ନାଟୋ ଦେଶଗୁଡ଼ିକୁ ଟ୍ରମ୍ପଙ୍କ ତାଗିଦ୍, ଚୀନ ଉପରେ ୧୦୦% ଟାରିଫ୍ ଲଗାଇ ପାଇଁ ଦେଲେ ଧମକ

ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ରୁଷଠାରୁ ତେଲ କ୍ରୟ ଉପରେ ବଡ଼ ବୟାନ ଦେଇଛନ୍ତି । ଟ୍ରମ୍ପ ଶନିବାର କହିଛନ୍ତି ଯେ ନାଟୋ ଦେଶଗୁଡ଼ିକ ରୁଷରୁ ତେଲ କିଣିବା ବନ୍ଦ କରିବା ଦରକାର । ଏହା ସହିତ, ରୁଷରୁ ତେଲ କିଣିବା ପାଇଁ ଚୀନ୍ ଉପରେ ୫୦ରୁ ୧୦୦% ଶୁଳ୍କ ଲାଗୁ କରାଯିବା ଉଚିତ । ଏପରି ହେବା ଦ୍ୱାରା ହିଁ ରୁଷ-ୟୁକ୍ରେନ ଯୁଦ୍ଧ ଶେଷ ପାଇଁ ପଥ ପ୍ରଶସ୍ତ କରିପାରିବ। ଟ୍ରମ୍ପ ତାଙ୍କ ସୋସିଆଲ ମିଡିଆ ପୋଷ୍ଟରେ ନାଟୋ ଦେଶ ଏବଂ ଚୀନ୍ ବିଷୟ ଉଲ୍ଲେଖ କରିଛନ୍ତି, କିନ୍ତୁ ଭାରତର ନାଁ ନେଇନାହାନ୍ତି । ଟ୍ରମ୍ପ ଗତ କିଛି ମାସ ମଧ୍ୟରେ ରୁଷ ତେଲ କିଣିବା ନେଇ ଭାରତ ଉପରେ ଅନେକ ବିବାଦୀୟ ଟିପ୍ପଣୀ କରିସାରିଛନ୍ତି । କିନ୍ତୁ ଆଜିର ବୟାନରେ ଭାରତ ନାଁ ଉଲ୍ଲେଖ ନକରିବା ତାଙ୍କ ଅଭିମୁଖ୍ୟରେ ପରିବର୍ତ୍ତନକୁ ଦର୍ଶାଉଛି ।

ଟ୍ରମ୍ପ ତାଙ୍କ ସୋସିଆଲ ମିଡିଆ ପୋଷ୍ଟରେ ଲେଖିଛନ୍ତି, 'ବିଜୟ ପାଇଁ ନାଟୋର ପ୍ରତିବଦ୍ଧତା ୧୦୦%ରୁ ବହୁତ କମ୍ ରହିଛି । କିଛି ଦେଶ ଦ୍ୱାରା ରୁଷଠାରୁ ତେଲ କିଣାଯିବ ନିଶ୍ଚତ ଆଶ୍ଚର୍ଯ୍ୟଜନକ । ଏହା ରୁଷ ସହିତ ଆପଣଙ୍କ ବୁଝାମଣା ଓ ବାର୍ଗେନିଂ କ୍ଷମତାକୁ ଦୁର୍ବଳ କରୁଛି । ମୁଁ ପ୍ରତିବନ୍ଧକ ଲଗାଇବାକୁ ପ୍ରସ୍ତୁତ, ଯେତେବେଳେ ନାଟୋ ଦେଶଗୁଡ଼ିକ ତେଲ କିଣିବା ବନ୍ଦ କରିବାକୁ ପ୍ରସ୍ତୁତ ହେବେ ମୋତେ ଜଣାଇବେ।'

ଡୋନାଲ୍ଡ ଟ୍ରମ୍ପ କହିଛନ୍ତି ଯେ ନାଟୋ ଦେଶଗୁଡ଼ିକ ଚୀନ୍ ଉପରେ ୫୦ ରୁ ୧୦୦ ପ୍ରତିଶତ ଶୁଳ୍କ ଲଗାଇବା ଉଚିତ । ଏପରି ପଦକ୍ଷେପ ରୁଷ ଉପରେ ଚୀନର ମଜଭୁତ ସ୍ଥିତି ଭାଙ୍ଗିବ। ଯଦି ନାଟୋ ଦେଶଗୁଡ଼ିକ ଚୀନ୍ ଉପରେ ଶୁଳ୍କ ଲଗାନ୍ତି, ତେବେ ଏହା ରୁଷ ଏବଂ ୟୁକ୍ରେନ ମଧ୍ୟରେ ଯୁଦ୍ଧ ସମାପ୍ତ କରିବାରେ ସାହାଯ୍ୟ କରିବ ବୋଲି ମୁଁ ବିଶ୍ୱାସ କରେ । ଯୁଦ୍ଧ ଶେଷ ହେବା ପରେ ଚୀନ୍ ଉପରେ କଟକଣା ପ୍ରତ୍ୟାହାର କରାଯିବ ।

ସେଣ୍ଟର ଫର୍ ରିସର୍ଚ୍ଚ ଅନ୍ ଏନର୍ଜି ଆଣ୍ଡ କ୍ଲିନ୍ ଏୟାର ଅନୁଯାୟୀ, ୨୦୨୩ ମସିହାରୁ ନାଟୋ ସଦସ୍ୟ ତୁର୍କୀ, ଚୀନ୍ ଏବଂ ଭାରତ ପରେ ରୁଷ ତେଲର ତୃତୀୟ ସର୍ବବୃହତ କ୍ରେତା ହୋଇଛି । ରୁଷୀୟ ତେଲ କିଣୁଥିବା ଅନ୍ୟ ରାଷ୍ଟ୍ରମାନଙ୍କ ମଧ୍ୟରେ ହଙ୍ଗେରୀ ଏବଂ ସ୍ଲୋଭାକିଆ ମଧ୍ୟ ସାମିଲ ଅଛନ୍ତି । ଟ୍ରମ୍ପଙ୍କ ବୟାନ ଉପରେ ଏହି ଦେଶଗୁଡ଼ିକ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇ ନାହିଁ।

ଗତ ମାସରେ, ଟ୍ରମ୍ପ ପ୍ରଶାସନ ରୁଷରୁ ତେଲ କିଣିବା ପାଇଁ ଭାରତ ଉପରେ ଅତିରିକ୍ତ ଶୁଳ୍କ ଲାଗୁ କରିଥିଲା। ଏହା ଭାରତ ଏବଂ ଆମେରିକା ମଧ୍ୟରେ ସମ୍ପର୍କରେ ଫାଟ ସୃଷ୍ଟି କରିଛି। ଏହା ଉପରେ, ଶୁକ୍ରବାର ଟ୍ରମ୍ପ କହିଥିଲେ ଯେ ରୁଷ ତେଲ କିଣିବା ପାଇଁ ଭାରତ ଉପରେ ଶୁଳ୍କ ଲଗାଇବା ଏକ ସହଜ କାମ ନୁହେଁ। ଏହା ଭାରତ ଏବଂ ଆମେରିକା ମଧ୍ୟରେ ସମ୍ପର୍କରେ ଫାଟ ସୃଷ୍ଟି କରେ। ଏହା ପରେ, ଶନିବାର, ଭାରତ ଉପରେ ନୀରବତା ବଜାୟ ରଖି, ସେ ଚୀନ ଉପରେ ଭାରୀ ଶୁଳ୍କ (୧୦୦ ପ୍ରତିଶତ ପର୍ଯ୍ୟନ୍ତ) ପ୍ରସ୍ତାବ ଦେଇଛନ୍ତି।