ବିଳାଶପୁର: ଛତିଶଗଡ଼ ବିଳାଶପୁର ଚକ୍କରଭାଠା ଏୟାରପୋର୍ଟରେ ଶୁକ୍ରବାର ଏକ ଭୀଷଣ ବିମାନ ଦୁର୍ଘଟଣା ଅଳ୍ପକେ ଟଳିଛି। ଦିଲ୍ଲୀରୁ ବିଳାଶପୁର ଆସିଥିବା ଆଲାଏନ୍ସ ଏୟାର ଫ୍ଲାଇଟ ସଂଖ୍ୟା ୯୧୬୯୭ ରନୱେରେ ଲ୍ୟାଣ୍ଡିଂ କରୁଥିବା ବେଳେ ଅଚାନକ ବିମାନର ଏକ ଟାୟାର ଫାଟି ଯାଇଛି। ବିମାନ ଅବତରଣ ସହ ବିସ୍ଫୋରଣ ଶବ୍ଦ ବିମାନବନ୍ଦରରେ ଆତଙ୍କ ଖେଳାଇ ଦେଇଥିଲା। ବିମାନ ବନ୍ଦର ପ୍ରଶାସନ ଓ କର୍ମଚାରୀ ଆତଙ୍କିତ ହୋଇ ପଡିଥିଲେ। ତେବେ ପାଇଲଟଙ୍କ ଉପସ୍ଥିତି ବୁଦ୍ଧି ଯୋଗୁ ଭୀଷଣ ବିମାନ ଦୁର୍ଘଟଣା ଟଳି ପାରିଛି।

ଲ୍ୟାଣ୍ଡିଂ କାଲରେ ଜୋରଦାର ଶବ୍ଦ ସହ ଟାୟାର ଫାଟିବା ସତ୍ତ୍ୱେ ପାଇଲଟ ଅସାଧାରଣ ସାହସ ପ୍ରଦର୍ଶନ ପୂର୍ବକ ବିମାନକୁ ଅସନ୍ତୁଳିତ ହେବାକୁ ଦେଇ ନଥିଲେ ଓ ତତ୍ପରତାର ସହ ବିମାନକୁ ରନୱେ କଡରେ ରୋକି ଦେଇଥିଲେ। ସୂଚନା ପାଇ ଏୟାରପୋର୍ଟ ଫାୟାର ଓ ରେସ୍କ୍ୟୁ ଟିମ୍ ଘଟଣାସ୍ଥଳରେ ପହଞ୍ଚି ଯାଇଥିଲେ। ତେବେ ଏହି ଘଟଣାରେ ଯାତ୍ରୀ ଅଥବା ଚାଳକ ଦଳ ସଦସ୍ୟ ପ୍ରଭାବିତ ହୋଇ ନଥିବା ବେଳେ ସମସ୍ତେ ସୁରକ୍ଷିତ ବାହାରିଛନ୍ତି। ଏହି ଘଟଣା ପରେ ବିମାନରେ ଦେଖା ଦେଇଥିବା ବୈଷୟିକ ତ୍ରୁଟି ଯୋଗୁ ବିଳାଶପୁରରୁ ପ୍ରୟାଗରାଜ ଯିବାକୁ ଥିବା କନେକ୍ଟିଂ ଫ୍ଲାଇଟ ରଦ୍ଦ ହୋଇଯାଇଛି।

ଏଣୁ ବିମାନରେ ଥିବା ତଥା ଏୟାରପୋର୍ଟରେ ଅପେକ୍ଷା କରିଥିବା ପ୍ରୟାଗରାଜ ଯାତ୍ରୀଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡିଛି। ଘଟଣା ପରେ ଏୟାରପୋର୍ଟ ଅଥରିଟି ଓ ଆଲାଏନ୍ସ ଏୟାରର ଟେକ୍ନିକାଲ ଟିମ୍ ଘଟଣାର କାରଣ ଓ ଟାୟାର ଫାଟିବା ଯାଞ୍ଚ ଆରମ୍ଭ କରିଦେଇଛନ୍ତି। ବିମାନ ଏବେ ବିଳାଶପୁର ଏୟାରପୋର୍ଟରେ ଅଟକି ରହିଥିବା ବେଳେ ସମସ୍ତ ଯାତ୍ରୀ ଓ ଚାଳକଦଳ ସଦସ୍ୟ ସୁରକ୍ଷିତ ଥିବା କୁହାଯାଇଛି।