ନୂଆଦିଲ୍ଲୀ: ଆପଲ୍ ଆସନ୍ତା ବର୍ଷରୁ ଆମେରିକାରେ ବିକ୍ରି ହେବାକୁ ଥିବା ସମସ୍ତ ଆଇଫୋନ୍ ଭାରତରେ ତିଆରି କରିବାକୁ ଯୋଜନା କରୁଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦ୍ୱାରା ବିଶ୍ୱର ବିଭିନ୍ନ ଦେଶ ଉପରେ ଶୁଳ୍କ ଲାଗୁ କରିବା, ଓ ଚୀନ୍ ସହିତ ଶୁଳ୍କ ଯୁଦ୍ଧ ଯୋଗୁ କମ୍ପାନୀ ଏହି ନିଷ୍ପତ୍ତି ନେଇଛି। ଏନେଇ ଫାଇନାନ୍ସିଆଲ୍ ଟାଇମ୍ସରେ ରିପୋର୍ଟ ପ୍ରକାଶ ପାଇଛି।

ଚୀନ୍ ଉପରେ ନିର୍ଭରଶୀଳତା କମ କରିବା ପାଇଁ, ଆପଲ୍ ଦୀର୍ଘ ସମୟ ଧରି ଏହାର ଯୋଗାଣ ଶୃଙ୍ଖଳାକୁ ସେଠାରୁ ବାହାରକୁ ସ୍ଥାନାନ୍ତର କରିବାକୁ ଚେଷ୍ଟା କରୁଛି। ଏନେଇ କାମ ଜାରି ରହିଛି। ଯଦି ଆପଲ୍ ଏହି ବର୍ଷ ଶେଷ ସୁଦ୍ଧା ଏହାର ଆସେମ୍ବଲିକୁ ଭାରତକୁ ସ୍ଥାନାନ୍ତର କରେ, ତେବେ ୨୦୨୬ରୁ ପ୍ରତିବର୍ଷ ଏଠାରେ ୬ କୋଟିରୁ ଅଧିକ ଆଇଫୋନ୍ ଉତ୍ପାଦନ ହେବ। ବର୍ତ୍ତମାନ ଭାରତରେ ଉତ୍ପାଦନ ହେଉଥିବା ଆଇଫୋନ କ୍ଷମତାର ଏହା ଦୁଇଗୁଣ।

ପଢନ୍ତୁ- ଭାରତର କାର୍ଯ୍ୟାନୁଷ୍ଠାନରେ ଆତଙ୍କିତ ପାକିସ୍ତାନ, ସେୟାର ବଜାର କ୍ରାସ୍, PSX ୱେବସାଇଟ୍ ବନ୍ଦ

ବର୍ତ୍ତମାନ ଆଇଫୋନ ଉତ୍ପାଦନରେ ଚୀନ୍ ଶୀର୍ଷରେ ରହିଛି। ଆଇଡିସି ଅନୁଯାୟୀ, ୨୦୨୪ ମସିହାରେ କମ୍ପାନୀର ବିଶ୍ୱବ୍ୟାପୀ iPhone ରପ୍ତାନୀରେ ଚୀନର ଶେୟାର ୨୮% ହେବ ବୋଲି ଆକଳନ କରାଯାଇଥିଲା। ତେବେ ଆମେରିକା ବଜାରରେ ବିକ୍ରି ହେଉଥିବା ଆଇଫୋନର ଉତ୍ପାଦନ ଚୀନ୍ ବାହାରକୁ ସ୍ଥାନାନ୍ତରିତ କରିବା ଦ୍ୱାରା କମ୍ପାନୀକୁ ଉଚ୍ଚ ଶୁଳ୍କରୁ ମୁକ୍ତି ମିଳିବ ବୋଲି ରିପୋର୍ଟରେ କୁହାଯାଇଛି। 

ଭାରତୀୟ ବଜାର ଉପରେ ଆପଲ୍ ଏତେ ଇଣ୍ଟରେଷ୍ଟ କାହିଁକି?

• ସପ୍ଲାଏ ଚେନ ଡାଇଭର୍ସିଫିକେସନ: ଆପଲ୍ ଚୀନ୍ ଉପରେ ଏହାର ନିର୍ଭରଶୀଳତା ହ୍ରାସ କରିବାକୁ ଚାହୁଁଛି। ଭୂରାଜନୈତିକ ଉତ୍ତେଜନା, ବାଣିଜ୍ୟ ବିବାଦ ଏବଂ କୋଭିଡ୍ -୧୯ ଲକଡାଉନ୍ ଭଳି ସମସ୍ୟା ଯୋଗୁ, କମ୍ପାନୀ ଅନୁଭବ କରୁଛି ଯେ ଗୋଟିଏ କ୍ଷେତ୍ର ଉପରେ ଅତ୍ୟଧିକ ନିର୍ଭର କରିବା ଠିକ୍ ନୁହେଁ। ଏହି ଦୃଷ୍ଟିରୁ, ଭାରତ ଆପଲ୍ ପାଇଁ ଏକ କମ୍ ବିପଦପୂର୍ଣ୍ଣ ବିକଳ୍ପ ଭାବରେ ପ୍ରମାଣିତ ହେଉଥିବା କମ୍ପାନୀ ବିଚାର କରୁଛି।

• ସ୍ୱଳ୍ପ ଶ୍ରମ ମୂଲ୍ୟ: ଭାରତ ଚୀନ୍ ତୁଳନାରେ କମ୍ ମୂଲ୍ୟରେ ଶ୍ରମ ଯୋଗାଇଥାଏ, ଯାହା ଏହାକୁ ଆର୍ଥିକ ଦୃଷ୍ଟିରୁ ଅଧିକ ଆକର୍ଷଣୀୟ କରିଥାଏ। ଏହା ସହିତ, ସ୍ଥାନୀୟ ଭାବରେ ଉତ୍ପାଦନ କରିବା ଦ୍ୱାରା କମ୍ପାନୀକୁ ଇଲେକ୍ଟ୍ରୋନିକ୍ସ ସାମଗ୍ରୀର ଉଚ୍ଚ ଆମଦାନୀ ଖର୍ଚ୍ଚ ଏଡାଇବାରେ ସାହାଯ୍ୟ ମିଳିଥାଏ।

• ସରକାରୀ ପ୍ରୋତ୍ସାହନ: ଭାରତର ମେକ୍ ଇନ୍ ଇଣ୍ଡିଆ ପଦକ୍ଷେପ ଏବଂ ପ୍ରଡକ୍ସନ ଲିଙ୍କ୍‌ଡ ଇନିସିଏଟିଭ୍ (PLI) ଯୋଜନାଗୁଡ଼ିକ ସ୍ଥାନୀୟ ଉତ୍ପାଦନ ବୃଦ୍ଧି କରିବା ପାଇଁ କମ୍ପାନୀଗୁଡ଼ିକୁ ଆର୍ଥିକ ସହାୟତା ପ୍ରଦାନ କରୁଛି। ଏହି ନୀତିଗୁଡ଼ିକ ଆପଲର ଫକ୍ସକନ ଏବଂ ଟାଟା ଭଳି ଅଂଶୀଦାରମାନଙ୍କୁ ଭାରତରେ ଅଧିକ ନିବେଶ କରିବାକୁ ପ୍ରୋତ୍ସାହନ ଦେଇଛି। 

• ବଢ଼ୁଥିବା ବଜାର ସମ୍ଭାବନା: ଭାରତ ବିଶ୍ୱର ଦ୍ରୁତତମ ଅଭିବୃଦ୍ଧିଶୀଳ ସ୍ମାର୍ଟଫୋନ୍ ବଜାର ମଧ୍ୟରୁ ଗୋଟିଏ। ଲୋକାଲ ପ୍ରଡକ୍ସନ ଆପଲ୍‌କୁ ଏହି ଚାହିଦାକୁ ପୂରଣ କରିବାରେ ସାହାଯ୍ୟ କରୁଛି। ଫଳରେ କମ୍ପାନୀର ମାର୍କେଟ ଶେୟାର ବଢ଼ୁଛି। ଯାହା ବର୍ତ୍ତମାନ ପ୍ରାୟ ୬-୭% ରହିଛି।

• ରପ୍ତାନୀ ସୁଯୋଗ: ଆପଲ୍ ଭାରତରେ ନିର୍ମିତ ଏହାର ୭୦% ଆଇଫୋନ୍ ରପ୍ତାନୀ କରେ, ଏଥିରେ ଚୀନ୍ ତୁଳନାରେ ଭାରତର କମ୍ ଆମଦାନୀ ଶୁଳ୍କରୁ ଲାଭ ଉଠାଏ। ୨୦୨୪ ମସିହାରେ ଭାରତରୁ ଆଇଫୋନ୍ ରପ୍ତାନି ୧୨.୮ ବିଲିୟନ ଡଲାର (ପ୍ରାୟ ₹୧,୦୯,୬୫୫ କୋଟି)ରେ ପହଞ୍ଚିଛି। ଆଗାମୀ ସମୟରେ ଏହା ଆହୁରି ବୃଦ୍ଧି ପାଇବାର ଆଶା କରାଯାଉଛି।

• ଦକ୍ଷ କର୍ମଚାରୀ ଏବଂ ଭିତ୍ତିଭୂମି: ଅଭିଜ୍ଞତା ଦୃଷ୍ଟିରୁ ଭାରତର ଶ୍ରମଶକ୍ତି ଚୀନ୍ ଠାରୁ ପଛରେ ଅଛି, କିନ୍ତୁ ଏଥିରେ ଯଥେଷ୍ଟ ଉନ୍ନତି ହେଉଛି। ଆପଲର ଫକ୍ସକନ ଭଳି ଅଂଶୀଦାରମାନେ ଉତ୍ପାଦନ ଆବଶ୍ୟକତା ପୂରଣ କରିବା ପାଇଁ କର୍ମଚାରୀମାନଙ୍କୁ ତାଲିମ ଦେଉଛନ୍ତି ଏବଂ କର୍ଣ୍ଣାଟକରେ ୨.୭ ବିଲିୟନ (₹୨୩,୧୩୯ କୋଟି) ପ୍ଲାଣ୍ଟ ଭଳି ସୁବିଧା ବିସ୍ତାର କରୁଛନ୍ତି।