ଲିଭର କ୍ୟାନସର ସହ ସଂଘର୍ଷ କରୁଛନ୍ତି ଦୀପିକା, କହିଲେ-ଏହା ବହୁତ ଭୟଙ୍କର

ମୁମ୍ଵାଇ ୧୮।୦୯; ଲୋକପ୍ରିୟ ଟେଲି ଅଭିନେତ୍ରୀ ଦୀପିକା କକ୍କଡ। ବିଗତ କିଛି ମାସ ହେବ ସେ ବହୁତ ସମସ୍ୟାର ସମ୍ମୁଖୀନ ହୋଇଥିଲେ । ତାଙ୍କ ପାଇଁ ତାହା ସହଜ ନଥିଲା। ବର୍ଷର ଆରମ୍ଭରୁ ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହେବାକୁ ଲାଗିଲା । ତାଙ୍କର ଲିଭର ଟ୍ୟୁମର ହୋଇଥିବା ପରେ ଜଣାପଡ଼ିଲା। ଡାକ୍ତର ଅଭିନେତ୍ରୀଙ୍କୁ କହିଥିଲେ ଯେ ସେ ଷ୍ଟେଜ୍ ୨ ଲିଭର କ୍ୟାନସରରେ ପୀଡିତ। ତାଙ୍କ ଶରୀରରେ ବଢ଼ୁଥିବା ଟ୍ୟୁମର କ୍ୟାନସର ଥିଲା। ଏହା ପରେ ଦୀପିକା ଯଥାଶୀଘ୍ର ଅସ୍ତ୍ରୋପଚାର କରାଇଥିଲେ, କିନ୍ତୁ ଏବେ ବି ସେ ଗମ୍ଭୀର ସମସ୍ୟାରେ ଅଛନ୍ତି। ଏକ ଭିଡିଓ ସେୟାର କରି ତାଙ୍କ ଅବସ୍ଥା ଏବଂ ତାଙ୍କ ପାଇଁ ଏହି ଅଭିଜ୍ଞତା କେତେ କଷ୍ଟକର ଥିଲା ତାହା ସେ ବର୍ଣ୍ଣନା କରିଛନ୍ତି।

ଚଳିତ ବର୍ଷ ମେ ମାସରେ, ଦୀପିକାଙ୍କ ଦ୍ୱିତୀୟ ପର୍ଯ୍ୟାୟ ଲିଭର କ୍ୟାନ୍ସର ହୋଇଥିବା ଜଣାପଡିଥିଲା। ଯେତେବେଳେ ସେ ସାଧାରଣ ପେଟ ଯନ୍ତ୍ରଣା ପାଇଁ ହସ୍ପିଟାଲ ଯାଇଥିଲେ। ତାଙ୍କ ଲିଭରରେ  ଟ୍ୟୁମର ହୋଇଥିବା ଜାଣି ସେ ଆଶ୍ଚର୍ଯ୍ୟ ହୋଇଯାଇଥିଲେ। ଏହି ରୋଗ କେବଳ ତାଙ୍କ ଜୀବନକୁ ବଦଳାଇ ନଥିଲା, ବରଂ ତାଙ୍କୁ ମାନସିକ ଏବଂ ଶାରୀରିକ ଭାବରେ ମଧ୍ୟ ବହୁତ ସଂଘର୍ଷ କରିବାକୁ ପଡିଥିଲା। ଦୀପିକା ଆଜିକାଲି ତାଙ୍କ ବ୍ଲଗ ମାଧ୍ୟମରେ ତାଙ୍କ ପ୍ରଶଂସକଙ୍କ ସହ ସ୍ୱାସ୍ଥ୍ୟ ସମ୍ବନ୍ଧୀୟ ଅପଡେଟ୍ ସେୟାର କରୁଛନ୍ତି। ଇମୋସନାଲ ହୋଇ ସେ ପ୍ରକାଶ କରିଛନ୍ତି ଯେ ଅତ୍ୟଧିକ କେଶ ଝଡ଼ିବା ତାଙ୍କୁ ଏବେ ବି ଭୟଭୀତ କରୁଛି।

ଏନେଇ ଦୀପିକା  କହିଛନ୍ତି, "ମୁଁ ଆଜି ସାରା ଦିନ ବିଶ୍ରାମ ନେଇଥିଲି କାରଣ ମୁଁ ବହୁତ ମାନସିକ ଅବସାଦରେ ଥିଲି। ଚିକିତ୍ସାର ପାର୍ଶ୍ୱ ପ୍ରତିକ୍ରିୟା ଅଛି, କିନ୍ତୁ ମୁଁ ଏବେ ଏଥିରେ ଅଭ୍ୟସ୍ତ। କେଶ ଝଡ଼ିବା ବହୁତ ଭୟଙ୍କର। ମୁଁ ଗାଧୋଇ ସାରିବା ପରେ, କାହା ସହିତ କଥା ନ ହୋଇ ୧୦-୧୫ ମିନିଟ୍ ପାଇଁ ଚୁପଚାପ୍ ବସିଥାଏ। ଏହା ମୋ ପାଇଁ ବହୁତ କଷ୍ଟକର ମୁହୂର୍ତ୍ତ।"