ନା ଦୁବାଇ, ନା ଚୀନ, ଏହି ଗୁପ୍ତ ସ୍ଥାନରେ ଲୁଚିଛନ୍ତି ନେପାଳର ପୂର୍ବତନ ପ୍ରଧାନମନ୍ତ୍ରୀ

କାଠମାଣ୍ଡୁ ୧୧/୦୯: ନେପାଳର ପୂର୍ବତନ ପ୍ରଧାନମନ୍ତ୍ରୀ କେପି ଶର୍ମା ଓଲି ଏକ ଚିଠି ଲେଖିଛନ୍ତି । ଯେଉଁଥିରେ ସେ ବର୍ତ୍ତମାନ କେଉଁଠି ଅଛନ୍ତି ତାହା ଉଲ୍ଲେଖ କରାଯାଇଛି। ପ୍ରକୃତରେ, ତାଙ୍କ ଇସ୍ତଫା ପରେ, ସେ ଦୁବାଇ କିମ୍ବା ଚୀନ୍ ଯାଇଥିବା ଆଲୋଚନା ହୋଇଥିଲା। କିନ୍ତୁ ଚିଠିରେ ସେ ସ୍ପଷ୍ଟ କରିଛନ୍ତି ଯେ ସେ ଶିବପୁରୀରେ ନେପାଳୀ ସେନାର ସୁରକ୍ଷା ବଳୟରେ ଅଛନ୍ତି। 

ଗତ କିଛି ଦିନ ଧରି ନେପାଳର ପରିସ୍ଥିତି ବହୁତ ହିଂସାତ୍ମକ ରହିଛି । ଯୁବକମାନଙ୍କ ବିରୋଧ ମାତ୍ର ଦୁଇ ଦିନ ମଧ୍ୟରେ କ୍ଷମତାର ମୂଳଦୁଆକୁ ଦୋହଲାଇ ଦେଇଥିଲା । ଚାପ ଏତେ ବଢ଼ିଗଲା ଯେ ପ୍ରଧାନମନ୍ତ୍ରୀ କେପି ଶର୍ମା ଓଲିଙ୍କୁ ଶେଷରେ ଇସ୍ତଫା ଦେବାକୁ ପଡିଲା । ଇସ୍ତଫା ପରେ ବିଭିନ୍ନ କଳ୍ପନାଜଳ୍ପନା ଆରମ୍ଭ ହେଲା। କେତେକ କହୁଥିଲେ ଯେ ଓଲି ଦୁବାଇ ଯାଇଥିଲେ, ଅନ୍ୟ କେତେକ ଦାବି କରୁଥିଲେ ଯେ ସେ ଚୀନରେ ଅଛନ୍ତି।

କିନ୍ତୁ ଏବେ କେପି ଶର୍ମା ଓଲି ନିଜେ ଏହି ଆଲୋଚନାରେ ଅନ୍ତ ଘଟାଇ ସ୍ପଷ୍ଟ କରିଛନ୍ତି ଯେ ସେ ଦୁବାଇ କିମ୍ବା ଚୀନ ଯାଇନାହାଁନ୍ତି । ବରଂ ବର୍ତ୍ତମାନ ନେପାଳୀ ସେନାର ସୁରକ୍ଷା ବଳୟରେ ଶିବପୁରୀରେ ରହୁଛନ୍ତି । ଓଲି ଫେସବୁକରେ ଏକ ଖୋଲା ଚିଠି ସେୟାର କରିଛନ୍ତି । ଯେଉଁଥିରେ ସେ ଜନସାଧାରଣ ଏବଂ ବିଶେଷକରି ଯୁବପିଢ଼ିଙ୍କୁ ସମ୍ବୋଧିତ କରିଛନ୍ତି । ଚିଠିରେ ସେ ଲେଖିଛନ୍ତି ଯେ ସେ ସେନା କର୍ମଚାରୀଙ୍କ ମଧ୍ୟରେ ସୁରକ୍ଷିତ ଅଛନ୍ତି । ତେବେ ସେ ପିଲା ଓ ଯୁବକମାନଙ୍କୁ ମିସ୍ କରୁଛନ୍ତି। ସେ କହିଛନ୍ତି ଯେ ପିଲାମାନଙ୍କ ନିଷ୍ପାପ ହସ, ସ୍ନେହ ତାଙ୍କୁ ସର୍ବଦା ରୋମାଞ୍ଚିତ କରେ। 

ଚିଠିରେ ଓଲି ତାଙ୍କର ବ୍ୟକ୍ତିଗତ ଯନ୍ତ୍ରଣା ମଧ୍ୟ ଉଲ୍ଲେଖ କରିଥିଲେ। ସେ ଲେଖିଛନ୍ତି ଯେ ବ୍ୟବସ୍ଥା ପରିବର୍ତ୍ତନ ପାଇଁ ଲଢ଼େଇ ସମୟରେ, ସରକାରଙ୍କ ନିର୍ଯାତନା ଯୋଗୁଁ ସେ ତାଙ୍କ ସନ୍ତାନଙ୍କଠାରୁ ବଞ୍ଚିତ ହୋଇଥିଲେ। କିନ୍ତୁ ପିତା ହେବାର ଇଚ୍ଛା କେବେ ଶେଷ ହୋଇନଥିଲା । ସେ ଏହା ମଧ୍ୟ ମନେ ପକାଇ ଦେଇଥିଲେ ଯେ ୧୯୯୪ ମସିହାରେ, ଯେତେବେଳେ ସେ ଗୃହମନ୍ତ୍ରୀ ଥିଲେ । ତାଙ୍କ କାର୍ଯ୍ୟକାଳ ମଧ୍ୟରେ ସରକାର ଦ୍ୱାରା ଗୋଟିଏ ବି ଗୁଳି ଫୁଟି ନଥିଲା। 

ଓଲି ବର୍ତ୍ତମାନର ଆନ୍ଦୋଳନକୁ ଯୁବପିଢ଼ିର ପ୍ରକୃତ ସ୍ୱର ନୁହେଁ, ବରଂ ଏକ ଗଭୀର ଷଡ଼ଯନ୍ତ୍ର ବୋଲି କହିଥିଲେ। ତାଙ୍କ ଅନୁସାରେ, ସରକାରୀ କାର୍ଯ୍ୟାଳୟରେ ପୋଡ଼ାଜଳା, ଜେଲରୁ କଏଦୀମାନଙ୍କୁ ମୁକ୍ତ କରିବା ଭଳି ପଦକ୍ଷେପ କୌଣସି ନିର୍ଦ୍ଦୋଷ ପ୍ରତିବାଦର ଅଂଶ ହୋଇପାରେ ନାହିଁ। ସେ ଚେତାବନୀ ଦେଇଥିଲେ ଯେ ଆଜି ସଂଘର୍ଷ ଓ ବଳିଦାନ ମାଧ୍ୟମରେ ହାସଲ ହୋଇଥିବା ଗଣତାନ୍ତ୍ରିକ ବ୍ୟବସ୍ଥାକୁ ସମାପ୍ତ କରିବାକୁ ପ୍ରୟାସ କରାଯାଉଛି। 

ତାଙ୍କ ସ୍ୱଭାବକୁ ଜିଦ୍‌ଖୋର ବୋଲି ବର୍ଣ୍ଣନା କରି ଓଲି ଲେଖିଛନ୍ତି ଯେ ଯଦି ସେ ଜିଦ୍‌ଖୋର ହୋଇ ନ ଥାଆନ୍ତେ, ତେବେ ସେ ଏବେ ସୁଦ୍ଧା ହାର ମାନିଥାଆନ୍ତେ। ସେ ସୋସିଆଲ ମିଡିଆ କମ୍ପାନୀଗୁଡ଼ିକ ଉପରେ ନିୟମ ଲାଗୁ କରିବାଠାରୁ ଆରମ୍ଭ କରି ଲିପୁଲେଖ, କଳାପାଣି ଏବଂ ଲିମ୍ପିଆଧୁରାକୁ ନେପାଳର ଅଂଶ ଘୋଷଣା କରିବା ପର୍ଯ୍ୟନ୍ତ ଅନେକ ନିଷ୍ପତ୍ତିକୁ ତାଙ୍କ ଜିଦ୍‌ଖୋର ପରିଣାମ ବୋଲି ବର୍ଣ୍ଣନା କରିଥିଲେ। ସେ ଏପରି ମଧ୍ୟ ଜିଦ୍ ଧରିଥିଲେ ଯେ ପ୍ରଭୁ ଶ୍ରୀରାମ ନେପାଳରେ ଜନ୍ମଗ୍ରହଣ କରିଥିଲେ।

ଚିଠିର ଶେଷରେ ଓଲି ସ୍ପଷ୍ଟ କରିଥିଲେ ଯେ ତାଙ୍କ ପାଇଁ ଦେଶର ବ୍ୟବସ୍ଥା ପଦବୀ ଓ ପ୍ରତିଷ୍ଠା ଅପେକ୍ଷା ଅଧିକ ଗୁରୁତ୍ୱପୂର୍ଣ୍ଣ। ଏହି ବ୍ୟବସ୍ଥା ଲୋକଙ୍କୁ କହିବା, ଗତି କରିବା ଓ ପ୍ରଶ୍ନ ପଚାରିବାର ଅଧିକାର ଦିଏ । ଏହାକୁ ରକ୍ଷା କରିବା ତାଙ୍କ ଜୀବନର ଉଦ୍ଦେଶ୍ୟ।