ଏଠାରେ କରାଯାଏ କୁମ୍ଭୀର ଚାଷ, ରୋଜଗାର ଜାଣିଲେ ହେବେ ଆଶ୍ଚର୍ଯ୍ୟ...

ନୂଆଦିଲ୍ଲୀ ୧୬।୦୯: ପ୍ରାୟତଃ ସମସ୍ତେ ଧାନ, ଗହମ ଏବଂ ପନିପରିବା ଚାଷ ବିଷୟରେ ଶୁଣିଥିବେ ବା ଦେଖିଥିବେ । କିନ୍ତୁ କେବେ କୁମ୍ଭୀର ଚାଷ ହେବା ଶୁଣିଛନ୍ତି କି ? ଆଜ୍ଞା ହଁ ଚୀନରେ  ବଡ଼ ପରିମାଣରେ କୁମ୍ଭୀର ଚାଷ କରାଯାଏ। ଏହା କୌଣସି ସାଧାରଣ କାମ ନୁହେଁ ବରଂ କୋଟି କୋଟି ଡଲାରର ବ୍ୟବସାୟ। ଚୀନ୍ ଫାର୍ମରେ କୁମ୍ଭୀର ପାଳନ ସେମାନଙ୍କର ମାଂସ ଏବଂ ଚମଡ଼ା ପାଇଁ କରାଯାଏ ।

କୁମ୍ଭୀର ଚାଷ ବ୍ୟବସାୟରେ କୁମ୍ଭୀର ଅଣ୍ଡା ସବୁଠାରୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ । ଏଥିପାଇଁ ଫାର୍ମରେ ସ୍ୱତନ୍ତ୍ର ବାଲି ବସା ତିଆରି କରାଯାଏ । ଯେଉଁଠାରେ ଅଣ୍ଡା ରଖାଯାଏ। ପରେ ସେମାନଙ୍କୁ ହ୍ୟାଚେରୀକୁ ସ୍ଥାନାନ୍ତର କରାଯାଏ, ଯେଉଁଠାରେ ତାପମାତ୍ରା ୨୯ ରୁ ୩୪ ଡିଗ୍ରୀ ସେଲସିୟସ୍ ମଧ୍ୟରେ ରଖାଯାଏ ଏବଂ ଆର୍ଦ୍ରତା ନିୟନ୍ତ୍ରିତ ହୁଏ । ଏହାପରେ ପ୍ରାୟ ୬୫ ରୁ ୯୦ ଦିନ ମଧ୍ୟରେ କୁମ୍ଭୀର ଅଣ୍ଡା ଫୁଟି ଛୋଟ କୁମ୍ଭୀର ବାହାରକୁ ଆସେ। ଏହି ଛୁଆ କୁମ୍ଭୀରମାନଙ୍କୁ ପାଳନ ପାଇଁ ସ୍ୱଚ୍ଛ ପାଣି ଟାଙ୍କିରେ ରଖାଯାଏ । ଧୀରେ ଧୀରେ ଯେତେବେଳେ ସେମାନେ ବଡ଼ ହୁଅନ୍ତି, ସେମାନଙ୍କୁ ଅଧିକ ପ୍ରଜନନ ପାଇଁ ବିକ୍ରି କରାଯାଏ କିମ୍ବା ପ୍ରକ୍ରିୟାକରଣ ୟୁନିଟକୁ ପଠାଯାଏ।

ଚୀନର ମହଙ୍ଗା ରେଷ୍ଟୁରାଣ୍ଟଗୁଡ଼ିକରେ କୁମ୍ଭୀର ମାଂସର ରହିଥାଏ ବେଶ୍ ଚାହିଦା । କୁହାଯାଏ ଏହାର ମାଂସ କମ୍ ଚର୍ବିଯୁକ୍ତ, କୋମଳ ଏବଂ ପୁଷ୍ଟିକର । ଏହାର ଲାଞ୍ଜ, ପିଠି ଏବଂ ଗୋଡ ଭଳି ଅଂଶକୁ ବିକ୍ରି କରାଯାଏ। କୁମ୍ଭୀର ଚମଡ଼ାକୁ ଫ୍ୟାଶନ୍ ଶିଳ୍ପର ଗର୍ବ ବୋଲି ବିବେଚନା କରାଯାଏ। ଏଥିରୁ ବିଳାସପୂର୍ଣ୍ଣ ବ୍ୟାଗ, ଜୋତା ଏବଂ ବେଲ୍ଟ ତିଆରି କରାଯାଏ। ଏହି କାରଣରୁ ପ୍ରତିବର୍ଷ କୁମ୍ଭୀର ଚାଷ ପ୍ରାୟ ୯ ବିଲିୟନ ଡଲାରର ବ୍ୟବସାୟ ସୃଷ୍ଟି କରେ। କୁମ୍ଭୀର ଚାଷ କରାଯାଏ କିନ୍ତୁ ଏହି ଶିଳ୍ପକୁ ନେଇ ବିବାଦ ମଧ୍ୟ ଦେଖାଦେଇଛି। ପଶୁ ସୁରକ୍ଷା ସମ୍ପ୍ରଦାୟଗୁଡ଼ିକ କୁହନ୍ତି ଯେ ଚମଡ଼ା ପାଇଁ କୁମ୍ଭୀର ହତ୍ୟା ଅମାନବୀୟ ଏବଂ ଅନାବଶ୍ୟକ। ସେମାନେ ବିଶ୍ୱାସ କରନ୍ତି ଯେ ଏହା ପ୍ରଜାତିର ସଂରକ୍ଷଣକୁ ବିପଦରେ ପକାଇଛି।