ନୂଆଦିଲ୍ଲୀ ୧୦।୧୧: ଦିଲ୍ଲୀ ମେଟ୍ରୋ ଷ୍ଟେସନ ନିକଟରେ ହୋଇଥିବା ବିସ୍ଫୋରଣ ସାରା ଦେଶକୁ ଥରାଇ ଦେଇଛି। ଏହି ବିସ୍ଫୋରଣ ମେଟ୍ରୋଷ୍ଟେସନ ପାର୍କିଂରେ ଛିଡା ହୋଇଥିବା ଏକ କାରରେ ହୋଇଛି। ଏହା ପରେ ରାଜଧାନୀ ଦିଲ୍ଲୀକୁ ଆଲର୍ଟ ରେ ରଖାଯାଇଛି। ଏହି ବିସ୍ଫୋରଣ ମୃତ୍ୟୁ ସଂଖ୍ୟା ୧୧ ବୋଲି କୁହାଯାଉଛି, ସେହିପରି ପରି ୩୦ ଜଣ ଆହତ ହୋଇଛନ୍ତି। ଏବେ ଏହି ଘଟଣାକୁ ନେଇ ସାରା ଦେଶରୁ ପ୍ରତିକ୍ରିୟା ଆସିବାରେ ଲାଗିଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ସୋସିଆଲ ମିଡିଆରେ ଏକ ପୋଷ୍ଟ କରିଛନ୍ତି।

ମମତା ବାନାର୍ଜୀ ଲେଖିଛନ୍ତି ଯେ ନୂଆଦିଲ୍ଲୀରେ ହୋଇଥିବା ବିସ୍ଫୋରଣ ଖବର ମୋତେ ଆଘାତ ଦେଇଛି। ପୀଡ଼ିତ ପରିବାର ଯେଉଁମାନେ ନିଜ ପ୍ରିୟ ଜନଙ୍କୁ ହରାଇଛନ୍ତି ସେମାନଙ୍କ ପ୍ରତି ମୋର ସମବେଦନା ରହିଛି। ଏହା ସହିତ ମମତା ବାନାର୍ଜୀ ବିସ୍ଫୋରଣରେ ସମସ୍ତ ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି। ଏହି ବିସ୍ଫୋରଣକୁ ନେଇ କଂଗ୍ରେସ ସାଂସଦ ପ୍ରିୟଙ୍କା ଗାନ୍ଧିଙ୍କ ପ୍ରତିକ୍ରିୟା ମଧ୍ୟ ଆସିଛି। ସେ ସୋସିଆଲ ମିଡିଆ ପୋଷ୍ଟ କରି ଘଟଣାରେ ଦୁଃଖ ବ୍ୟକ୍ତ କରିଛନ୍ତି।

ପ୍ରିୟଙ୍କା ଗାନ୍ଧି ଲେଖିଛନ୍ତି ଯେ ଦିଲ୍ଲୀରେ ସୋମବାର ହୋଇଥିବା ବିସ୍ଫୋରଣରେ କେତେକଙ୍କ ମୃତ୍ୟୁ ଓ କେତେକ ଆହତ ହୋଇଥିବା ନେଇ ଦୁଃଖଦ ଖବର ଆସୁଛି। ଈଶ୍ୱର ଦିବଙ୍ଗତ ଆତ୍ମାଙ୍କୁ ଶାନ୍ତି ଦିଅନ୍ତୁ, ସୋକ ସନ୍ତପ୍ତ ପରିବାରଙ୍କ ପ୍ରତି ମୋର ଗଭୀର ସମବେଦନା। ସେହିପରି ପ୍ରିୟଙ୍କା ଗାନ୍ଧି ଆହତଙ୍କ ଆଶୁ ଆରୋଗ୍ୟ କାମନା କରିଛନ୍ତି।