ଯେଉଁଠି ଲାଡେନକୁ ଲୁଚାଇ ରଖିଥିଲା ପାକିସ୍ତାନ, ସେହିଠାରୁ ଭାରତକୁ ଧମକ ଦେଲେ ଅସୀମ ମୁନିର

ନୂଆଦିଲ୍ଲୀ ୧୮/୧୦: ପାକିସ୍ତାନର ସେନା ମୁଖ୍ୟ । ଫିଲ୍ଡ ମାର୍ଶାଲ ଅସୀମ ମୁନିର । ବାରମ୍ୱାର ଭାରତ ବିରୋଧରେ ଓଗାଳୁଛନ୍ତି ବିଷ । ପୁଣି ଥରେ ଭାରତ ବିରୋଧରେ ଉତ୍ତେଜନାପୂର୍ଣ୍ଣ ବୟାନ ଦେଇଛନ୍ତି । ପାକିସ୍ତାନ ସାମରିକ ଏକାଡେମୀ, କାଲିଲ (ଆବଟାବାଦ)ରେ କ୍ୟାଡେଟମାନଙ୍କୁ ସମ୍ବୋଧିତ କରିଥିଲେ ମୁନିର । ସେ କହିଛନ୍ତି ଯେ ଭାରତ ଦ୍ୱାରା ଯେକୌଣସି "ସାମାନ୍ୟ ଉତ୍ତେଜନା" ପାଇଁ ପାକିସ୍ତାନ "ଆଶାଠାରୁ ଅଧିକ" ଜବାବ ଦେବ । ସେ କହିଛନ୍ତି ଯେ ପାକିସ୍ତାନ ଭାରତର ଭୌଗୋଳିକ ବିଶାଳତାର ଭ୍ରମକୁ ଭାଙ୍ଗି ଦେବ ।

ଏହାର ପ୍ରତିକ୍ରିୟା ଘାତକ ହେବ । ମୁନିର ଭାରତୀୟ ସାମରିକ ନେତୃତ୍ୱକୁ "ଉତ୍ସାହଜନକ ବୟାନବାଜି" ରୁ ନିବୃତ୍ତ ରହିବାକୁ ଚେତାବନୀ ଦେଇଛନ୍ତି । ସେ କହିଛନ୍ତି ଯେ ଭାରତ ଜାତିସଂଘ ପ୍ରସ୍ତାବ ଏବଂ ଅନ୍ତର୍ଜାତୀୟ ଚୁକ୍ତିନାମା ଅନୁଯାୟୀ ସମାନତା ଏବଂ ପାରସ୍ପରିକ ସମ୍ମାନ ଆଧାରରେ ପାକିସ୍ତାନ ସହିତ ସମସ୍ତ ବାକି ଥିବା ପ୍ରସଙ୍ଗର ସମାଧାନ କରିବା ଉଚିତ। ସେ କହିଛନ୍ତି ଯେ, ପାକିସ୍ତାନକୁ କେବେବି ବାଧ୍ୟ କିମ୍ବା ଭୟଭୀତ କରାଯାଇପାରିବ ନାହିଁ। 

ଅସୀମ ମୁନିର ପୂର୍ବରୁ ଅନେକ ବିବାଦୀୟ ବୟାନ ଦେଇଛନ୍ତି । ଅଗଷ୍ଟ ୨୦୨୫ରେ, ଆମେରିକାର ଟାମ୍ପାରେ ଏକ କାର୍ଯ୍ୟକ୍ରମରେ ସେ କହିଥିଲେ ଯେ ଯଦି ପାକିସ୍ତାନ ଏକ ଅସ୍ତିତ୍ୱଗତ ସଙ୍କଟର ସମ୍ମୁଖୀନ ହୁଏ । ତେବେ ଆମେ ଆମ ସହିତ ଅଧା ବିଶ୍ୱକୁ ଧ୍ୱଂସ କରିଦେବୁ । ସେ ଏହା ମଧ୍ୟ କହିଥିଲେ ଯେ ଯଦି ଭାରତ ସିନ୍ଧୁ ନଦୀ ଉପରେ ଏକ ବନ୍ଧ ନିର୍ମାଣ କରେ । ତେବେ ପାକିସ୍ତାନ "୧୦ ଟି କ୍ଷେପଣାସ୍ତ୍ର" ସହିତ ଏହାକୁ ଧ୍ୱଂସ କରିବ । ଭାରତ ଏହି ବିବୃତ୍ତି ଉପରେ ତୀବ୍ର ପ୍ରତିକ୍ରିୟା ପ୍ରକାଶ କରି ଏହାକୁ "ପରମାଣୁ ବ୍ଲାକମେଲ୍" ଏବଂ ପାକିସ୍ତାନର ଦାୟିତ୍ୱହୀନ ଆଚରଣର ଏକ ଉଦାହରଣ ବୋଲି କହିଛି ।

ଭାରତର ବୈଦେଶିକ ମନ୍ତ୍ରଣାଳୟ ପାକିସ୍ତାନ ସେନା ମୁଖ୍ୟଙ୍କ ସାମ୍ପ୍ରତିକ ବିବୃତ୍ତିକୁ "ପରମାଣୁ ଯୁଦ୍ଧ" ବୋଲି ବର୍ଣ୍ଣନା କରିଛି । କହିଛି ଯେ ଏପରି ଦାୟିତ୍ୱହୀନ ବିବୃତ୍ତି ଆଞ୍ଚଳିକ ସ୍ଥିରତା ପାଇଁ ଗମ୍ଭୀର ବିପଦ ସୃଷ୍ଟି କରେ । ଭାରତ କହିଛି ଯେ ପାକିସ୍ତାନର ସେନାର ଆତଙ୍କବାଦୀ ଗୋଷ୍ଠୀ ସହିତ ସମ୍ପର୍କର ଇତିହାସ ରହିଛି, ଯାହା ଏହାର ପରମାଣୁ ନିୟନ୍ତ୍ରଣ ବ୍ୟବସ୍ଥା ବିଷୟରେ ଅନ୍ତର୍ଜାତୀୟ ସମୁଦାୟ ମଧ୍ୟରେ ଗମ୍ଭୀର ଚିନ୍ତା ସୃଷ୍ଟି କରିଛି।

ଅନ୍ତର୍ଜାତୀୟ ବିଶ୍ଳେଷକମାନେ ମୁନିରଙ୍କ ଆକ୍ରମଣାତ୍ମକ ବୟାନକୁ ପାକିସ୍ତାନର ଅସ୍ଥିର ଘରୋଇ ରାଜନୈତିକ ପରିସ୍ଥିତି ଏବଂ ସାମରିକ ଚାପରେ ଚାଲିଥିବା ନେତୃତ୍ୱ ସଙ୍କଟ ସହିତ ଯୋଡ଼ିଛନ୍ତି। ଅନେକ ବିଶେଷଜ୍ଞ ବିଶ୍ୱାସ କରୁଥିଲେ ଯେ ଭାରତ ବିରୋଧୀ ବିବୃତ୍ତି ପାକିସ୍ତାନର ଲୋକଙ୍କୁ ଏବଂ ମୌଳବାଦୀ ଗୋଷ୍ଠୀଗୁଡ଼ିକୁ ଏକତ୍ର କରିବାର ଏକ ପ୍ରୟାସ ଥିଲା।