ନୂଆଦିଲ୍ଲୀ: ଭାରତ ଉପରେ ୫୦ ପ୍ରତିଶତ ଶୁଳ୍କ ଲଗାଇବା ପରେ ନିଜ ଦେଶରେ ହିଁ ସରବ୍ୟର ଶିକାର ହୋଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଆମେରକାର ନେତା, ଗଣମାଧ୍ୟମ ଓ ବିଶେଷଜ୍ଞମାନେ ଟ୍ରମ୍ପଙ୍କୁ ସମାଲୋଚନା କରିଛନ୍ତି। ଭାରତ ଉପରେ ବ୍ୟକ୍ତିଗତ ରାଗ ରଖି ଟ୍ରମ୍ପ ଏପରି ନିଷ୍ପତ୍ତି ନେଇଛନ୍ତି ବୋଲି ଆମେରିକା ଆର୍ଥିକ ସେବା ପ୍ରଦାନକାରୀ କମ୍ପାନୀ ଜେଫ୍ରିଜ୍ କହିଛି। ଟ୍ରମ୍ପଙ୍କର ବ୍ୟକ୍ତିଗତ ରାଗ ପଛରେ କାରଣ ଜାଣିଲେ ଆପଣ ବି ଆଶ୍ଚର୍ଯ୍ୟ ହେବେ।
ଭାରତ-ପାକିସ୍ତାନ ଯୁଦ୍ଧରେ ଟ୍ରମ୍ପଙ୍କ ମଧ୍ୟସ୍ଥତାକୁ ଭାରତ ବାରମ୍ବାର ଅସ୍ୱୀକାର କରିବା ହିଁ ଟ୍ରମ୍ପଙ୍କ ରାଗର ମୂଳକାରଣ। ଯୁଦ୍ଧରେ ଟ୍ରମ୍ପଙ୍କୁ ମଧ୍ୟସ୍ଥତା କରିବାକୁ ଅନୁମତି ନ ଦେବାରୁ ଟ୍ରମ୍ପ ନୋବେଲ ଶାନ୍ତି ପୁରସ୍କାର ପାଇଁ ଦାବି କରିପାରୁ ନାହାନ୍ତି। ଯୁଦ୍ଧ ରୋକିବାରେ ଟ୍ରମ୍ପଙ୍କର ଭୂମିକାକୁ ଭାରତ ବାରମ୍ବାର ଅସ୍ୱୀକାର କରୁଛି। ଯାହା ଟ୍ରମ୍ପ ପୁରସ୍କାର ବାଟରେ ବାଧକ ସାଜୁଛି। ଆଉ ଏହି ରାଗରୁ ଟ୍ରମ୍ପ ଭାରତ ଉପରେ ସର୍ବାଧିକ ଶୁଳ୍କ ଲଗାଇଛନ୍ତି ବୋଲି ଆମେରିକା ଫାଇନାନ୍ସ କମ୍ପାନୀ ଜେଫ୍ରିଜ୍ କହିଛି।
ରିପୋର୍ଟରେ କୁହାଯାଇଛି “ ଆମେରିକା ରାଷ୍ଟ୍ରପତିଙ୍କ ବ୍ୟକ୍ତିଗତ ସ୍ୱାର୍ଥ ଏହି ଉଚ୍ଚା ଟାରିଫର କାରଣ। ପାକିସ୍ତାନ ଯୁଦ୍ଧରେ ଟ୍ରମ୍ପଙ୍କ ମଧ୍ୟସ୍ଥତାକୁ ଅସ୍ୱୀକାର କରିବାରୁ ବ୍ୟକ୍ତିଗତ ରାଗ ରଖି ଟ୍ରମ୍ପ ଏହି ଉଚ୍ଚା ଶୁଳ୍କ ଲଗାଇଛନ୍ତି।”
ସୂଚନା ଥାଉକି ଆମେରିକା ଭାରତ ଉପରେ ସର୍ବାଧିକ ୫୦ ପ୍ରତିଶତ ଶୁଳ୍କ ଲଗାଇଛି। ପୂର୍ବରୁ ୨୫ ପ୍ରତିଶତ ଶୁଳ୍କ ଘୋଷଣା କରିଥିଲା। ଅଗଷ୍ଟ ୨୭ ତାରିଖରୁ ଆଉ ୨୫ ପ୍ରତିଶତ ଲାଗୁ ହୋଇଛି। ଫଳରେ ମୋଟ ୫୦ ପ୍ରତିଶତ ଶୁଳ୍କ ଲଗାଇଛି ଆମେରକା।
ତୃତୀୟ ପକ୍ଷର ମଧ୍ୟସ୍ଥତାକୁ ଭାରତ ସବୁବେଳେ ବିରୋଧ କରି ଆସିଛି। ବିଶେଷକରି କାଶ୍ମୀରକୁ ନେଇ ପାକିସ୍ତାନ ସହ ଥିବା ଦୀର୍ଘଦିନର ବିବାଦରେ ମଧ୍ୟସ୍ଥତାକୁ ଭାରତ ଅସ୍ୱୀକାର କରୁଛି। ଭାରତର ସ୍ଥିତି ବିଷୟରେ ଭଲ ଭାବରେ ଅବଗତ ଥିବା ସତ୍ତ୍ୱେ, ରାଜନୈତିକ ନାଟକର ମାହିର ଟ୍ରମ୍ପ୍ ଗର୍ବ କରି କହିଥିଲେ ଯେ ସେ ଭାରତ ଏବଂ ପାକିସ୍ତାନ ମଧ୍ୟରେ ଏକ "ପରମାଣୁ ଯୁଦ୍ଧ"କୁ ରୋକିଛନ୍ତି। ଟ୍ରେଡ୍ ଭୟ ଦେଖାଇ ସେ ଯୁଦ୍ଧ ବନ୍ଦ କରିଦେଇଛନ୍ତି ବୋଲି ଟ୍ରମ୍ପ ଦାବି କରି ଆସୁଥିବା ବେଳେ ଭାରତ ଟ୍ରମ୍ପଙ୍କ ଦାବିକୁ ସବୁବେଳେ ଅସ୍ୱୀକାର କରି ଆସୁଛି। ଏହା ପୂର୍ବରୁ ବର୍ଷେ ତଳେ ଟ୍ରମ୍ପ କାଶ୍ମୀର ସମସ୍ୟାରେ ମଧ୍ୟସ୍ଥତା କରିବାକୁ ପ୍ରସ୍ତାବ ଦେଇଥିଲେ। ଭାରତ ସେତେବେଳେ ବି ମନା କରିଥିଲା।
ଆମେରିକା ସଂସ୍ଥା ରିପୋର୍ଟରେ କହିଛି ଯେ ଟ୍ରମ୍ପଙ୍କ ଶୁଳ୍କ ଯୋଗୁ ଭାରତ ବଡ଼ ଆକାରରେ ଆର୍ଥିକ ମୂଲ୍ୟ ଦେବାର ଆଶଙ୍କା ଥିବା ସତ୍ତ୍ୱେ ବି ତୃତୀୟ ପକ୍ଷ ମଧ୍ୟସ୍ଥତାର ନିଜର ସୀମା ରେଖା ବଜାଇ ରଖିଛି। ଯାହା ଟ୍ରମ୍ପଙ୍କ ଆହଂକାରକୁ ଆଘାତ ଦେଇଥିଲା। ଫଳରେ ସେ ନୋବେଲ ପାଇଁ ଦାବି କରିପାରୁ ନାହାନ୍ତି। ଭାରତ ସହିତ ଟ୍ରମ୍ପଙ୍କର ଏହି ମୁହାଁମୁହିଁ ସ୍ଥିତି ଯୋଗୁ ଦୁଇ ଦେଶର ସମ୍ପର୍କ ଖରାପ ହୋଇଯାଇଛି। ଚୀନକୁ ଆୟତରେ ରଖିବାକୁ ଆମେରିକା ଭାରତକୁ ଏକ ଅସ୍ତ୍ର ଭାବୁଥିଲା, ତାହା ଏବେ ଭାଙ୍ଗିଯାଇଛି।
ସେହିପରି ଏତେମାତ୍ରାରେ ଶୁଳ୍କ ଲାଗୁ କରିବାର ଆଉ ଏକ କାରଣ କୃଷି କ୍ଷେତ୍ରରରେ ସହମତି ନ ହେବା ବୋଲି କହିଛି ଜେଫ୍ରିଜ। ଟ୍ରମ୍ପ ପ୍ରଶାସନ ଭାରତର କୃଷି ଏବଂ ଦୁଗ୍ଧ ବଜାରରେ ଅଧିକ ପ୍ରବେଶ ଛାହୁଁଛି, ହେଲେ ଭାରତ ଏ ଦିଗରେ ବି ସୀମା ରେଖା ଟାଣିଛି। ଫଳରେ ଦୁଇ ଦେଶ ମଧ୍ୟରେ ବାଣିଜ୍ୟ ଚୁକ୍ତି ଅନିଶ୍ଚିତତାକୁ ଚାଲିଯାଇଛି। ଜେଫ୍ରିଜ୍ ରିପୋର୍ଟରେ ଉଲ୍ଲେଖ କରିଛି ଯେ ପ୍ରାୟ ୨୫୦ ନିୟୁତ ଚାଷୀ ଏବଂ ଶ୍ରମିକ ସେମାନଙ୍କ ଜୀବିକା ପାଇଁ କୃଷି ଉପରେ ନିର୍ଭର କରନ୍ତି। ଏହି କ୍ଷେତ୍ର ଭାରତର ପ୍ରାୟ ୪୦% କାର୍ଯ୍ୟଶକ୍ତି ରହିଛି। ତେଣୁ କୃଷି କ୍ଷେତ୍ର ଆମେରିକା ପାଇଁ ଖୋଲିଦେବା ଭାରତକୁ ବଡ଼ ଆର୍ଥିକ କ୍ଷତି ପହଞ୍ଚାଇବ। ତେଣୁ ଭାରତ ଏ ଦିଗରେ ସତର୍କ ରହିଛି।
