ଭାରତ- ଆମେରିକାର ‘ସପୁର ଡିଲ୍’ରେ ବାଂଲାଦେଶ ହେବ ବର୍ବାଦ୍ ! ଭାଙ୍ଗିବ ଅର୍ଥନୀତିର ମେରୁଦଣ୍ଡ

ନୂଆଦିଲ୍ଲୀ: ଭାରତ ଏବଂ ଆମେରିକା ମଧ୍ୟରେ ହୋଇଥିବା ଟ୍ରେଡ ଡିଲ୍ ଏବେ ଏସିଆ ମାର୍କେଟରେ ହଇଚଇ ସୃଷ୍ଟି କରିଛି। ଏ ଖବର ଭାରତ ପାଇଁ ଖୁସି ଆଣିଥିବା ବେଳେ, ପଡ଼ୋଶୀ ଦେଶ ବାଂଲାଦେଶ ପାଇଁ କିନ୍ତୁ ସୃଷ୍ଟି କରିଛି ଏକ ଗୁରୁତ୍ୱପୂର୍ଣ୍ଣ ସମସ୍ୟା। ଆମେରିକା ଭାରତୀୟ ପୋଷାକ ଏବଂ ବୟନ ସାମଗ୍ରୀ ଉପରେ ଆମଦାନୀ ଶୁଳ୍କ (ଟାରିଫ୍) ଅଧାରୁ ଅଧିକ ହ୍ରାସ କରିଛି। ପୂର୍ବରୁ ଭାରତୀୟ ସାମଗ୍ରୀ ଉପରେ ୫୦% ଟିକସ ଲାଗୁଥିଲା, ଏବେ ଏହାକୁ ମାତ୍ର ୧୮% ହ୍ରାସ କରାଯାଇଛି। ବିଶେଷଜ୍ଞଙ୍କ କହିବା ଅନୁସାରେ, ଆମେରିକାର ଏହି ଏକକ ନିଷ୍ପତ୍ତି ବାଂଲାଦେଶ ଅର୍ଥନୀତିର ମେରୁଦଣ୍ଡ ଭାଙ୍ଗିବା ପାଇଁ ଯଥେଷ୍ଟ। କାରଣ ବୟନ ଶିଳ୍ପ ଦେଶର ଆୟର ମୁଖ୍ୟ ଉତ୍ସ।

ଚୀନ୍ ଏବଂ ବାଂଲାଦେଶକୁ ପଛରେ ପକାଇଲା ଭାରତ

ଏହି ଚୁକ୍ତିର ସବୁଠାରୁ ବଡ଼ ଆକର୍ଷଣ ହେଉଛି ଅନ୍ୟ ଦେଶର ବସ୍ତ୍ର ତୁଳନାରେ ଭାରତୀୟ ବସ୍ତ୍ର ଏବେ ଆମେରିକାରେ ସବୁଠାରୁ ଶସ୍ତା ହେବ। ପରିସଂଖ୍ୟାନକୁ ଦେଖିଲେ, ନୂତନ ଶୁଳ୍କ ବ୍ୟବସ୍ଥା ଭାରତକୁ ଗୁରୁତ୍ୱପୂର୍ଣ୍ଣ ଲାଭ ଦେବ। ଭାରତୀୟ ସାମଗ୍ରୀ ଉପରେ ଏବେ ୧୮% ଟିକସ ଲାଗୁ ହେବ, ଯାହା ବାଂଲାଦେଶୀ ସାମଗ୍ରୀ ଉପରେ ୨୦%, ଭିଏତନାମୀୟ ସାମଗ୍ରୀ ଉପରେ ୨୦% ଏବଂ ଚୀନ୍ ସାମଗ୍ରୀ ଉପରେ ୩୦% ଟିକସ ଲାଗୁ ହେବ। ୧୯% ସହିତ ପାକିସ୍ତାନ ମଧ୍ୟ ଭାରତଠାରୁ ପଛରେ ପଡ଼ିଯାଇଛି।

ବୟନ ମନ୍ତ୍ରଣାଳୟ ସ୍ପଷ୍ଟ କରିଛି ଯେ, ବିଶ୍ବର ପ୍ରମୁଖ କ୍ରେତାମାନେ ଭାରତରୁ କମ୍ ଟିକସରେ ଗୁଣାତ୍ମକ ସାମଗ୍ରୀ ପାଇପାରିବେ। ଫଳରେ ସେମାନେ ସେମାନେ ବାଂଲାଦେଶ କିମ୍ବା ଚୀନରୁ ସାମଗ୍ରୀ କିଣା କମ୍ କରିବେ। ଯାହାର ସିଧାସଳଖ ଫାଇଦା ପାଇବେ ଭାରତୀୟ ରପ୍ତାନିକାରୀ। ଏମିତିରେ ଏହା ବାଂଲାଦେଶ ପାଇଁ ଏକ ଗୁରୁତ୍ୱପୂର୍ଣ୍ଣ ଆଘାତ ହୋଇପାରେ। କାରଣ ପୂର୍ବରୁ ୟୁରୋପୀୟ ସଂଘ ସହିତ ଭାରତର ଚୁକ୍ତି ଯୋଗୁ ବାଂଲାଦେଶ ଚାପରେ ଥିଲା।

ସୂଚନାଥାଉକି, ଆମେରିକା ବିଶ୍ୱର ସବୁଠାରୁ ବଡ଼ ବଜାର। ଏହାର କପଡ଼ା ମାର୍କେଟ ପ୍ରାୟ ୧୧୮ ବିଲିୟନ ଡଲାରର। ହେଲେ ଅଧିକ ଟିକସ ଯୋଗୁ ଭାରତ ଏପର୍ଯ୍ୟନ୍ତ ଏହି ବଜାରରେ ନିଜର ଶକ୍ତି ପୂର୍ଣ୍ଣ ଭାବରେ ପ୍ରଦର୍ଶନ କରିପାରିନଥିଲା।ତଥାପି, ୱାଶିଂଟନ ସହିତ ଏହି ଡିଲ୍ ଭାରତ ପାଇଁ ଦ୍ୱାର ଖୋଲିଛି। ଭାରତ ପୂର୍ବରୁ ପ୍ରାୟ ୧୦.୫ ବିଲିୟନ ଡଲାର ମୂଲ୍ୟର କପଡ଼ା ଆମେରିକାକୁ ରପ୍ତାନି କରୁଛି। କିନ୍ତୁ ଏବେ ଛାଡ଼ ପରେ ଏହି ସଂଖ୍ୟା ବହୁ ଗୁଣ ବୃଦ୍ଧି ପାଇବାର ଆଶା କରାଯାଉଛି। ସରକାର ୨୦୩୦ ସୁଦ୍ଧା ୧୦୦ ବିଲିୟନ ଡଲାର ରପ୍ତାନି ହାସଲ କରିବାକୁ ଲକ୍ଷ୍ୟ ରଖିଛନ୍ତି ଏବଂ ଏହି ଚୁକ୍ତି ମଧ୍ୟ ଲକ୍ଷ୍ୟ ହାସଲ କରିବାରେ ଏକ ପ୍ରମୁଖ ଭୂମିକା ଗ୍ରହଣ କରିବ।