମ୍ୟାଚ୍ ଫିର ୮୦ ପ୍ରତିଶତ ଜରିମାନା କରାଯାଇଛି । ସେହିପରି ନୀତୀଶ ରାଣାଙ୍କୁ ଧାରା ୨.୬(୧) ଅନୁଯାୟୀ ଆଚରଣ ସଂହିତାର ଉଲ୍ଲଂଘନ ଲାଗି ୫୦ ପ୍ରତିଶତ ଜରିମାନା ଲଗାଯାଇଛି । ସାଉଥ୍ ଦିଲ୍ଲୀ ସୁପରଷ୍ଟାର୍ସର ସୁମିତ୍ ମାଥୁରଙ୍କୁ ତାଙ୍କ ମ୍ୟାଚ୍ ଫି’ର ୫୦ ପ୍ରତିଶତ ଜରିମାନା ଲଗାଯାଇଛି ।
