ଗୋଟି ଗୋଟି କରି ଫାଟିଲା ୨୦୦ ସିଲିଣ୍ଡର... ତରଳିଗଲା ପୁରା ଟ୍ରକ୍

ନୂଆଦିଲ୍ଲୀ ୦୮।୧୦: ଜୟପୁର-ଆଜମେର ରାଜପଥ ସାନଭର୍ଦା ଅଞ୍ଚଳରେ ଭୟଙ୍କର ଅଗ୍ନିକାଣ୍ଡ । ଏଲପିଜି ସିଲିଣ୍ଡର ବୋଝେଇ ଏକ ଟ୍ରକ୍ ଧକ୍କା ପରେ ହୁତୁହୁତୁ ହୋଇ ଜଳିଗଲା । ମଙ୍ଗଳବାର ରାତିରେ ଏହି ଭୟଙ୍କର ଅଗ୍ନିକାଣ୍ଡ ଘଟିଥିଲା। ପାଖାପାଖି ୩ ଘଣ୍ଟା ଧରି ଲାଗି ରହିଥିଲା ବିସ୍ଫୋରଣ । ୨୦୦ ସିଲିଣ୍ଡର ଗୋଟିଏ ପରେ ଗୋଟିଏ ଫାଟି ଟ୍ରକ୍‌ଟି ସମ୍ପୂର୍ଣ୍ଣ ତରଳିଗଲା। ଏହି ଭୟଙ୍କର ଦୁର୍ଘଟଣାର ସିସିଟିଭି ଫୁଟେଜ୍ ସାମ୍ନାକୁ ଆସିଛି ।

ବାସ୍ତବରେ ଏଲପିଜି ସିଲିଣ୍ଡର ବୋଝେଇ ଟ୍ରକ୍‌ଟି ରାସ୍ତା ସାଇଟରେ ଥିବା ଏକ ବେଆଇନ ରାସ୍ତାରେ ବୁଲିବାକୁ ଚେଷ୍ଟା କରୁଥିଲା । ଏହି ସମୟରେ ପଛରୁ ଆସୁଥିବା ଏକ ଦ୍ରୁତଗାମୀ ଟ୍ୟାଙ୍କର ଏହାକୁ ଧକ୍କା ଦେଇଥିଲା । ଟ୍ରକଟିରେ ତୁରନ୍ତ ନିଆଁ ଲାଗିଗଲା ଏବଂ ସିଲିଣ୍ଡରଗୁଡ଼ିକ ଫାଟିବାକୁ ଲାଗିଲା। ଏହି ସିଲିଣ୍ଡର ବିସ୍ଫୋରଣର ଶବ୍ଦ ୧୦ କିଲୋମିଟର ଦୂର ଯାଏଁ ଶୁଣାଯାଇଥିଲା ।  ନିକଟରେ ଥିବା ହୋଟେଲଗୁଡ଼ିକରେ ଆତଙ୍କ ଖେଳିଯାଇଥିଲା ଏବଂ ରାସ୍ତାର ଉଭୟ ପାର୍ଶ୍ୱରେ ପ୍ରାୟ ୭ କିଲୋମିଟର ପର୍ଯ୍ୟନ୍ତ ଟ୍ରାଫିକ୍ ଜାମ୍ ହୋଇଥିଲା।

ସୂଚନା ପାଇବା ମାତ୍ରେ ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିଥିଲା । କିନ୍ତୁ ବିସ୍ଫୋରଣ ଯୋଗୁଁ ନିଆଁ ଲିଭାଇବା କଷ୍ଟକର ହୋଇଥିଲା । ନିଆଁ ଏତେ ତୀବ୍ର ଥିଲା ଯେ ୫ଟି ଗାଡ଼ି ସମ୍ପୂର୍ଣ୍ଣ ନଷ୍ଟ ହୋଇଗଲା। ଦୁର୍ଘଟଣାରେ ଜଣେ ବ୍ୟକ୍ତି ଜୀବନ୍ତ ଦଗ୍ଧ ହୋଇଯାଇଛନ୍ତି । କୁହାଯାଉଛି କି ଦୁର୍ଘଟଣାଗ୍ରସ୍ତ ଟ୍ରକରେ ମୋଟ ୩୩୦ ସିଲିଣ୍ଡର ଥିଲା ।  ଏଥିମଧ୍ୟରୁ ପ୍ରାୟ ୨୦୦ ସିଲିଣ୍ଡର ବିସ୍ଫୋରଣ ହୋଇଥିଲା।