ଅଜିତ୍ ଭାରତୀଙ୍କୁ ଅଟକ ରଖି ପୋଲିସର ପଚରାଉଚରା ! ସିଜେଆଇଙ୍କ ବିରୁଦ୍ଧରେ ସୋସିଆଲ୍ ମିଡିଆରେ କରିଥିଲେ ଟିପ୍ପଣୀ

​​​​​​​ନୂଆଦିଲ୍ଲୀ: ଉତ୍ତର ପ୍ରଦେଶର ନୋଏଡା ପୋଲିସ ସୋମବାର ଚର୍ଚ୍ଚିତ ୟୁଟ୍ୟୁବର ଓ ସୋସିଆଲ୍ ମିଡିଆ ଇନଫ୍ୟୁଏନ୍ସର ଅଜିତ୍ ଭାରତୀଙ୍କୁ ଅଟକ ରଖିଛି । ପ୍ରଧାନ ବିଚାରପତି ଜଷ୍ଟିସ୍ ବି.ଆର.ଗଭାଇଙ୍କ ବିରୁଦ୍ଧରେ ଉତ୍ତେଜନାପୂର୍ଣ୍ଣ ସୋସିଆଲ୍ ମିଡିଆ ପୋଷ୍ଟ ପାଇଁ ଏହି କାର୍ଯ୍ୟାନୁଷ୍ଠାନ ହୋଇଛି । କୁହାଯାଉଛି ଯେ ଭାରତୀ ନିଜ ଭିଡିଓଗୁଡ଼ିକରେ ଲୋକଙ୍କୁ ନ୍ୟାୟପାଳିକା ବିରୁଦ୍ଧରେ ଉତ୍ତେଜନମୂଳକ କଥା କହିଥିଲେ । ଅଜିତ୍ ଭାରତୀଙ୍କ ଅଟକ ଖବର ପଦାକୁ ଆସିବା ପରେସୋସିଆଲ ମିଡିଆରେ ହଙ୍ଗାମା ହୋଇଥିଲା । ଲୋକମାନେ ଏହି ମାମଲାରେ ବାକ୍ ସ୍ୱାଧୀନତା ଭଳି ପ୍ରସଙ୍ଗ ଉଠାଇବା ଆରମ୍ଭ କରିଛନ୍ତି । ସୁପ୍ରିମକୋର୍ଟରେ ଜଣେ ବରିଷ୍ଠ ଓକିଲ ପ୍ରଧାନ ବିଚାରପତିଙ୍କ ଉପରେ ଜୋତା ଫିଙ୍ଗିବା ଉଦ୍ୟମ ପରଠାରୁ ଏହି ପ୍ରସଙ୍ଗ ବେଶ ଉଷ୍ମ ହୋଇଛି । ଅଜିତ୍ ଭାରତୀ ଏହା ଉପରେ ପୋଷ୍ଟ କରିଥିଲେ ।

ରିପୋର୍ଟ ଅନୁସାରେ, ସୋମବାର ଅପରାହ୍ନରେ ନୋଏଡା ସେକ୍ଟର-୫୮ ପୋଲିସ ଅଜିତ୍ ଭାରତୀଙ୍କୁ ପଚରାଉଚରା ପାଇଁ ଥାନାକୁ ନେଇଥିଲା । ପ୍ରାଥମିକ ପଚରାଉଚରା ପରେ, ତାଙ୍କୁ ସେକ୍ଟର-୬ ସ୍ଥିତ ଡିସିପି ଅଫିସକୁ ନିଆଯାଇଥିଲା । ପୋଲିସ କହିଛି ଯେ ପ୍ରଥମେ ତାଙ୍କୁ କେବଳ ପଚରାଉଚରା ପାଇଁ ଡକାଯାଇଥିଲା, କିନ୍ତୁ ପରେ ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ଅଧିକ ତଦନ୍ତ ପାଇଁ ଉଚ୍ଚ ଅଧିକାରୀଙ୍କ ସମ୍ମୁଖରେ ହାଜର କରାଯାଇଥିଲା । ଅଜିତ ଭାରତୀଙ୍କୁ ଗିରଫ କରାଯାଇଛି ନା କେବଳ ପଚରାଉଚରା ପାଇଁ ଅଟକ ରଖାଯାଇଛି ତାହା ସ୍ପଷ୍ଟ ହୋଇନାହିଁ । ରିପୋର୍ଟ ଅନୁସାରେ, ନୋଏଡା ପୋଲିସ ତାଙ୍କର ସୋସିଆଲ ମିଡିଆ ବିଷୟବସ୍ତୁ ଏବଂ ଭିଡିଓଗୁଡ଼ିକର ତଦନ୍ତ ଆରମ୍ଭ କରିଛି ।

ସୁପ୍ରିମକୋର୍ଟରେ ଜଣେ ବରିଷ୍ଠ ଓକିଲ ପ୍ରଧାନ ବିଚାରପତି ବି.ଆର.ଗଭାଇଙ୍କ ଉପରକୁ ଜୋତା ଫିଙ୍ଗିବାକୁ ଚେଷ୍ଟା କରିବା ପରେ ଉତ୍ତେଜନା ଦେଖାଦେଇଥିଲା । ଏହି ଘଟଣା ପରେ, ଅଜିତ ଭାରତୀ ତାଙ୍କ ୟୁଟ୍ୟୁବ୍ ଚ୍ୟାନେଲ୍ ଏବଂ ଅନ୍ୟାନ୍ୟ ସୋସିଆଲ ମିଡିଆ ପ୍ଲାଟଫର୍ମରେ ଟିପ୍ପଣୀ କରିଥିଲେ । ପୋଲିସ କହିବା ଅନୁସାରେ ତାଙ୍କ ମନ୍ତବ୍ୟରେ ଲୋକଙ୍କୁ ହିଂସା କିମ୍ବା ନ୍ୟାୟପାଳିକା ବିରୁଦ୍ଧରେ ଉସୁକାଇବା ପରି ବିଷୟବସ୍ତୁ ଥିଲା । ପୋଲିସ ଅଧିକାରୀମାନେ କହିଛନ୍ତି ଯେ ଅଜିତ୍ ଭାରତୀଙ୍କ ଭିଡିଓର ଡିଜିଟାଲ୍ ଫରେନସିକ୍ ଯାଞ୍ଚ ଚାଲିଛି । ତାଙ୍କ ବକ୍ତବ୍ୟଗୁଡ଼ିକ କୌଣସି ସମ୍ପ୍ରଦାୟ, ପ୍ରତିଷ୍ଠାନ କିମ୍ବା ସାମ୍ବିଧାନିକ ପଦବୀ ବିରୁଦ୍ଧରେ ଘୃଣା ସୃଷ୍ଟି କରେ କି ନାହିଁ ଯାଞ୍ଚରେ ସ୍ପଷ୍ଟ ହୋଇପାରିବ ।

ଅଜିତ୍ ଭାରତୀଙ୍କୁ ଅଟକ ରଖାଯିବା ପରେ, #ReleaseAjeetBharti ସୋସିଆଲ ମିଡିଆରେ ଟ୍ରେଣ୍ଡ କରିବା ଆରମ୍ଭ କରିଛି । ତାଙ୍କ ସମର୍ଥକ ଏବଂ କିଛି ସାମ୍ବାଦିକ ଏହାକୁ ବାକ୍ ସ୍ୱାଧୀନତା ଉପରେ ଆକ୍ରମଣ ବୋଲି କହିଛନ୍ତି । ଅନେକ ଲୋକ ପ୍ରଶ୍ନ ଉଠାଇଛନ୍ତି ଯେ ୟୁଟ୍ୟୁବରଙ୍କ ମତାମତ ପ୍ରକାଶ କରିବା ଏକ ଅପରାଧ କି ? ଅନ୍ୟପକ୍ଷରେ, ଆଇନ ବିଶେଷଜ୍ଞଙ୍କ ମତଯେ ବାକ୍ ସ୍ୱାଧୀନତା କୌଣସି ସାମ୍ବିଧାନିକ ପ୍ରତିଷ୍ଠାନ କିମ୍ବା ପଦବୀ ବିରୁଦ୍ଧରେ ଘୃଣା କିମ୍ବା ହିଂସାକୁ ଅନୁମତି ଦିଏ ନାହିଁ । ତେବେ ନୋଏଡା ପୋଲିସ ଏପର୍ଯ୍ୟନ୍ତ ଏହା ଉପରେ କୌଣସି ଅଫିସିଆଲ୍ ବୟାନ ଜାରି କରିନାହିଁ ।