ନୂଆଦିଲ୍ଲୀ ୨୧।୩: ଗତ କିଛି ବର୍ଷ ହେଲା ବିଶ୍ୱର ଅନ୍ୟଭାଗ ଭଳି ଭାରତରେ ମଧ୍ୟ ପାଣିପାଗର ମିଜାଜ ବେଶ୍ ବଦଳି ଯାଇଛି। ଏଥିରୁ ଭବିଷ୍ୟତ ଅନିଶ୍ଚିତ ହୋଇପଡିଛି। ଯାହାର ସବୁଠୁ ବଡ଼ ପ୍ରଭାବ ଏବେ ଫସଲ ଉତ୍ପାଦନ ଉପରେ ସ୍ପଷ୍ଟ ଦେଖାଯାଉଛି। ଏହି ସ୍ଥତି ଖାଦ୍ୟଶସ୍ୟ ଉତ୍ପାଦନ ବଢ଼ାଇବା ପାଇଁ କରାଯାଉଥିବା ଉଦ୍ୟମକୁ ଏବେ ନିଷ୍ଫଳ କଲାଣି। ଏହି କଥା ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)ଙ୍କ ଦ୍ୱାରା ଜାରି ମାସିକ ବୁଲେଟିନର ଏକ ଆଲେଖ୍ୟରେ କୁହାଯାଇଛି।
ଏଥିରେ ଆରବିଆଇ କ୍ଷେତ୍ର ଅନୁସାରେ ଓ ଫସଲ ଆଧାରରେ ବ୍ୟାପକ ଅଧ୍ୟୟନ ପୂର୍ବକ ଜଳସେଚନ ବ୍ୟବସ୍ଥା ନିମନ୍ତେ ସରକାର ନୂଆ ନୀତି ପ୍ରସ୍ତୁତ କରନ୍ତୁ ବୋଲି ପରାମର୍ଶ ଦେଇଛି। ଖାସ କରି ମକା, ଡାଲିଜାତୀୟ ଓ ତୈଳ ବିଜ ଉତ୍ପାଦନ ନିମନ୍ତେ ପାଣିପାଗ ଅନୁସାରେ ଅତ୍ୟଧିକ ପରିବର୍ତ୍ତନର ଆବଶ୍ୟକତା ରହିଥିବା କୁହାଯାଇଛି। ଡାଲି ଓ ତୈଳ ବିଜ ଉତ୍ପାଦନ ଦେଶର ସାଧାରଣ ମୁଦ୍ରାସ୍ପିତି ଉପରେ ଢେର ପ୍ରଭାବ ପକାଉଛି। ଏଣୁ କେନ୍ଦ୍ରୀୟ ବ୍ୟାଙ୍କ ଫସଲ ଉତ୍ପାଦନକୁ ନେଇ ସରକାରଙ୍କ ଧ୍ୟାନ ଆକର୍ଷିତ କରିଛନ୍ତି।
ଆରବିଆଇ ଗବେଷକମାନେ ଦେଶର ବିଭିନ୍ନ ଭାଗରେ ଖାଦ୍ୟଶସ୍ୟ ଉତ୍ପାଦନର ପାଟର୍ଣ୍ଣକୁ ଦୀର୍ଘ ସମୟଧରି ଅତି ନିକଟରୁ ଅଧ୍ୟୟନ କରିବା ପରେ ଏହି ଆଲେଖ୍ୟ ପ୍ରକାଶନ କରିଛନ୍ତି। ଏଥିରେ ମୋଟାମୋଟି ଭାବେ ଏ କଥା କୁହାଯାଇଛି ଯେ ଭାରତରେ ଏବେବି ଅନେକ ପ୍ରକାରର ଖାଦ୍ୟଶସ୍ୟ ଉତ୍ପାଦନ ପାଣିପାଗ ଉପରେ ନିର୍ଭରଶୀଳ। ଏଥିରେ ଧାନ,ଗହମ, ଡାଲି ଓ ତୈଳବିଜ ଉତ୍ପାଦନ ସ୍ତର ଅନେକାଂଶରେ ପାଣିପାଗ ଉପରେ ନିର୍ଭରଶୀଳ। କେବେ ଆବଶ୍ୟକତା ଠାରୁ ଅଧିକ ତ ଆଉ କେବେ ଆବଶ୍ୟକତା ଠାରୁ କମ୍ ବର୍ଷା ଉତ୍ପାଦନର ଗଣିତକୁ ବିଗାଡି ଦେଉଛି।
ଏଣୁ କ୍ଷେତ୍ର ଅନୁସାରେ ଓ ଫସଲକୁ ଦେଖି ଯଦି ଜଳ ପରିଚାଳନା କରାଯାଏ ତେବେ ପାଣିପାଗ ଅନିଶ୍ଚିତତାରୁ ରକ୍ଷା ମିଳିପାରିବ। ଉଦାହରଣ ରୂପେ ଯେଉଁ କ୍ଷେତ୍ରରେ ଆବଶ୍ୟକତାଠାରୁ ଅଧିକ ବର୍ଷା ହେଉଛି ସେଠାରେ ନିର୍ଦ୍ଧାରିତ ସମୟ ପୂର୍ବରୁ ବିଜରୋପଣ କରିବାକୁ ପରାମର୍ଶ ଦିଆଯାଇଛି। ଯଦି ମକା ଫସଲ ଲାଗି ଏପରି ପ୍ରବନ୍ଧନ କରାଯାଇ ପାରନ୍ତା ତେବେ ଭଲ ହୁଅନ୍ତା। ନୀତି ନିର୍ଦ୍ଧାରକମାନେ ପାଗରେ ହେଉଥିବା ପରିବର୍ତ୍ତନ ଅନୁସାରେ ଜଳ ନିଷ୍କାସନ ବ୍ୟବସ୍ଥା, ଫସଲର ବିବିଧକରଣ ଆଦି ଉପରେ ଧ୍ୟାନ ଦେବା ଦରକାର ଯାହାଦ୍ୱାରା ଉତ୍ପାଦନ ଉପରେ କମରୁ କମ ପ୍ରଭାବ ପଡିବ।
ଏହି ବିସ୍ତୃତ ଆଲେଖ୍ୟରେ ୨୦୨୩ ଓ ୨୦୨୪ ବର୍ଷରେ ପାଣିପାଗ ପରିବର୍ତ୍ତନ ଓ ଖାଦ୍ୟଶସ୍ୟ ଉତ୍ପାଦନର ଲେଖାଙ୍କନ କରାଯାଇଛି। ଏହି ଦୁଇ ବର୍ଷରେ ମୌସୁମୀ ସ୍ୱଭାବିକ ରହୁଥିବା ଅଞ୍ଚଳରେ କମ ବର୍ଷା ରେକର୍ଡ ହୋଇଛି। ୨୦୨୩ରେ ଏପରି ୧୨୧ ଜିଲ୍ଲା ଥିଲେ ଯେଉଁଠି ମୌସୁମୀ ସ୍ୱଭାବିକ ଥିଲା। ହେଲେ ୨୦୨୪ରେ ଏହି ଜିଲ୍ଲାଗୁଡିକରେ ମୌସୁମୀ ଅସ୍ୱଭାବିକ ଥିଲା। ଯଦି ଏହି ଜିଲ୍ଲାମାନଙ୍କର ଖାଦ୍ୟ ଶସ୍ୟ ଉତ୍ପାଦନ ଦେଖାଯାଏ ତେବେ କେବଳ ଧାନ ଫସଲ ହିଁ ଲକ୍ଷ୍ୟପୁରଣ କରିବାରେ ସକ୍ଷମ ହୋଇଥିଲା। ଏଠାରେ ତୈଳବିଜ ଓ ଡାଲିଜାତୀୟ ଖାଦ୍ୟଶସ୍ୟ ଉତ୍ପାଦନ ଲକ୍ଷ୍ୟ ପୂରଣ ହୋଇ ପାରି ନଥିଲା।
