ଫୁଡ୍ ପ୍ରୋସେସିଂ କ୍ଷେତ୍ରରେ ମିଳିଲା ୧.୨ ଟ୍ରିଲିଅନ ଟଙ୍କାର ନିବେଶ: କେନ୍ଦ୍ର ସରକାର

ନୂଆଦିଲ୍ଲୀ: 'ୱାର୍ଲ୍ଡ ଫୁଡ୍ ଇଣ୍ଡିଆ ୨୦୨୫' ଶିଖର ସମ୍ମିଳନୀ ସମୟରେ ଭାରତର ଖାଦ୍ୟ ପ୍ରକ୍ରିୟାକରଣ କ୍ଷେତ୍ର(ଫୁଡ୍ ପ୍ରୋସେସିଂ ସେକ୍ଟର) ପାଇଁ ମୋଟ ୧.୦୨ ଟ୍ରିଲିୟନ ନିବେଶ ପାଇଛି। କେନ୍ଦ୍ର ସରକାର ୨୬ ଟି ଘରୋଇ ଏବଂ ଆନ୍ତର୍ଜାତୀୟ କମ୍ପାନୀ ସହିତ ଚୁକ୍ତି ସ୍ୱାକ୍ଷର କରିଛନ୍ତି। ଫୁଡ ପ୍ରୋସେସିଂ ଇଣ୍ଡଷ୍‌ଟ୍ରି ମନ୍ତ୍ରଣାଳୟ ଦ୍ୱାରା ଆୟୋଜିତ ଏହି ସମ୍ମିଳନୀକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଉଦଘାଟନ କରିଥିଲେ। ଏହା ସେପ୍ଟେମ୍ବର ୨୫ ରୁ ୨୮ ପର୍ଯ୍ୟନ୍ତ ରାଜଧାନୀ ଦିଲ୍ଲୀର ଭାରତ ମଣ୍ଡପମରେ ଅନୁଷ୍ଠିତ ହୋଇଥିଲା।

ତେବେ ଏହି ସମ୍ମିଳନୀ ଐତିହାସିକ ଭାବେ ଶେଷ ହୋଇଛି। ଏଥିରେ ଅଭୁତପୂର୍ବ ପୁଞ୍ଜି ନିବେଶ ମିଳିଛି ବୋଲି ରବିବାର ମନ୍ତ୍ରଣାଳୟ ପକ୍ଷରୁ ବିବୃତ୍ତି ଜାରି କରାଯାଇଛି। ଫୁଡ ପ୍ରୋସେସିଂ କ୍ଷେତ୍ରରେ ନିବେଶ କରିବାକୁ ଚୁକ୍ତି କରିଥିବା କମ୍ପାନୀଙ୍କ ମଧ୍ୟରେ ଉଭୟ ଘରୋଇ ଓ ବିଦେଶୀ କମ୍ପାନୀ ରହିଛନ୍ତି। ଏମାନଙ୍କ ମଧ୍ୟରେ ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟସ୍, ଦି କୋକା-କୋଲା ସିଷ୍ଟମ୍ ଇନ୍ ଇଣ୍ଡିଆ, ଗୁଜରାଟ କୋଅପରେଟିଭ୍ ମିଲ୍କ ମାର୍କେଟିଂ ଫେଡେରେସନ (ଅମୁଲ), ନେସଲେ ଇଣ୍ଡିଆ, ଟାଟା କଞ୍ଜ୍ୟୁମର ପ୍ରଡକ୍ଟସ୍ ଲିମିଟେଡ୍ ଏବଂ କାର୍ଲସବର୍ଗ ଇଣ୍ଡିଆ ପ୍ରାଇଭେଟ୍ ଲିମିଟେଡ୍ ଓ ଗୋଡରେଡ୍ ଆଗ୍ରୋଭେଟ୍‌, ବିଏଲ ଆଗ୍ରୋ ଇଣ୍ଡଷ୍ଟ୍ରିଜ୍, ପତଞ୍ଜଳି ଫୁଡ୍ସ, ହଳଦିରାମ ସ୍ନାକ୍ସ ଫୁଡ୍, ଇଣ୍ଡିଆନ୍ ପୋଲ୍ଟ୍ରି ଆଲାଏନ୍ସ, ଏମଆରଏସ ବେକ୍ଟରସ୍ ଫୁଡ୍ ସ୍ପେଶାଲିଟିଜ୍ ଲିମିଟେଡ୍, ଡାବର ଇଣ୍ଡିଆ ଲିମିଟେଡ୍ ଏବଂ ଏବି ଇନବେ ଆଦି ରହିଛନ୍ତି।

ରିଲାଏନ୍ସ କଞ୍ଜ୍ୟୁମର ପ୍ରଡକ୍ଟସ୍ ଲିମିଟେଡ୍ ସାରା ଦେଶରେ ସମନ୍ୱିତ ଖାଦ୍ୟ ଉତ୍ପାଦନ ୟୁନିଟ୍(ଇଣ୍ଟିଗ୍ରେଟେଡ୍ ଫୁଡ୍ ପ୍ରୋସେସିଂ ୟୁନିଟ) ପ୍ରତିଷ୍ଠା କରିବା ପାଇଁ ଫୁଡ୍ ପ୍ରୋସେସିଂ ଇଣ୍ଡଷ୍ଟ୍ରୀ ମନ୍ତ୍ରଣାଳୟ ସହିତ ୪୦ ହଜାର କୋଟିର ଚୁକ୍ତିନାମା କରିଛି। ସେହିପରି ଭାରତରେ ତିନୋଟି କୋକା-କୋଲା ବୋଟଲର୍ ଦେଶର ଖାଦ୍ୟ ପ୍ରକ୍ରିୟାକରଣ ଭିତ୍ତିଭୂମିକୁ ବିସ୍ତାର କରିବା ପାଇଁ ସାମୂହିକ ଭାବରେ ₹୨୫,୭୬୦ କୋଟି ($୨.୯୬ ବିଲିୟନ) ନିବେଶ କରିବାକୁ ଯୋଜନା କରୁଛନ୍ତି। ଗ୍ରୀନଫିଲ୍ଡ ଏବଂ ବ୍ରାଉନଫିଲ୍ଡ ପ୍ରକଳ୍ପ ପାଇଁ ମନ୍ତ୍ରଣାଳୟ ସହିତ ବୁଝାମଣାପତ୍ର ସ୍ୱାକ୍ଷର କରିଛନ୍ତି।

ଏନେଇ ମନ୍ତ୍ରଣାଳୟ କହିଛି “ଚାରି ଦିନିଆ କାର୍ଯ୍ୟକ୍ରମ ମଧ୍ୟରେ, ୨୬ଟି ପ୍ରମୁଖ ଘରୋଇ ଏବଂ ବିଶ୍ୱସ୍ତରୀୟ କମ୍ପାନୀ ମୋଟ ୧୦୨,୦୪୬ କୋଟି ଟଙ୍କାର ବୁଝାମଣାପତ୍ର ସ୍ୱାକ୍ଷର କରିଛନ୍ତି। ଯାହା ଭାରତର ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ସର୍ବବୃହତ ନିବେଶ ଘୋଷଣା ମଧ୍ୟରୁ ଗୋଟିଏ।” ଶିଖର ସମ୍ମିଳନୀର ଉଦଘାଟନୀ ଦିନରେ, କେନ୍ଦ୍ର ଖାଦ୍ୟ ପ୍ରକ୍ରିୟାକରଣ ମନ୍ତ୍ରୀ ଚିରାଗ ପାସୱାନ କହିଥିଲେ ଯେ ଚାରି ଦିନିଆ କାର୍ଯ୍ୟକ୍ରମ ମଧ୍ୟରେ ୧ ଟ୍ରିଲିୟନରୁ ଅଧିକ ମୂଲ୍ୟର ବୁଝାମଣାପତ୍ର ସ୍ୱାକ୍ଷରିତ ହେବାର ଆଶା କରାଯାଉଛି। ଯାହା ସତ ହୋଇଛି।

ଖାଦ୍ୟ ପ୍ରକ୍ରିୟାକରଣ କ୍ଷେତ୍ରରେ ସରକାରଙ୍କ ସହିତ କମ୍ପାନୀଗୁଡ଼ିକର ହୋଇଥିବା ବିଭିନ୍ନ ବୁଝାମଣାପତ୍ରରେ ୬୪,୦୦୦ ରୁ ଅଧିକ ଲୋକଙ୍କୁ ପ୍ରତ୍ୟକ୍ଷ ନିଯୁକ୍ତି ସୃଷ୍ଟି ହେବ ବୋଲି ଆକଳନ କରାଯାଇଛି। ପରୋକ୍ଷ ଭାବରେ ଦେଖିଲେ ୧୦ ଲକ୍ଷରୁ ଅଧିକ ଲୋକଙ୍କ ପାଇଁ ଏକ ନୂଆ ସୁଯୋଗ ସୃଷ୍ଟି ହେବ।

ଏହି ନିବେଶ ଏ କ୍ଷେତ୍ରରେ ବହୁବିଧ ବ୍ୟବସାୟରେ କରାଯିବ। ଯଥା ଦୁଗ୍ଧ, ମାଂସ ଏବଂ କୁକୁଡ଼ା, ପ୍ୟାକେଜ୍ ହୋଇଥିବା ଖାଦ୍ୟ, ମଦ୍ୟପାନ ଏବଂ ଅଣ-ମଦ୍ୟପାନ ପାନୀୟ, ମସଲା ଏବଂ ମିଠା, ଖାଦ୍ୟ ତେଲ, ଫଳ ଏବଂ ପନିପରିବା ଏବଂ ଖାଇବା ପାଇଁ ପ୍ରସ୍ତୁତ ଉତ୍ପାଦ ସମେତ ବିଭିନ୍ନ କ୍ଷେତ୍ରକୁ କଭର କରିବ।।
ଏହି ନିବେଶଗୁଡ଼ିକ ବିଭିନ୍ନ ରାଜ୍ୟରେ କରିବାକୁ ଯୋଜନା କରାଯାଉଛି। ଗୁଜୁରାଟ, ମହାରାଷ୍ଟ୍ର, ଉତ୍ତର ପ୍ରଦେଶ, ପଞ୍ଜାବ, ବିହାର, କର୍ଣ୍ଣାଟକ, ତାମିଲନାଡୁ, ଆନ୍ଧ୍ର ପ୍ରଦେଶ, ତେଲେଙ୍ଗାନା, ମଧ୍ୟ ପ୍ରଦେଶ, ଓଡ଼ିଶା, ରାଜସ୍ଥାନ, ପଶ୍ଚିମବଙ୍ଗ, ଆସାମ, ଛତିଶଗଡ଼, ଉତ୍ତରାଖଣ୍ଡ, ଜମ୍ମୁ ଏବଂ କାଶ୍ମୀର ଏବଂ ଉତ୍ତର-ପୂର୍ବ ଅଞ୍ଚଳର ଅନ୍ୟାନ୍ୟ ଅଂଶ ସମେତ ଅନେକ ରାଜ୍ୟରେ ଏସବୁ ନିବେଶ କରାଯିବ।