ନୂଆଦିଲ୍ଲୀ ୧୩।୦୪; ୨୦୧୯ରେ ଜମ୍ମୁ-କାଶ୍ମୀରର ପୁଲୱାମା ଆତଙ୍କବାଦୀ ଆକ୍ରମଣରେ ସିଆରପିଏଫ୍ ଯବାନ ହେମରାଜ ମୀଣା ସହିଦ ହୋଇଥିଲେ । ଦୀର୍ଘ ୬ ବର୍ଷ ପରେ ତାଙ୍କ ଘରକୁ ଖୁସି ଫେରିଛି । ସହିଦ ହେମରାଜଙ୍କ ଝିଅର ବିବାହ ଅନୁଷ୍ଠିତ ହୋଇଛି। ଏଥିରେ ଯୋଗ ଦେଇଛନ୍ତି ଲୋକସଭା ଅଧ୍ୟକ୍ଷ ଓମ୍ ବିର୍ଲା । ୬ ବର୍ଷ ପୂର୍ବେ ହେମରାଜଙ୍କ ପତ୍ନୀ ମଧୁବାଲାଙ୍କୁ ଦେଇଥିବା କଥା ସେ ରଖିଛନ୍ତି।
ଏହି ବିବାହରେ ସେ ମଧୁବାଲାଙ୍କ ଭାଇ ଭାବେ ସବୁ ବିଧି କରିଛନ୍ତି । ମଧୁବାଲାଙ୍କ ଝିଅ ବିବାହରେ ପହଞ୍ଚି ଭାତ ଭରାଈ ବିଧି ସେ ପାଳନ କରିଛନ୍ତି । ସେ ପାରମ୍ପରିକ ମାୟରା (ଶଗୁନ ଓ ଉପହାର) ସହିତ ରାଜସ୍ଥାନର ସାଙ୍ଗୋଦରେ ଅନୁଷ୍ଠିତ ଏହି ବିବାହରେ ପହଞ୍ଚି କନ୍ୟାକୁ ଆଶୀର୍ବାଦ ପ୍ରଦାନ ସହିତ ଭଉଣୀ ମଧୁବାଲାଙ୍କୁ ଆବେଗପୂର୍ଣ୍ଣ ସମର୍ଥନ ପ୍ରଦାନ କରିଛନ୍ତି । ପ୍ରଥା ଅନୁସାରେ ବିର୍ଲା ଅତି ସ୍ନେହର ସହ ମଧୁବାଲାଙ୍କୁ ଏକ ଚୁନରି ଓଢ଼ାଇ ଭାଇ ଭାବେ ନିଜର ଭୂମିକା ନିର୍ବାହ କଲେ ।
ପ୍ରତିବଦଳରେ ମଧୁବାଲା ବତ୍ତିସି ବିଧି ପାଳନ କଲେ ଏବଂ ଆରତୀ ସହିତ ବିର୍ଲାଙ୍କ କପାଳରେ ତିଲକ ଲଗାଇଲେ। ବିର୍ଲାଙ୍କ ସମେତ ସାଙ୍ଗୋଦ ବିଧାୟକ ଓ ରାଜସ୍ଥାନ ଶକ୍ତି ମନ୍ତ୍ରୀ ହୀରାଲାଲ ନାଗର ମଧ୍ୟ ବିବାହ ଉତ୍ସବରେ ଯୋଗ ଦେଇଥିଲେ। ଏ ଅବସରରେ ବିର୍ଲା ସହିଦ ହେମରାଜଙ୍କ ମୂର୍ତ୍ତିକୁ ଶ୍ରଦ୍ଧାସୁମନ ଜଣାଇଲେ ଏବଂ କହିଲେ ‘ଦେଶ ପାଇଁ ତାଙ୍କ ସାହସ ଓ ପ୍ରେମ ଆମ ସମସ୍ତଙ୍କୁ ପ୍ରେରଣା ଦେଉଥିବ । ତାଙ୍କ ପରିବାର ସହ ସର୍ବଦା ଠିଆ ହେବା ମୋର କର୍ତ୍ତବ୍ୟ ।’
