ଦଳାଚକଟା ଘଟଣା ପରେ ବିଜୟଙ୍କ ଘରକୁ ବୋମା ଧମକ, ପୋଲିସ୍‌ର ତଦନ୍ତ ଜାରି

ନୂଆଦିଲ୍ଲୀ ୨୯।୦୯; କରୁର ଦଳାଚକଟା ଘଟଣା ପରେ ବିଜୟଙ୍କ ବାସଭବନରେ ବୋମା ରଖାଯାଇଥିବା ଖବର ପ୍ରଚାରିତ ହୋଇଥିଲା । ଜଣେ ଅଜଣା ବ୍ୟକ୍ତି ପୋଲିସକୁ ଫୋନ୍ କରି ବିଜୟଙ୍କ ଘରକୁ ଉଡ଼ାଇ ଦେବାକୁ ଧମକ ଦେଇଥିଲେ। ଯାହା ପରେ ପୋଲିସ୍ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା। ଏଭଳି ବୋମା ଧମକ ମିଳିବା ପରେ ହଇଚଇ ସୃଷ୍ଟି ହୋଇଯାଇଥିଲା ।

ସକାଳ ପ୍ରାୟ ୫ଟା ୨୦ ସମୟରେ ଚେନ୍ନାଇ ପୋଲିସ୍ କଣ୍ଟ୍ରୋଲ ରୁମକୁ ଏହି କଲ୍ କରାଯାଇଥିଲା। ଯେଉଁଥିରେ ଜଣେ ଅଜଣା ବ୍ୟକ୍ତି ଦାବି କରିଥିଲେ ଯେ ବିଜୟଙ୍କ ବାସଭବନରେ ବୋମା ରଖାଯାଇଛି । ପୋଲିସ୍‌ ଏହି ଖବର ପାଇବା ମାତ୍ରେ ବୋମା ସ୍କ୍ଵାଡ ଓ ଏକ ସ୍ନିଫର କୁକୁର ୟୁନିଟ୍ ସହିତ ତୁରନ୍ତ ଘଟଣାସ୍ଥଳକୁ ଯାଇଥିଲେ । ଯାହା ପରେ ସମଗ୍ର ଘର ଏବଂ ଆଖପାଖ ଅଞ୍ଚଳକୁ ସମ୍ପୂର୍ଣ୍ଣ ଭାବରେ ଯାଞ୍ଚ କରାଯାଇଥିଲା । ପ୍ରାୟ ଏକ ଘଣ୍ଟାର ତଦନ୍ତ ପରେ, ପୋଲିସ୍ ନିଶ୍ଚିତ କରିଥିଲା ​​ଯେ ତାଙ୍କ ବାସଭବନରେ କୌଣସି ବିସ୍ଫୋରକ ସାମଗ୍ରୀ ନାହିଁ।

କହିବାକୁ ଗଲେ ବୋମା ଧମକ ମିଥ୍ୟା ହୋଇଥାଇପାରେ, କିନ୍ତୁ ପୋଲିସ୍ ଏବଂ ସୁରକ୍ଷା ବାହିନୀ ଏହାକୁ ଗମ୍ଭୀରତାର ସହ ନେଇଛନ୍ତି । ନୀଳାଙ୍କରାଇ ପୋଲିସ୍ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ପ୍ରାରମ୍ଭିକ ରିପୋର୍ଟ ଅନୁଯାୟୀ, କଲର୍‌ଙ୍କୁ ଚିହ୍ନଟ କରାଯାଉଛି ଏବଂ ଏକ କଲ୍ ଟ୍ରେସିଂ ପ୍ରକ୍ରିୟା ଆରମ୍ଭ କରାଯାଇଛି । ଅଧିକାରୀମାନେ କହିଛନ୍ତି ଯେ, ଏପରି ପ୍ରାଙ୍କ୍ କଲ୍ ସମାଜରେ ଆତଙ୍କ ସୃଷ୍ଟି କରିବାକୁ ଚେଷ୍ଟା କରେ ଏବଂ ଅପରାଧୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ । ସୂଚନା ଅନୁଯାୟୀ, ଏ ଖବର ଜଣାପଡ଼ିବା ସମୟରେ ବିଜୟ ତାଙ୍କ ଘରେ ନଥିଲେ । କିନ୍ତୁ, ତାଙ୍କ ପରିବାର ଏବଂ କର୍ମଚାରୀମାନେ ସେଠାରେ ଉପସ୍ଥିତ ଥିଲେ । ପୋଲି ତୁରନ୍ତ ସମସ୍ତଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରି ଅଞ୍ଚଳକୁ ଘେରାବନ୍ଦୀ କରିଥିଲା ।