କ୍ୱେଟାର ଫ୍ରଣ୍ଟିଅର୍ କର୍ପସ୍ ମୁଖ୍ୟାଳୟରେ ଶକ୍ତିଶାଳୀ ବିସ୍ଫୋରଣ, ୫ ମୃତ

କରାଚି ୩୦/୦୯: ମଙ୍ଗଳବାର କ୍ୱେଟାରେ ଥିବା ପାକିସ୍ତାନୀ ସେନା ମୁଖ୍ୟାଳୟରେ ବଡ଼ ବିସ୍ଫୋରଣ । ପୂର୍ବ କ୍ୱେଟାରେ ଫ୍ରଣ୍ଟିୟର୍ କର୍ପସ୍ ମୁଖ୍ୟାଳୟ ନିକଟରେ ଏକ ଶକ୍ତିଶାଳୀ ବିସ୍ଫୋରଣ ପରେ ଫାୟରିଂ । ସମ୍ବେଦନଶୀଳ ଅଞ୍ଚଳ ଭାବରେ ବିବେଚିତ ମଡେଲ୍ ଟାଉନ୍ ଏବଂ ଆଖପାଖ ଅଞ୍ଚଳରେ ବିସ୍ଫୋରଣ ଶୁଣାଯାଇଥିଲା ।

ବିସ୍ଫୋରଣରେ ନିକଟବର୍ତ୍ତୀ ଘର ଏବଂ କୋଠାର ଝରକା ଭାଙ୍ଗି ଯାଇଥିଲା । ଏପର୍ଯ୍ୟନ୍ତ ବିସ୍ଫୋରଣରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ୧୯ ଜଣ ଆହତ ହୋଇଥିବା ସୂଚନା ମିଳିଛି । ବେଲୁଚିସ୍ତାନ ସ୍ୱାସ୍ଥ୍ୟ ମନ୍ତ୍ରୀ ବଖ୍ତ ମହମ୍ମଦ କକର ଓ ସ୍ୱାସ୍ଥ୍ୟ ସଚିବ ମୁଜିବ-ଉର-ରେହମାନ ସିଭିଲ୍ ହସ୍ପିଟାଲ୍ କ୍ୱେଟା, ବିଏମ୍ସି ହସ୍ପିଟାଲ୍ ଏବଂ ଟ୍ରମା ସେଣ୍ଟରରେ ଜରୁରୀକାଳୀନ ପରିସ୍ଥିତି ଘୋଷଣା କରିଛନ୍ତି।

ସ୍ୱାସ୍ଥ୍ୟ ବିଭାଗ ଅନୁଯାୟୀ, ସମସ୍ତ ପରାମର୍ଶଦାତା, ଡାକ୍ତର, ଫାର୍ମାସିଷ୍ଟ, ଷ୍ଟାଫ୍ ନର୍ସ ଏବଂ ପାରାମେଡିକ୍ ଡ୍ୟୁଟିରେ ଅଛନ୍ତି । ଉଦ୍ଧାରକାରୀ ସୂତ୍ର ନିଶ୍ଚିତ କରିଛନ୍ତି ଯେ ଆହତ ଏବଂ ମୃତକଙ୍କ ମୃତଦେହକୁ ସିଭିଲ୍ ହସ୍ପିଟାଲ୍ କ୍ୱେଟାକୁ ସ୍ଥାନାନ୍ତର କରାଯାଇଛି । ସୂତ୍ର ଅନୁଯାୟୀ, ବିସ୍ଫୋରଣ ଯୋଗୁଁ ସହରରେ ଆତଙ୍କ ଖେଳିଗଲା ।

ଘଟଣାସ୍ଥଳରେ ଗୁଳି ଫୁଟିବାର ଶବ୍ଦ ମଧ୍ୟ ଶୁଣାଗଲା। ପରେ ଲୋକମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଥିଲା। ଘଟଣାସ୍ଥଳରୁ ଧୂଆଁର କୁଣ୍ଡ ବାହାରୁଥିବା ଦେଖାଯାଇଥିଲା । ପ୍ରାରମ୍ଭିକ ରିପୋର୍ଟରୁ ଜଣାପଡୁଛି ଯେ ବିସ୍ଫୋରଣ ବହୁତ ଜୋରରେ ହୋଇଥିଲା । କିନ୍ତୁ ବିସ୍ଫୋରଣର ପ୍ରକୃତ କାରଣ ଅସ୍ପଷ୍ଟ ରହିଛି।