ବିଜେଡିର ନୂଆପଡ଼ା ରଣନୀତି : ୩ ଆଶାୟୀଙ୍କୁ ନବୀନ ନିବାସ ଡାକରା, ଆଲୋଚନା ପରେ ଚୂଡ଼ାନ୍ତ ପ୍ରାର୍ଥୀ ଘୋଷଣା

ଭୁବନେଶ୍ବର ୧।୧୦: ନୂଆପଡ଼ା ବିଧାନସଭା ଉପନିର୍ବାଚନ ପାଇଁ ଚାଲିଛ କସରତ । କଂଗ୍ରେସ ତାର ପ୍ରାର୍ଥୀ ଘୋଷଣା କରିସାରିଥିବା ବେଳେ ବିଜେପି ଆଉ ବିଜେଡି ଉଭୟ ଦଳର ଛିଣ୍ଡୁନି ଟିକେଟ୍ ଟେନସନ । ଏମିତିରେ ବିଜେଡି କାହାକୁ ପ୍ରାର୍ଥୀ କରିବ ତାକୁ ନେଇ ସସ୍‌ପେନ୍ସ ଜାରି ରହିଛି । ଏହାରି ଭିତରେ ନୂଆପଡ଼ା ଉପନିର୍ବାଚନ ପାଇଁ ବିଜେଡିରୁ ୩ ଆଶାୟୀଙ୍କୁ ନବୀନ ନିବାସରୁ ଡାକରା ଆସିଛି । ଏମାନେ ସିଧାସଳଖ ଦଳ ସୁପ୍ରିମୋ ନବୀନ ପଟ୍ଟନାୟକଙ୍କୁ ଭେଟି ଆଲୋଚନା କରିବେ । ବୁଧବାର ଅପରାହ୍ନରେ ନବୀନ ନିବାସରେ ନବୀନଙ୍କୁ ଭେଟି ଆଲୋଚନା କରିବେ ବୋଲି ଜଣାପଡିଛି । ତେବେ ନବୀନଙ୍କ ସହ ଆଲୋଚନା ପରେ ଚୂଡ଼ାନ୍ତ ପ୍ରାର୍ଥୀଙ୍କ ନାଁ ଘୋଷଣା କରିପାରେ ବିଜେଡି । ତେବେ ନୂଆପଡ଼ା ଉପନିର୍ବାଚନ ପାଇଁ ବିଜେଡିରୁ ୩ ଆଶାୟୀ ହେଉଛନ୍ତି ଅବନୀ ଯୋଶୀ, ମନୋଜ ମିଶ୍ର ଓ ଭାନୁପ୍ରତାପ ସିଂ ମାଝୀ ।

ଅବନୀ ଯୋଶୀ ଦୀର୍ଘ ୨୫ ବର୍ଷ ହେବ ବିଜେଡିରେ ରହି ସଂଗଠନକୁ ମଜଭୁତ କରିବାରେ ଅନେକ ସହାୟକ ହୋଇଛନ୍ତି । ଏଥିସହ ସେ ଦୁଇ ଥର ଜିଲ୍ଲା ପରିଷଦ ସଭ୍ୟ ଭାବରେ ବିଜେଡିରୁ ବିଜୟୀ ହୋଇଛନ୍ତି । ବର୍ତ୍ତମାନ ସେ ବିଜେଡି ଜିଲ୍ଲା ସଭାପତି ଅଛନ୍ତି ।

ସେହିଭଳି ପୂର୍ବରୁ କୋମନା ବ୍ଲକ୍ ଅଧ୍ୟକ୍ଷ ରହିଛନ୍ତି ମନୋଜ ମିଶ୍ର । ସେ ବିଜେଡି ଜିଲ୍ଲା ସଭାପତି ମଧ୍ୟ ଥିଲେ । ବିଜୁ ପଟ୍ଟନାୟକଙ୍କ ସମୟରୁ ସେ ଦଳ ପାଇଁ କାମ କରି ଆସୁଛନ୍ତି । ବିଜୁ ପଟ୍ଟନାୟକଙ୍କ ସମୟରୁ ସେ ଦଳ ପାଇଁ କାମ କରି ଆସୁଛନ୍ତି । ୨୦୨୪ ନିର୍ବାଚନରେ ଜିଲ୍ଲା ସଭାପତି ରହି କୋମନା ବ୍ଲକ୍‌ରୁ ବିଜେଡି ଭଲ ଭୋଟ୍ ପାଇଥିବା ବେଳେ ତାଙ୍କ ସମୟରେ ନୂଆପଡ଼ା NAC ଅଧ୍ୟକ୍ଷ ପଦ ପାଇଥିଲେ ।

ସେହିଭଳି ଭାନୁପ୍ରତାପ ସିଂ ମାଝୀ ତିନି ଥର ଜିଲ୍ଲା ପରିଷଦ ସଭ୍ୟ ରହିଥିବା ବେଳେ ଦୁଇ ଥର ଜିଲ୍ଲା ପରିଷଦ ଉପାଧ୍ୟକ୍ଷ ରହିଥିଲେ । ଏଥିସହ ଆଦିବାସୀ କଲ୍ୟାଣ ସଙ୍ଘର ସଭାପତି ମଧ୍ୟ ଅଛନ୍ତି । ଯେହେତୁ ନିର୍ବାଚନ ମଣ୍ଡଳୀରେ ୪୨ ପ୍ରତିଶତ ଆଦିବାସୀ ଭୋଟର ଅଛନ୍ତି ତେଣୁ ଭାନୁପ୍ରତାପ ସିଂ ମାଝୀଙ୍କୁ ଚାନ୍ସ ଦେଇପାରେ ବିଜେଡି ।

ସେହିଭଳି ବିଜେପି ଅସନ୍ତୁଷ୍ଟଙ୍କ ଉପରେ ମଧ୍ୟ ନଜର ରଖିଛି ବିଜେଡି । ଏମିତିରେ ନୂଆପଡା ପାଇଁ ବିଜେଡି ଖୁବ୍‌ଶୀଘ୍ର ପ୍ରାର୍ଥୀ ଘୋଷଣା କରିବା ସହ ବଡ଼ ବ୍ୟବଧାନରେ ବିଜୟୀ ହେବାକୁ ଲକ୍ଷ୍ୟ ରଖିଥିବା ବିଜେଡି ବିଧାୟକ ଅରୁଣ ସାହୁ କହିଥିଲେ ।

ନୂଆପଡ଼ା ରାଜନୀତିର ସତରଞ୍ଜରେ ଆଗରେ ବିଜେପି । ଜୟ ଢ଼ୋଲକିଆଙ୍କୁ ପଦ୍ମ କ୍ୟାମ୍ପକୁ ଟାଣି ମାଷ୍ଟର ଷ୍ଟ୍ରୋକ୍‌ ଖେଳିଥିଲା ଦଳ । ଏବେ ଔପଚାରିକ ଭାବେ ପ୍ରାର୍ଥୀଙ୍କ ନାଁ ଘୋଷଣାକୁ ଅପେକ୍ଷା । ତେବେ ଏନେଇ ସଂକେତ ଦେଇ ସାରିଲେଣି ବିଜେପି ସାଂସଦ ସୁଜିତ୍‌ କୁମାର । ତାଙ୍କର କହିବା କଥା ଜୟ ଢ଼ୋଲକିଆ ହିଁ ହେବେ ନୂଆପଡ଼ାରେ ବିଜେପି ପ୍ରାର୍ଥୀ । ଆସନ୍ତା ୧୬ରେ ସେ ନାମାଙ୍କନ ଦାଖଲ କରିବେ । ଆଉ ଏହି ସମୟରେ ମୁଖ୍ୟମନ୍ତ୍ରୀ ମୋହନ ମାଝୀ ଓ ରାଜ୍ୟ ବିଜେପି ସଭାପତି ମନମୋହନ ସାମଲ, ମନ୍ତ୍ରୀ ଓ ବିଧାୟକ ଉପସ୍ଥିତିରେ ହେବ ପାଓ୍ବାର ଶୋ’ । ଖାଲି ସେତିକି ନୁହେଁ ନାମାଙ୍କନ ଦିନ ୨ହଜାରରୁ ଅଧିକ କଂଗ୍ରେସ ଓ ବିଜେଡି କର୍ମୀଙ୍କୁ ବିଜେପିରେ ସାମିଲ ପାଇଁ ହୋଇଛି ବଡ଼ ଯୋଜନା ।  

ସେପଟେ ଆଗୁଆ ପ୍ରାର୍ଥୀ ଘୋଷଣା କରି ପ୍ରଚାରକୁ ଜୋରଦାର କରିଛି କଂଗ୍ରେସ । ନିଜେ ପିସିସି ସଭାପତି ନୂଆପଡ଼ାରେ ଡେରା ପକାଇବା ସହ ବିଭିନ୍ନ ଦଳର ନେତାଙ୍କୁ ଦଳରେ ସାମିଲ କରିବାରେ ଲାଗିଛି କଂଗ୍ରେସ ।

ତେବେ ଆଜି ମାନଙ୍କନ ପତ୍ର ଦାଖଲର ତୃତୀୟ ଦିନ ହୋଇଥିବା ବେଳେ କୌଣସି ପ୍ରାର୍ଥୀ ଏଯାଏଁ ନାମାଙ୍କନ କରିନଥିବା ବେଳେ ନୂଆପଡାରେ ବଢ଼ିଲାଣି ଉପ ନିର୍ବାଚନ ତାତି ।