ନୂଆଦିଲ୍ଲୀ : ହିଂସା, ଜଳାପୋଡ଼ା ପରେ ଏବେ ଅସ୍ଥିର ଶାସନ । ଜେନ-ଜି ନିଆଁରେ ଛାରଖାର୍ ନେପାଳରେ ଭବିଷ୍ୟତକୁ ନେଇ ଅନେକ ପ୍ରଶ୍ନ । ପ୍ରତିଦିନ ନେପାଳ ରାଜନୀତି ନେଉଛି ନୂଆ ମୋଡ଼ । ସଂସଦରୁ ନେଇ ସୁପ୍ରିମକୋର୍ଟ ଦେଶର ପ୍ରମୁଖ କୋଠାରେ ନିଆଁର ଚିହ୍ନ । ନୂଆ ସରକାର ବି ଆଭିମୁଖ୍ୟ କଣ ରହିବ ତାହା ଉପରେ ସଭିଙ୍କ ନଜର ।  ଏହାକୁ ରାଜନୀତି କହୁଛନ୍ତି ତ ଆଉ କିଏ ଧାର୍ମିକ ଦିଗ ଦେଇଛନ୍ତି। ସୋସିଆଲମିଡିଆରେ କିଛି ନେପାଳୀ ଲୋକ ଦାବି କରୁଛନ୍ତି ଯେ, ସେମାନଙ୍କ ଦେବୀ ପୂର୍ବରୁ ହିଁ ଅନିଷ୍ଟର ସଙ୍କେତ ଦେଇଥିଲେ । ନେପାଳର କିଛି ୟୁଜର୍ସ ଇନ୍ଦ୍ର ଯାତ୍ରାର ଭିଡିଓ ସେୟାର୍ କରିଛନ୍ତି ବୋଲି ଜାତୀୟ ଗଣମାଧ୍ୟମର ରିପୋର୍ଟରେ ପ୍ରକାଶ ପାଇଛି । ଦାବି କରାଯାଉଛି ଯେ ଏହି ଧାର୍ମିକ ଯାତ୍ରାର ମୁଖ୍ୟ ଆକର୍ଷଣ କୁମାରୀ ଦେବୀ ଯାତ୍ରାବେଳେ ଭାବବିହ୍ୱଳ ପରି ଦେଖାଯାଉଥିଲେ । ଯାହାକୁ ଅନିଷ୍ଟ ପୂର୍ବର ସଙ୍କେତ ବୋଲି କୁହାଯାଉଛି । ଏମିତି କି ନେପାଳରେ ଏହି ଦେବୀଙ୍କୁ କୁହାଯାଏ ‘କୁମାରୀ ମାଜୁ ଦେବୀ’ । ଏହି ଜୀବନ୍ତ ଦେବୀଙ୍କର ବିଭିନ୍ନ ଭିଡିଓ ଏବେ ଭାଇରାଲ୍ ହେବାରେ ଲାଗିଛି । ଯେଉଁଥିରେ ଦେବୀ ରୂପରେ ଜଣେ କୁନିଝିଅ କାନ୍ଦୁଥିବାର ନଜର ଆସୁଛନ୍ତି । ଲୋକ ତାଙ୍କର ଏଭଳି ଅବସ୍ଥାକୁ ନେପାଳର ବିନାଶ ସହିତ ତୁଳନା କରିଛନ୍ତି ।

ଏକ ରିପୋର୍ଟ ଅନୁସାରେ  ୨୦୧୫ରେ ନେପାଳରେ ଏକ ଭୟଙ୍କର ଭୂମିକମ୍ପ ଆସିଥିଲା । ୭.୮ ତୀବ୍ରତାର ଏହି ଭୂକମ୍ପରେ ପ୍ରାୟ ୯ ହଜାର ଲୋକଙ୍କ ମୃତ୍ୟୁ ଘଟିଥିଲା। ଏମିତି କି ୧୦ଲକ୍ଷରୁ ଅଧିକ ଘର ନଷ୍ଟ ହୋଇଯାଇଥିଲା। ଅନ୍ୟପକ୍ଷରେ ଲକ୍ଷ ଲକ୍ଷ ଲୋକ ବିସ୍ଥାପିତ ହୋଇଥିଲେ । ସେହି ସମୟରେ କୁମାରୀ ଦେବୀ କ୍ରୋଧିତ ହୋଇଥିବାର କଥା କୁହାଯାଇଥିଲା ।  ସେଥିପାଇଁ ଅନେକ ଲୋକ ଦାବି କରିଥିଲେ ଯେ ଦେବୀଙ୍କ କୋପରୁ ହିଁ ଭୂକମ୍ପ ଆସିଛି । କିନ୍ତୁ ବଡ଼ କଥା ହେଉଛି ନେପାଳୀ ଟାଇମ୍ସ ଗଣମାଧ୍ୟମ ଅନୁସାରେ ଏହି ଭୂକମ୍ପରେ କୁମାରୀ ଦେବୀଙ୍କ ଘରକୁ କୌଣସି କ୍ଷତି ହୋଇନଥିଲା । ତାଙ୍କ ପରିବାର ମଧ୍ୟ ସେଠାରେ ରହିଥିଲେ କାରଣ ସେମାନଙ୍କ ବିଶ୍ୱାସ ଥିଲା ଯେ ଦେବୀ ସେମାନଙ୍କୁ ରକ୍ଷା କରିବେ । ତେବେ କିଏ ଏହି କୁମାରୀ ଦେବୀ ଏବଂ ନେପାଳର ପରିସ୍ଥିତିକୁ ନେଇ ତାଙ୍କୁ କାହିଁକି ଯୋଡ଼ା ଯାଉଛି ? 

ନେପାଳର ସଂସ୍କୃତି ଅନୁସାରେ ଶହ ଶହ ବର୍ଷ ଧରି କୁମାରୀ ଦେବୀ ବାଛିବାର ପରମ୍ପରା ରହିଛି । ଯେପରି ତିବ୍ଦତର ଲୋକେ ନିଜର ଦଲାଇଲାମାଙ୍କୁ ବାଛନ୍ତି, ସେହିପରି ନେପାଳରେ ବଛାଯାଏ କୁମାରୀ ଦେବୀଙ୍କୁ । ଯେଉଁ କୁମାରୀ ଝିଅ ଉପରେ ଦୈବୀ ଗୁଣ ଦେଖାଯାଏ ଏବଂ ଯିଏ ଦେବୀ ହେବାର ସମସ୍ତ ପରୀକ୍ଷାରେ ଉତ୍ତୀର୍ଣ୍ଣ ହୁଅନ୍ତି, ତାଙ୍କୁ କୁମାରୀ ଦେବୀ ଭାବରେ ବଛାଯାଏ । ମାନ୍ୟତା ଅଛି ଯେ ଏହି ଦେବୀ ନେପାଳର ଲୋକଙ୍କୁ ବିପଦ ଓ ଅସୁବିଧାରୁ ରକ୍ଷା କରିବେ । ପର୍ବପର୍ବାଣୀରେ ଦେବୀଙ୍କୁ ତାଙ୍କ ଆବାସରୁ ବାହାରକୁ ଅଣାଯାଏ ଏବଂ ଦର୍ଶନ ପାଇଁ ଲୋକଙ୍କ ଭିଡ଼ ଜମେ । କୁମାରୀ ଦେବୀଙ୍କୁ ତାଙ୍କର ମାସିକ ଧର୍ମ ଆରମ୍ଭ ନହେବା ପର୍ଯ୍ୟନ୍ତ ଏହି ପଦରେ ରଖାଯାଏ । ଏହା ପରେ ତାଙ୍କୁ ପଦରୁ ହଟାଯାଏ ଏବଂ ନୂଆ କୁମାରୀ ଦେବୀଙ୍କ ସନ୍ଧାନ ଆରମ୍ଭ ହୁଏ । ତେବେ ପଦରୁ ହଟାଯିବା ପରେ ତାଙ୍କୁ ଆଜୀବନ ପେନସନ ଓ ସମ୍ମାନ ମିଳେ । ନେପାଳର ଲୋକଙ୍କ କହିବା ଅନୁସାରେ କୁମାରୀ ଦେବୀ ହେଉଛନ୍ତି ସାକ୍ଷାତ ମା’ କାଳୀଙ୍କ ଜୀବନ୍ତ ଅବତାର । ଯଦି ସେ ଯାତ୍ରାବେଳେ କେଉଁ ଭକ୍ତଙ୍କୁ ଦେଖି କିମ୍ବା ସମସ୍ତ ଭକ୍ତଙ୍କୁ ଦେଖି ହସନ୍ତି ତା’ହେଲେ ସୁଖ, ସମୃଦ୍ଧିରେ ବର୍ଷଟି ଅତିବାହିତ ହୁଏ କିନ୍ତୁ ଯଦି କୁମାରୀ କାନ୍ଦନ୍ତି ତା’ହେଲେ ଏହାକୁ ଅଶୁଭ ବୋଲି ମନେ କରାଯାଏ । ଆଉ ଚଳିତବର୍ଷ ନେପାଳରେ କୁମାରୀ ଦେବୀ କାନ୍ଦିଥିଲେ । ତେଣୁ ଇଏ ନେପାଳ ପାଇଁ ବିପଦ ଆଣିଛି ବୋଲି କୁହାଯାଉଛି।