TCSକୁ ଆମେରିକା କୋର୍ଟରୁ ଝଟକା, ପୈଠ କରିବାକୁ ହେବ ୧,୬୦୦ କୋଟି ଟଙ୍କା

ନୂଆଦିଲ୍ଲୀ ୨୪।୧୧: ଟାଟା କନସଲ୍ଟାନ୍ସୀ ସର୍ଭିସେସ୍ (ଟିସିଏସ୍) କୁ ଆମେରିକା କୋର୍ଟ ଅଫ ଅପିଲସ୍ (ଫିପଥ୍ ସର୍କିଟ)ରୁ ଝଟକା ଲାଗିଛି। ଟ୍ରେଡ ସିକ୍ରେଟ ବିବାଦରେ କୋର୍ଟ କମ୍ପ୍ୟୁଟର ସାଇନ୍ସେସ୍ କର୍ପୋରେସନ (ସିଏସସି) ଯାହା ଏବେ ଡିଏକ୍ସସି ଟେକ୍ନୋଲଜିର ଅଂଶବିଶେଷ ସପକ୍ଷରେ ରାୟ ଦେଇ ୧୯୪.୨ ମିଲିୟନ ଡଲାର (ପାଖାପାଖି ୧,୬୦୦ କୋଟି ଟଙ୍କା) କ୍ଷତିପୂରଣ ନିର୍ଦ୍ଦେଶକୁ କାୟମ ରଖିଛନ୍ତି। କମ୍ପାନୀ ୨୧ ନଭେମ୍ବର ୨୦୨୫ରେ କରିଥିବା ଷ୍ଟକ୍ ଏକ୍ସଚେଞ୍ଜ ଫାଇଲିଂରେ ଏହି ସୂଚନା ଦେଇଛି।

ଜୁରୀଙ୍କ ଦ୍ୱାରା ନିର୍ଦ୍ଧାରିତ ପୁରା ଡ୍ୟାମେଜ୍ ଆୱାର୍ଡକୁ କୋର୍ଟ ଉଚିତ ବୋଲି କହିଛନ୍ତି ଅର୍ଥାତ ଟିସିଏସ୍ କୁ ମୋଟା ରକମର କ୍ଷତିପୂରଣ ଦେବାକୁ ପଡିବ। ତେବେ କୋର୍ଟ ପୂର୍ବରୁ ଲଗାଇଥିବା ପର୍ମାନେଣ୍ଟ ଇଞ୍ଜେକ୍ସନ (ସ୍ଥାୟୀ ରୋକ)କୁ ହଟାଇ ଦେଇଛନ୍ତି। ଏଣୁ କମ୍ପାନୀ ଏବେ ସିଏସସି ସମ୍ପର୍କିତ ପୁରୁଣା ଡାଟା ଓ ମେଟେରିୟାଲକୁ ବ୍ୟବହାର କରିପାରିବ। ଏହା ସହିତ ପୁରା ମାମଲାକୁ ପରବର୍ତ୍ତି ସମୀକ୍ଷା ଲାଗି ଟେକ୍ସାସର ନର୍ଦ୍ଦନ ଡିଷ୍ଟ୍ରିକ୍ଟ କୋର୍ଟକୁ ଫେରାଇ ଦିଆଯାଇଛି। ଏହାର ଅର୍ଥ କ୍ଷତିପୂରଣ ରାଶି ପୈଠ କରିବାକୁ ପଡିବ ହେଲେ ଆଗକୁ ଏଥିରେ କିଛି ସଂଶୋଧନ ବି ହୋଇ ପାରେ।

ଏହି ବିବାଦ ୨୦୧୯ ମସିହାରେ ଆରମ୍ଭ ହୋଇଥିଲା। ସିଏସସି ଅଭିଯୋଗ କରିଥିଲା ଯେ ଟିସିଏସ୍ ତାର ଇନସ୍ୟୁରାନ୍ସ ସଫ୍ଟୱେର ସମ୍ପର୍କିତ ଟ୍ରେଡ ସିକ୍ରେଟ ଚୋରାଇବା ସହ ଏହାକୁ ନିଜ ପ୍ଲାଟଫର୍ମ ବିକାଶରେ ବ୍ୟବହାର କରିଛି। ସିଏସସି କହିଥିଲା ଯେ ଟ୍ରାନ୍ସ ଆମେରିକା ଆଉଟ ସୋର୍ସିଂ ପ୍ରେଜେକ୍ଟ କାଳରେ ଏହାର ଅନେକ କର୍ମଚାରୀ ଟିସିଏସକୁ ଚାଲି ଯାଇଥିଲେ ଓ ଏହି ରାସ୍ତାରେ ସିଏସସିର ଗୋପନୀୟ ସୂଚନା ଟିସିଏସ ପର୍ଯ୍ୟନ୍ତ ପହଞ୍ଚି ଯାଇଛି। ସିଏସସି ଅନୁସାରେ ଟିସିଏସ ଏହି ଆଧାରରେ ନିଜର ନୂଆ ଇନସ୍ୟୁରାନ୍ସ ପ୍ଲାଟଫର୍ମ ତିଆରି କରିଛି, ଯାହା ବଜାରରେ ସିଏସସି ସହିତ ସିଧାସଳଖ ପ୍ରତିଦ୍ୱନ୍ଦ୍ୱୀତା କରୁଛି।

ତେବେ ଟିସିଏସ କହିଛି ଯେ କମ୍ପାନୀ ହାର ମାନିବ ନାହିଁ ଓ ଆଗକୁ କୋର୍ଟରେ ନିଜର ପକ୍ଷ ଦୃଢତାର ସହ ରଖିବ। କମ୍ପାନୀ ସଂକେତ ଦେଇଛି ଯେ ସେ ଦ୍ୱିତୀୟବାର ଅପିଲ ଓ ରିଭ୍ୟୁ ପାଇଁ ପ୍ରସ୍ତୁତି କରୁଛି। ଏହାସହିତ ଟିସିଏସ୍ ସ୍ପଷ୍ଟ କରିଛି ଯେ ସେ ସମ୍ଭାବିତ କ୍ଷତିପୂରଣ ନିମନ୍ତେ ପୂର୍ବରୁ ଆକାଉଣ୍ଟିଂ ପ୍ରୋଭିଜନକୁ ସତର୍କତାର ସହ ସଞ୍ଚାଳନ କରୁଛି।